އިތުރު 535 މީހުން ކޮވިޑަށް ޕޮޒިޓިވްވެއްޖެ

މުޅި ރާއްޖެއިން އިތުރު 535 މީހަކު ކޮވިޑަށް ޕޮޒިޓިވްވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)އިން އާންމުކޮށްފައިވާ މައުލޫމާތުގައި ވާގޮތުން, ފާއިތުވި 24 ގަޑިއިރުތެރޭގައި 2،231 ސާމްޕަލެއް ވަނީ ޓެސްޓުކޮށްފައެވެ. މީގެ ތެރެއިން 488 ސާމްޕަލްއެއް ޓެސްޓުކޮށްފައިވަނީ މާލެ ސަރަހައްދުންނެވެ.

ޓެސްޓުކުރި ސާމްޕަލްތަކުގެ ތެރެއިން ޕޮޒިޓިވްވެފައިވަނީ 535 މީހުންނެވެ. މީގެ ތެރެއިން މާލެ ސަރަހައްދުން 42 މީހުން ޕޮޒިޓިވްވެފައިވާއިރު، އަތޮޅުތެރެއިން ޕޮޒިޓިވްވީ 448 މީހުންނެވެ. ހިންގަމުންދާ ރިސޯޓުތަކުން 34 މީހުން ވަނީ ޕޮޒިޓިވްވެފައެވެ. އަދި 11 މީހުން ޕޮޒިޓިވްވީ ކޮން ތަނަކުން ކަމެއް ދެނެގަނެވިފައެއް ނުވެއެވެ. ފާއިތުވި 24 ގަޑިއިރު ޕޮޒިޓިވްވި 535 މިއާއެކު މިހާތަނަށް ރާއްޖެއިން ކޮވިޑަށް ޕޮޒިޓިވްވި މީހުންގެ ޖުމްލަ ވަނީ 171،649އަށް އަރާފައެވެ.

މިވަގުތު އެކްޓިވް ކޭހުގެ ގޮތުގައި 14،887 ކޭހެއް ދަނީ ގުނަމުންނެވެ. މިވަގުތު 10 މީހުންނަށް ފަރުވާ ދެމުން ގެންދަނީ ހޮސްޕިޓަލުތަކުގައި އެޑްމިޓުކޮށްގެންނެވެ. މިހާތަނަށް ބަލިން ފަސޭހަވެފައިވަނީ 156،452 މީހުންނެވެ. އަދި 297 މީހުން ވަނީ ބަލީގައި ނިޔާވެފައެވެ.

އޮމިކްރޯން ވޭރިއަންޓާއެކު ޖެނުއަރީ މަހުގެ ތެރޭގައި ރާއްޖެއިން ފެނުނު ކޭސްތައް ވަނީ ވަރަށް ބޮޑަށް އިތުރުވެފައެވެ. މިގޮތުން ދުވާލަކު 2،500އަށްވުރެ މަތީގައި ކޭސްތައް ރިޕޯޓުކޮށްފައިވެއެވެ.