ނިޔުކުލިއަރ ހަނގުރާމައަކަށް ދިޔުމުގެ ވިސްނުމެއް ނެތް: ރަޝިޔާގެ ފޮރިން މިނިސްޓަރު
4 މާރިޗު 2022 | ހުކުރު 02:31ލަވްރޯފް ވިދާޅުވީ މިމައްސަލައިގައި ހައްލެއް ލިބޭނެކަމާމެދު ޝައްކު ނުކުރައްވާކަމަށް
ރަޝިޔާގެ ފޮރިން މިނިސްޓަރު ސަރްގޭ ލަވްރޯފް
ބައެއް ލީޑަރުން ރަޝިޔާ އާއި ދެކޮޅަށް ހަނގުރާމަކުރުމަށް ތައްޔާރުވަމުން އަންނަކަމަށް ގަބޫލުފުޅުކުރައްވާކަމަށާއި އެންމެ ފަހު ވަގުތާއި ހަމައަށްވެސް ރަޝިޔާއިން ހަނގުރާމަކުރަމުންދާނެ ކަމަށް ރަޝިޔާގެ ފޮރިން މިނިސްޓަރު ސަރްގޭ ލަވްރޯފް ވިދާޅުވެއްޖެއެވެ.
ރަޝިޔާގެ ސްޓޭޓް ޓީވީއަށް ދެއްވި އިންޓަރވިއުއެއްގައި ލަވްރޯފް ވިދާޅުވީ ރަޝިޔާއިން ޔޫކްރެއިންގައި ކުރިޔަށްގެންދާ އަސްކަރީ އޮޕަރޭޝަން އެގޮތުގައި ކުރިޔަށްގެންދާނެކަމަށެވެ. ނަމަވެސް ނިޔުކުލިއަރ ހަނގުރާމައަކަށް ދިޔުމުގެ ވިސްނުމެއް ނުގެންގުޅުއްވާކަމަށް ލަވްރޯފް ވިދާޅުވިއެވެ.
މީގެއިތުރުން ލަވްރޯފް ވަނީ ޔޫކްރެއިންގެ ރައީސް ވޮލޮޑިމިރް ޒެލެންސްކީ ނާޒީންގެ ގޮތްތައް ކުރިއަރުވާކަމަށް ތުހުމަތުކުރައްވާފައެވެ.
ލަވްރޯފް އިތުރަށް ވިދާޅުވީ މިމައްސަލައިގައި ހައްލެއް ލިބޭނެކަމާމެދު ޝައްކު ނުކުރައްވާކަމަށެވެ. ނަމަވެސް ހުޅަނގާއެކު ކުރިޔަށްގެންދާ ވާހަކަތައް ކުރިޔަށްގެންދާން ޖެހޭނީ ދެ ފަރާތުންވެސް އިޚުތިރާމްކުރާ ގޮތަށްކަމަށް ވިދާޅުވިއެވެ. ލަވްރޯފް އިތުރަށް ވިދާޅުވީ ނޭޓޯއިން އަދިވެސް އެމީހުންނަކީ މާ މަތީ ބައެއްކަން ހާމަކުރުމަށް މަސައްކަތްކުރާ ކަމަށާއި ރަޝިޔާއަށްވެސް ހެޔޮއެދޭ މީހުން ގިނަ ކަމަށެވެ. އަދި އެއްވެސް ބަޔަަކަށް ރަޝިޔާއިން ބޭނުންވާ ކަންކަން ބޮލާލާ ޖެހުމުގެ ފުރުސަތު ނުދޭނަކަމަށް ލަވްރޯފް ވިދާޅުވިއެވެ.
ޔޫކްރެއިންގައި ރަޝިޔާގެ ސަލާމަތަށް ނުރައްކާވާފަދަ ތަންތަން ހުރުމަށް ރަޝިޔާއިން ޖާގަނުދޭނެކަމަށްވެސް ލަވްރޯފް ވިދާޅުވިއެވެ. ނިޔުކުލިއަރ ހަތިޔާރު ބޭނުންކުރުމުގެ ކަންކަން ހުޅަނގުގެ ވެރިންގެ ސިކުނޑިތަކުގައި އަބަދާއަބަދު ދައުރުވަމުން އަންނަކަމަށާއި ނަމަވެސް ރަޝިޔާގެ އެއްވެސް ވެރިއެއްގެ ސިކުނޑީގައި އެފަދަ ކަމެއްގެ ޚިޔާލެއް ނެތްކަމަށް ވިދާޅުވިއެވެ. އަދި ރުޅިއެރުވުމުގެ އެއްވެސް ކަމެއްކޮށްގެން ކުރަން ނުޖެހޭ އެއްވެސް ޒާތެއްގެ ކަމެއް ނުކުރާނެކަމަށްވެސް ލަވްރޯފް ވިދާޅުވިއެވެ.
ސިޔާސީ ގޮތުން ބާކީވެފައިވާކަމުގެ އިހުސާސް ރަޝިޔާއަށް ނުކުރެވޭ ކަމަށާއި ޔޫކްރެއިން ކުރިޔަށް އޮތްތަނުގައި އޮންނަންވީ ގޮތެއް ނިންމާނީ ޔޫކްރެއިންގެ ރައްޔިތުންކަމަށްވެސް ލަވްރޯފް ވިދާޅުވިއެވެ.
ޔޫކްރެއިން އާއި ހުޅަނގުން އަންނަނީ ރަޝިޔާއިން ޔޫކްރެއިންގެ އާންމުން ދިރިއުޅެމުން އަންނަ ތަންތަނަށް އަމާޒުކޮށް ހަމަލާދެމުންދާކަމަށް ބުނަމުންނެވެ. އެކަމާއި ގުޅޭގޮތުން ލަވްރޯފް ވިދާޅުވީ އަސްކަރީ ފައުޖުތަކަށް އިރުޝާދު ދީފައިވާނީ ހަމައެކަނި އަސްކަރީ ތަންތަަނަށް ހަމަލާ ދިނުމަށްކަމަށެވެ.
