ރާއްޖޭގައި ތިބި ޔޫކްރެއިން ފަތުރުވެރިންގެ ވިސާގެ މުއްދަތު އިތުރު ކުރަނީ 90 ދުވަހަށް
3 މާރިޗު 2022 | ބުރާސްފަތި 06:5590 ދުވަސް ގުނަން ފަށާނީ އެ ފަތުރުވެރިޔަކު ރާއްޖެ އައި ތާރީހުން ފެށިގެން
ފަތުރުވެރިން އިބްރާހިން ނާސިރު އިންޓަރނޭޝަނަލް އެއަރޕޯޓުގައި
ރާއްޖޭގައި ތިބި ޔޫކްރެއިންގެ ފަތުރުވެރިންގެ ވިސާގެ މުއްދަތު އިތުރު ކުރަން ނިންމާފައިވަނީ 90 ދުވަހަށް ކަމަށް މޯލްޑިވްސް އިމިގްރޭޝަން ބުނެފިއެވެ.
ރާއްޖޭގައި ތިބި ޔޫކްރެއިންގެ ފަތުރުވެރިންނަށް ވިސާ އިތުރުކުރުމުގެ ފުރުސަތު ސަރުކާރުން ހުޅުވާލީ ރަޝިޔާ އާއި ޔޫކްރެއިންއާއި ދެމެދު ހިނގަމުންދާ ހަނގުރާމައިގެ ސަބަބުން ޤައުމަށް އެނބުރި ނުދެވިފައި ގިނަ ޢަދަދެއްގެ ފަތުރުވެރިން ތިބުމާ ގުޅިގެންނެވެ.
އިމިގްރޭޝަނުން ބުނީ އެ 90 ދުވަސް ގުނަން ފަށާނީ އެ ފަތުރުވެރިޔަކު ރާއްޖެ އައި ތާރީހުން ފެށިގެން ކަމަށެވެ. ރަޝިޔާއިން ރާއްޖެއަށް ދަތުރުތައް ކުރިނަމަވެސް ޔޫކްރެއިނާއި ރާއްޖެއާއި ދެމެދު ކުރަމުންދިޔަ ދަތުރުތައް ވަނީ ވަގުތީގޮތުން މެދުކަނޑާލާފައެވެ.
މި ވިސާއަށް އެދި ހުށަހަޅަން ޖެހޭނީ މިހާރު ދޫކޮށްފައިވާ ވިސާ ހަމަވުމުގެ ކުރިން އިމިގްރޭޝަންގެ އިމުގާ ޕޯޓަލް މެދުވެރިކޮށް ކަމަށް އިމިގްރޭޝަނުން ބުނެއެވެ. ރާއްޖޭގައި މިވަގުތު ގާތްގަނޑަކަށް ރަޝިއާގެ 8000 ފަތުރުވެރިން އަދި ޔޫކްރެއިންގެ 750 ފަތުރުވެރިން އެބަތިބި ކަމަށާއި އެ ފަތުރުވެރިންގެ ހާލަތު ކައިރިން ބަލަމުންދާ ކަމަށް ޓޫރިޒަމް މިނިސްޓްރީން ވަނީ ބުނެފައެވެ.
ޓޫރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވީ، ރާއްޖޭގައި އޮޕަރޭޓްކުރަމުންދާ ހުރިހާ ޓޫރިސްޓް ފެސިލިޓީތަކަށް, އެތަނުގައި ތިބި ރަޝިޔާއާއި ޔޫކްރެއިންގެ ފަތުރުވެރިންގެ އަދަދާއި އެމީހުން ފުރުމަށް ހަމަޖެހިފައިވާގޮތް ޓޫރިޒަމް މިނިސްޓްރީއަށް އަންގަން އެދިފައިވާނެ ކަމަށެވެ. އަދި އެ މައުލޫމާތުތައް މިހާރު މިނިސްޓްރީއަށް ލިބެމުންދާކަމަށެވެ. ރަޝިޔާއާއި ޔޫކްރެއިންއަކީވެސް ރާއްޖެއިން އޮން އެރައިވަލް ވީސާ ދޭ ދެ ގައުމެވެ.
ރަޝިޔާއަކީ މިދިޔަ އަހަރު ރާއްޖެއަށް 2 ވަނައަށް އެންމެ ގިނަ ފަތުރުވެރިން އައި ގައުމެވެ. އަދި ޔޫކްރެއިނަކީ އަހަރުގެ މިހާތަނަށް 8 ވަނައަށް ރާއްޖެއަށް އެންމެ ގިނަ ފަތުރުވެރިން އައި ގައުމެވެ. މި ދެ ގައުމުން ވެސް ގިނަ އަދަދެއްގެ ފަތުރުވެރިން ރާއްޖެ އަންނައިރު, މި ހަނގުރާމައިގެ ސަބަބުން ރާއްޖޭގެ ފަތުރުވެރިކަމަށްވެސް އަސަރުކުރާނެކަމަށް ވަނީ ބެލެވިފައެވެ.
