ރަޝިޔާއިން ޔޫކްރެއިންގައި ހާސިލްކުރަން ބޭނުންވާ ކަންތައްތައް ހާސިލުކުރާނެ: ޕުޓިން

ކޮންމެ ގޮތަކަށް ކަންތައްތައް ދިޔަޔަސް، ޔޫކްރެއިންގައި ރަޝިޔާއިން ހާސިލްކުރަން ބޭނުންވާ ކަންތައްތައް ހާސިލުކުރާނެ ކަމަށް ރަޝިޔާގެ ރައީސް ވްލަޑްމިއަރ ޕުޓިން ވިދާޅުވެއްޖެއެވެ.

ރަޝިޔާގެ ރައީސް ޕުޓިން އާއި ފްރާންސްގެ ރައީސް އެމަނުއަލް މެކްރޮން އާއި ފޯނުން ގުޅުއްވާ ދެއްކެވި ވާހަކަތަކާއި ގުޅިގެން ކްރެމްލިން އިން ނެރުނު ބަޔާނެއްގައި ބުނެފައިވަނީ ޕުޓިން ވަނީ ރަޝިޔާއިން ހާސިލުކުރަން ބޭނުންވާ ކަންކަން ސާފުކޮށްދީފައި ކަމަށެވެ. އޭގެތެރޭގައި ޔޫކްރެއިންގެ އަސްކަރީ ބާރު ކަނޑުވާލުމާއި ޔޫކްރެއިން އަކީ ވަކި ކޮޅަކަށް ނުޖެހޭ ގައުމަކަށްވުން ހިމެނެއެވެ.

މީގެއިތުރުން ބަޔާނުގައި އިތުރަށް ބުނެފައިވަނީ ރަޝިޔާ އާއި ޔޫކްރެއިން އާއި ދެމެދު ކުރިޔަށްދާ ސުލްހައިގެ ވާހަކަތައް ފަސްކުރުމަށް ޔޫކްރެއިން އިން ކުރަމުންދާ ކޮންމެ ކަމަކާއެކު ރަޝިޔާއިން ޑިމާންޑުކުރާ ކަންކަން ދާނީ އިތުރުވަމުން ކަމަށެވެ.

ބަޔާނުގައި ބުނެފައިވަނީ ޔޫކްރެއިން އާއެކު ކުރިޔަށްދާ ސުލްހައިގެ މަޝްވަރާތަކުގައި ރަޝިޔާގެ ފަރާތުން ކުރިމަތިކުރާނެ ޝަރުތުތަކާއި އެނޫންކަންކަން ވަނީ ޕުޓިން ނިންމަވާފައިކަމަށެވެ. އެގޮތުން އެންމެ ފުރަތަމަ ކަމެއްގެ ގޮތުގައި ރަޝިޔާއިން ބޭނުންވަނީ ޔޫކްރެއިންގެ އަސްކަރީ ބާރު ކަނޑުވާލާއި ޔޫކްރެއިން އަކީ ވަކި ކޮޅަކަށް ނުޖެހި އޮންނަ ގައުމަކަށްވުން ކަމަށް ބަޔާނުގައި ބުނެފައިވެއެވެ. އެކަމުގެ ސަބަބުން ރަޝިޔާއަށް ސަލާމަތީ ގޮތުން ރަޝިޔާގެ ސަރަހައްދުގެ ތެރެއިން ދުވަހަކުވެސް ނުރައްކާތެރިކަމެއް ނޯންނާނެކަމަށް ބަޔާނުގައި ބުނެފައިވެއެވެ.

އަދި ސުލްހައިގެ ވާހަކަތަކުގެ ނަމުގައި ޔޫކްރެއިން އިން އިތުރު ވަގުތު ހޯދުމަށް ކުރަމުންދާ ކަންކަމުގެ ސަބަބުންވެސް ރަޝިޔާގެ ޑިމާންޑްތައް އިތުރުވެގެންދާނެކަމަށް ބަޔާނުގައި ބުނެފައިވެއެވެ.

މީގެއިތުރުން ރަޝިޔާއިން ޔޫކްރެއިންގައި ކުރިޔަށް ގެންދާ ޚާއްސަ އޮޕަރޭޝަން ކުރިޔަށްދަނީ ރޭވިފައިވާ ޕްލޭނާއި އެއްގޮތަށްކަމަށް ބަޔާނުގައި ބުނެފައިވެއެވެ. އަދި ރަޝިޔާއިން ޔޫކްރެއިންގެ ވެރިރަށް ކިޔެވްގެ އާންމުނަށް އަމާޒުކޮށް ހަމަލާދޭކަމަށް ބުނެ ފަތުރާ ޚަބަރުތަކަކީ ރަޝިޔާއާއި ދެކޮޅަށް ފަތުރަމުންދާ ޑިސްއިންފޮރމޭޝަން ކެމްޕެއިންގެ ތެރެއިން ފަތުރަމުންދާ ދޮގު ޚަބަރުތަކެއްކަމަށް ބުނެފައިވެއެވެ. ރަޝިޔާއިން އަންނަނީ އާންމު ރައްޔިތުން ދިފާއުކުރުމަށް ކުރެވެން ހުރި ހުރިހާ މަސައްކަތެއް ކުރަމުންކަމަށްވެސް ބުނެފައިވެއެވެ.

ރަޝިޔާއިން ބުނަމުން އަންނަނީ ޔޫކްރެއިންގައި ކުރިޔަށްގެންދަނީ އަސްކަރީ ޚާއްސަ އޮޕަރޭޝަނެއް ކަމަށެވެ. ޔޫކްރެއިން ހިފުމުގެ ވިސްނުމެއް ނުގެންގުޅޭކަމަށާއި ނަމަވެސް ދެކުނު ސަރަހައްދުގައި އޮތް އަސްކަރީ ބާރުތަކުގެ ބާރު ކަނޑުވާލާ، އެސަރަހައްދު ހިފުމަށްކަމަށް ރަޝިޔާއިން އަންނަނީ ބުނަމުންނެވެ.