ޕީޕީއެމްގެ ޓިކެޓްގައި ގާސިމް ނުނިކުންނަވާނެ: ޖޭޕީ

ޕީޕީއެމްގެ ޓިކެޓެއްގައި ޖުމްހޫރީ ޕާޓީގެ ލީޑަރު ގާސިމް އިބްރާހީމް ވެރިކަމަށް ވާދަނުކުރައްވާނެކަމަށް އެޕާޓީން ބުނެފިއެވެ.

އެ ޕާޓީން މިހެން ބުނެފައިވަނީ ގާސިމަށް ދޭނެ ފުރުސަތެއް ނެތް ކަމަށާއި 2023 އަށް ޕީޕީއެމުން ކެންޑިޑޭޓަކު ދައްކާނެ ކަމަށް ކުރީގެ ރައީސް އަބްދުﷲ ޔާމީން އިއްޔެ ވިދާޅުވި ވިދާޅުވުމާއި ގުޅިގެންނެވެ. ޖޭޕީން ބުނީ ގާސިމް އިބްރާހިމަށް ފާޑުވިދާޅުވާން ކުރީގެ ރައީސް އަބްދުﷲ ޔާމީނަށް ކެރިވަޑައިގެންނެވީތީ ހައިރާންވާ ކަމަށެވެ.

Advertisement

ޖޭޕީން ބުނީ ރައީސް ޔާމީންގެ ވެރިކަން ފުރިހަމަ ވޯޓަކުން ބަދަލުވެގެން ދިޔައީ ގާސިމް އިބްރާހިމްގެ އެއްބާރުލުމާއެކު ކަން އެއީ ފެންނަން އޮތް ހަގީގަތް ކަމަށެވެ. އަދި ރައީސް ޔާމީނަށް 2013 ގައި ވެރިކަން ލިބިވަޑައިގަތީވެސް ގާސިމްގެ ތާއީދާއި އެއްބާރުލުން ލިބިވަޑައިގަތުމުން ކަމަށެވެ.

އަދި ރައީސް ޔާމީން އިސްވެ ހުންނަވާ ގާސިމް އިބްރާހިމަށް ފާޑުވިދާޅުވާން ފެއްޓެވީ އެމަނިކުފާނަށް ރައްޔިތުންގެ މެދުގައި އޮތް ތާއީދު ފެނިވަޑައިގަތުމުން ކަމަށާއި އެކަމާއި ހައިރާން ނުވާ ކަމަށެވެ. ވެރިކަން ހޯދަން ކޯލިޝަން ހަދަން ޖުމްހޫރީ ޕާޓީއާއެކު މަސައްކަތް ކުރަނީ އެހެން ޕާޓީތަކުން ކަމަށާއި އެހެން ކަމުން ޕީޕީއެމްގެ ޓިކެޓްގައި ގާސިމް ރިޔާސީ ރޭހަށް ނިކުމެވަޑައިނުގަންނަވާނެ ކަމަށެވެ. އަދި ޕީޕީއެމް ދޫކޮށް ޖުމްހޫރީ ޕާޓީ އާއި ގުޅުނު މެންބަރުންނަށް ރައީސް ޔާމީން ފާޑުވިދާޅުވަނީ އެ މެންބަރުންގެ ކޮލެޓީ އެނގިވަޑައިގަންނަވާތީ ކަމަށްވެސް ޖުމްހޫރީ ޕާޓީން ބުނިއެވެ.

ޔާމީން ވިދާޅުވެފައިވަނީ 2023 އަށް ޕީޕީއެމުން ކެންޑިޑޭޓަކު ދައްކާނެ ކަމަށެވެ. އަދި ޕީޕީއެމުން ގާސިމަށް ތަނަވަސް ކޮށްދޭނެ ފުރުސަތެއް ނެތް ކަމަށް ވިދާޅުވިއެވެ. ރިޔާސީ އިންތިހާބަށް ޕީޕީއެމުން ކެންޑިޑޭޓަކު ނުނެރޭނެ ކަމަށާއި އެންމެ ފަހު ވަގުތު ޕީޕީއެމްގެ ތާއީދު ލިބޭނީ ގާސިމް އިބްރާހިމަށް ކަމަށް ބައެއް ބޭފުޅުން ރައްޔިތުން ކައިރީ ބުނަމުންދާ ކަމަށާއި ނަމަވެސް އެއީ ރައްޔިތުންނަށް އޮޅުވާލުމަށް ދައްކަމުންދާ ދެކޮޅު ނުޖެހޭ ވާހަކަތަކެއް ކަމަށް ރައީސް ޔާމީން ވިދާޅުވިއެވެ. ޔާމީން ވިދާޅުވީ ޕީޕީއެމުން ނެރޭނެ ރިޔާސީ ކެންޑިޑޭޓުން އެބަތިބި ކަމަށާއި ގާސިމަށް ތަނަވަސްކޮށްދޭނެ ފުރުސަތެއް ނޯންނާނެ ކަމަށެވެ.