މިއަހަރުގެ ފަހުކޮޅުގައި ކުރިއަށް ގެންދިޔުމަށް ހަމަޖެހިފައިވާ ވޯލްޑް ކަޕްގެ ގްލޯބަލް ކަނެކްޓިވް ސާރވިސް ދިނުމަށް އުރީދޫ ހަމަޖައްސައިފިއެވެ.

ދުނިޔޭގައި ބާއްވާ އެންމެ ބޮޑު ފުޓްބޯޅަ މުބާރާތުގެ ގްލޯބަލް ކަނެކްޓިވް ސާރވިސްގެ ޚިދުމަތް ދިނުމަށް އުރީދޫ އާއި ހަވާލުކުރުމުން، މެޗު ލައިވް ކުރުމުގެ ކަންތައްތަކާއި އެމެޗުތައް ބްރޯޑްކާސްޓް ކުރުމުގެ ލައިސަންސްތައް ދޭނީ އުރީދޫ މެދުވެރިކޮށެވެ.

އެންމެ ރަނގަޅު ކޮލިޓީގައި ބެލުންތެރިންނާއި ހަމައަށް މެޗުތައް ގެނެސްދިނުމަށްޓަކައި އުރީދޫއިން މިހާރު ވަނީ 100 ޖިގްގެ މަލްޓި ނެޓްވޯކްތަކެއް އެޅުމުގެ މަސައްކަތް ފަށާފައެވެ. އަދި ވޯލްޑްކަޕާއި ދިމާކޮށް ބްރޯޑްކާސްޓަރުންނަށް ވިހާވެސް ފެންވަރު ރަނގަޅު ޚިދުމަތެއް ދިނުމުގެ ގޮތުން އުރީދޫއިން މިހާރު ދަނީ މިފަދަ ޚިދުމަތްދޭ ބޮޑެތި ކުންފުނިތަކާއެކު މަސައްކަތް ކުރަމުންނެވެ.

އުރީދޫގެ ޗީފް ބިޒްނަސް އޮފިސަރު ޝައިހް ނަސީރު ބިން ހަމަދު ބިން ނަސީރު އަލް ތާނީ ވަނީ ވޯލްޑް ކަޕްގެ ގްލޯބަލް ކަނެކްޓިވިޓީގެ ޚިދުމަތް ދޭން އުރީދޫއަށް ލިބުމަކީ އެކުންފުންޏަށް ލިބުނު ބޮޑު ޝަރަފެއްގެ ގޮތުގައި ފާހަގަކުރައްވާފައެވެ. އަދި ކުޅިވަރުގެ ބޮޑެތި އިވެންޓްތަކުން ނެޓްވޯކްގެ ޚިދުމަތް ދިނުމުގެ ފުރުސަތު ލިބުމުން، ޓެކްނޮލޮޖީގެ ގޮތުން ކުރިއަށް ދިއުމަށް އުރީދޫން ކުރާ މަސައްކަތް އެނގިގެންގޮސްފައިވާ ކަމަށް ވިދާޅުވިއެވެ.

އުރީދޫގެ ޚިދުމަތްތައް ފުޅާކޮށް ފައިވް-ޖީ ޚިދުމަތް ދެމުންގެންދާއިރު އެ ކުންފުނިން ދަނީ މެދު އިރުމައްޗާއި، އުތުރު އެފްރިކާގެ އިތުރުން ދެކުނު އޭޝިއާގެ ގައުމުތަކުގައި ވެސް ޚިދުމަތް ދެމުންނެވެ. އަދި ދުނިޔޭގެ އެތައް ބަޔަކު މިހާރު އަންނަނީ އުރީދޫގެ ޑޭޓާ ސެންޓްރިކް މޯބައިލް އަދި ފިކްސްޑް ނެޓްވޯކް ބޭނުންކުރަމުންނެވެ.