ރަޝިޔާއިން ދިން ރޮކެޓް ހަމަލާގައި ޔޫކްރެއިންގެ 70 ސިފައިން މަރާލައިފި، ރަޝިޔާއިން ކިޔެވްގެ އެތެރެއަށް ޖެހިލައިފި

ރަޝިޔާއިން ޔޫކްރެއިނަށް ދިން ރޮކެޓް ހަމަލާގައި ޔޫކްރެއިން ސިފައިންގެ 70 މީހުން މަރުވެއްޖެކަމަށް ޔޫކްރެއިނުން ބުނެފިއެވެ.

ހަނގުރާމައިގެ ހަވަނަ ދުވަސް ހިނގަމުންދާއިރު ރަޝިޔާގެ އަސްކަރިއްޔާގެ ފައުޖުތައް އަންނަނީ ޔޫކްރެއިންގެ ވެރިރަށް ކިޔެވްއާ ކައިރިވަމުންނެވެ. ދެވަނަ ބޮޑު ހަނގުރާމައަށްފަހު ޔޫރަޕްގައި ކުރިޔަށްދާ އެންމެ ވަރުގަދަ ހަނގުރާމާގައި މިހާތަނަށް ޔޫކްރެއިންގެ ފައުޖުތަކުން ވަނީ ރަޝިޔާގެ އަސްކަރިއްޔާ ހިފަހައްޓާފައެވެ. މާހިރުންދެކޭ ގޮތުގައި ޔޫކްރެއިންގެ ތެރެއިން ރަޝިޔާއަށް އެވަރުގެ ހަމަލާތަކެއް އަތުވެދާނެކަމަށް ރަޝިޔާގެ ރައީސް ވްލަޑްމިއަރ ޕުޓިން ހީފުޅެއްނުކުރައްވައެވެ.

އަނެއްކޮޅުން ސެޓެލައިޓް ފޮޓޯތަކުން ފެންނަގޮތުގައި ކިޔެވް ކައިރީގައި ރަޝިޔާ އަސްކަރިއްޔާއިން ވަނީ 40 މޭލުގެ ދިގު ސަފެއް ހަދާފައެވެ. ކުރިން ބެލެވިފައިވަނީ މި ސަފުގެ ދިގުމިނަކީ 23 މޭލުކަމަށެވެ.

އިނގިރޭސިވިލާތުގެ އިންޓެލިޖެންސުން އަންގާރަ ދުވަހު ބުނީ, ރަޝިޔާގެ އަސްކަރިއްޔާއިން ފާއިތުވި 24 ގަޑިއިރު ކިޔެވްގެ ތެރެއަށް ވަނުމުގައި ކޮންމެސް ވަރެއްގެ ކާމިޔާބީއެއް ހޯދާފައިވާކަމަށެވެ. އަނެއްކޮޅުން ރަޝިޔާގެ އަސްކަރިއްޔާއިން ގެންދަނީ ޔޫކްރެއިންގެ އާބާދީ ބޮޑު ސިޓީތަކަށް އަމާޒުކޮށް ވައިގެ ގިނަ ހަމަލާތަކެއް އަމާޒުކުރަމުންނެވެ. އެގޮތުން ޚާރްކީވްއަށް އަމާޒުކޮށް ހަމަލާތައް ދެމުންދާއިރު, އާންމުންނަށް އަމާޒުކޮށް އަންނަނީ ހަމަލާތައް ދެމުންކަމަށް ޔޫކްރެއިނުން ބުނެއެވެ.

އެގޮތުން ރަޝިޔާއިން ދިން ހަމަލާތަކުގައި ޚާރްކީވްއާ ކިޔެވްއާ ދެމެދު އޮންނަ ޓައުނެއް ކަމަށްވާ އޮކްޓިޔަރްކާގައި ތިބި ޔޫކްރެއިން ސިފައިންގެ 70 މީހަކު މަރާލާފައިވާކަމަށް އެސަރަހައްދުގެ ގަވަރުނަރު ވަނީ ފޭސްބުކްގައި ކުރެއްވި ޕޯސްޓެއްގައި ވިދާޅުވެފައެވެ.

ޔޫކްރެއިންގެ ޖެނެރަލް ސްޓާފް ވިދާޅުވީ ރަޝިޔާގެ އަސްކަރިއްޔާގެ 5710 މީހުން މަރާލާފައިވާކަމަށާއި, 198 ޓޭންކް ހަލާކުކޮށްލާފައިވާކަމަށެވެ. ނަމަވެސް މި އަދަދުތަކަކީ ސައްހަ އަދަދުތަކެއްކަން އަމިއްލައަށް ކަށަވަރު ކުރެވޭނެ އެއްވެސް ގޮތެއް ނޯވެއެވެ.

ހަނގުރާމަ ހުއްޓާލުމުގެ ވާހަކަތައް ރަޝިޔާއާއި ޔޫކްރެއިނުން ފަށާފައިވާއިރު, ވާހަކަތަކުގެ ފުރަތަމަ ބުރު ނިންމާލާފައިވަނީ އެއްވެސް ކޮޅެއްގައި ނުޖެހިއެވެ. ވާހަކަތަކުގެ ދެވަނަ ބުރެއް ވަރަށް އަވަހަށް ފެށޭނެކަމަށް ބެލެވެއެވެ.

އަނެއްކޮޅުން ޕުޓިންއަށް ވަނީ ދަތިކުރުމުގެ ފިޔަވަޅުތަކާ ކުރިމަތިލައްވަން ޖެހިވަޑައިގެންފައެވެ. އެމެރިކާއާއި އެމެރިކާގެ ބައިވެރިން ވަނީ, ޕުޓިންއާއި, ރަޝިޔާގެ ބޮޑެތި ވިޔަފާރިވެރިންނާއި، ބޭންކުތަކާއި އަދި ވަކިވަކި އޮފިޝަލުންނާ ދެކޮޅަށް ދަތިކުރުމުގެ ފިޔަވަޅުތައް އަޅާފައެވެ. އަނެއްކޮޅުން ސްވިފްޓް ޕޭމަންޓުން ވަނީ ރަޝިޔާގެ ބައެއް ބޭންކުތައް އުނިކޮށްފައެވެ.

އދ.ން އަންދާޒާކުރާ ގޮތުގައި މިހާރުވެސް ޔޫކްރެއިންގެ ފަސް ލައްކަ މީހުން ވަނީ ރެފިޔުޖީންގެ ގޮތުގައި އެކި ގައުމުތަކަށް ހިޖުރަކޮށްފައެވެ.