ސަވާދީއްތަ ދަތުރު ކާމިޔާބު ކަމާއެކު ކުރިއަށް ގެންދިއުމަށް ރާއްޖެޓީވީގެ ފަރާތުން ލިބުނު އެއްބާރުލުން ފާހަގަކޮށްފި

ސަވާދީއްތަ ދަތުރު ކާމިޔާބު ކަމާއެކު ކުރިއަށް ގެންދިއުމަށް ރާއްޖެޓީވީގެ ފަރާތުން ލިބުނު އެއްބާރުލުން ފާހަގަކޮށް ހަނދާނީ ފިލާ ހަދިޔާ ކޮށްފިއެވެ.

ބުރާސްފަތި ދުވަހު ކުރިއަށް ގެންދިޔަ ފަށާއިރު ޕްރޮގްރާމްގައި ހަނދާނީ ފިލާ ހަދިޔާ ކޮށްދެއްވީ މޯލްޑިވްސް އިންޓެގްރޭޓަޑް ޓުއަރިޒަމް ޑިވެލޮޕްމަންޓް ކޯޕަރޭޝަން (އެމްއައިޓީޑީސީ)ގެ މެނޭޖިން ޑިރެކްޓަރ މުހައްމަދު ރާއިދް އެވެ. ހަަނދާނީ ފިލާއާ ހަވާލުވެލެއްވީ ރާއްޖެޓީވީގެ ހެޑް އޮފް ޕްރޮގްރާމްސް އެންޑް ކޯޑިނޭޝަން އާމިރު ސަލީމެވެ.

ސަވާދީއްތަ ދަތުރާ ގުޅޭގޮތުން ރާއިދު ވިދާޅުވީ ރާއްޖެޓީވީ އަކީ މިދަތުރުގެ އެންމެ ބޮޑު ސްޕޮންސަރ ކަމަށާއި، ކާމިޔާބު ކަމާއެކު ދަތުރު ކުރިއަށް ގެންދިއުމުގައި ރާއްޖެޓީވީގެ ދައުރު ވަރަށް ބޮޑު ކަމަށެވެ. ހުރިހާ ސްޕޮންސަރުން ކޮންދިން މަސައްކަތްތައް ފާހަގަކުރާއިރު، ސަވާދީއްތަ ދަތުރުގައި ދެމުންދާ ޕާސްޕޯޓާއި، ފޮތް ވެސް ރާއްޖެޓީވީއަށް ހަދިޔާ ކޮށްދެއްވާފައިވެއެވެ.

ކާމިޔާބު ކަމާއެކު ސަވާދީއްތަ ދަތުރު ނިންމާލާފައިވާއިރު، މިދަތުރާ ގުޅޭ ޑޮކިއުމެންޓްރީއެއް ގެނެސްދިނުމަށް ނިންމާފައިވެއެވެ.

ސަވާދީއްތަ ދަތުރަށް ރަށްރަށުގެ ރައްޔިތުންގެ ފަރާތުން ވަރަށް ބޮޑު ތަރުހީބެއް ލިބިގެން ދިޔައެވެ. ރަށްރަށުގައި ދިރިއުޅޭ ރައްޔިތުން ފަތުރުވެރިކަމަށް ބޭނުންވެފައިވާ މިންވަރު މިދަތުރުން ވަނީ ހާމަވެގެން ގޮސްފައެވެ. މި ދަތުރުގެ ތެރެއިން ރާއްޖޭގެ ރަށްތައް އިޝްތިހާރުކޮށް އެރަށްތަކުގެ ޚާއްސަ ކަންކަން ފަތުރުވެރިން ވަނީ ބޭރުގެ އެކި ސޯޝަލް މީޑިއާ ޕްލެޓްފޯމްތަކުގައި ހިއްސާކޮށްފައެވެ.

ރާއްޖޭގެ ފަތުރުވެރިކަން އިޝްތިހާރުކޮށް ކުރިއެރުވުމަށް ބޭއްވި މި ރެލީގައި ޖުމްލަ 9 ޔޮޓެއް ބައިވެރިވިއެވެ. ނަމަވެސް މަގުބޫލު އުޒުރަކާއެކު ދެޔޮޓް ވަނީ ދަތުރާ ވަކިވެފައެވެ.