މުސްލިމުންގެ ގިނަ ބަޔަކަށް ޤުދުސްގެ ނަން މެނުވީ ނޭނގޭ، އެކަން ބަދަލުކުރަން ޖެހޭ: ޚުތުބާ
25 ފެބުރުއަރީ 2022 | ހުކުރު 08:07މާތްﷲގެ ތައުހީދު އެންމެ ފުރަތަމަ ދެނެގަތް ރަށަކީ މައްކާ، ދެވަނަ ރަށަކީ ޤުދުސް
ހުކުރު ނަމާދުކުރުމަށް އިސްލާމީ މަރުކަޒުގައި ޖަމާއަތް ހަދައިގެން
ޤުދުސްގެ މަސްއަލައަކީ އިސްލާމްދީނާއި ވަކިނުކުރެވޭނެ މައްސަލައެއް ނަމަވެސް މިއަދު މުސްލިމުންގެ ގިނަ ބަޔަކަށް ޤުދުސްގެ ނަން މެނުވީ ނޭނގޭ ކަމަށާއި، އެކަން ބަދަލުކުރަން ޖެހޭ ކަމަށް ހުކުރު ޚުތުބާގައި ބުނެފިއެވެ.
''ބައިތުލް މަޤްދިސަކީ މުޤައްދަސް ބިމެއް'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ މާތްﷲގެ ތައުހީދު، އެންމެ ފުރަތަމަ ދެނެގަތް ރަށަކީ މާތްވެގެންވާ މައްކާ ކަމަށާއި، ދެވަނަ ރަށަކީ ޤުދުސް ކަމަށެވެ. އެއީ މުސްލިމުންގެ ފުރަތަމަ ޤިބްލަކަން ފާހަގަކޮށް ޚުތުބާގައި ބުނީ އެއީ މުސްލިމުންގެ އެންމެ ހުރުމަތްތެރި ތިން މިސްކިތުގެ ތެރެއިން އެއް މިސްކިތް ކަމަށެވެ.
ޚުތުބާގައި ބުނީ ކާފިރުން އަރައި އެބިން ފޭރިގެންފިނަމަ އެބިމުގެ އަހުލުވެރިންގެ ކެކުޅުންތަކަށާއި، ގިސްލުންތަކަށާއި، ރުއިންތަކަށް އިޖާބަދޭން ޖެހޭ ކަމަށާއި، އެބިން މިނިވަން ކުރުމަށް އެންމެހައި މުސްލިމުން އެކަތިގަނޑަކަށްވެ، މަސައްކަތް ކުރަންޖެހޭ ކަމަށެވެ. އެ ބިމުގައި ދާވޫދުގެ ފާނާއި ސުލައިމާނުގެފާނު ބިނާކުރެއްވި ހައިކަލު ހޯދުމުގެ ނަމުގައި މިއަދު އިސްރާއީލުން އަލްމަސްޖިދުލް އަޤްސާގެ ވަށައިގެން ކޮންނަމުންދާ ދިޔުމަކީ މި މާތް ހަރަމްފުޅު ނެތިކޮށްލުމުގެ ނުބައި ނިޔަތުގައި ބައިނަލްއަގުވާމީ ހުރިހާ ގަރާރުތަކަކަށް ގޮންޖަހަމުން ކުރިއަށް ގެންދާ މަޝްރޫއެއް ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ ޤުދުސްގެ މައްސަލައަކީ އިސްލާމްދީނާއި ވަކިނުކުރެވޭނެ މައްސަލައެއް ކަމަށެވެ. ނަމަވެސް މިއަދު މުސްލިމުންގެ ގިނަ ބަޔަކަށް، ޤުދުސްގެ ނަން މެނުވީ ނޭނގޭ ކަމަށާއި، މިކަން ބަދަލުކުރަން ޖެހޭ ކަމަށް ޚުތުބާގައި ބުނެފައިވެއެވެ. އެހެންކަމުން ފަލަސްޠީނު މައްސަލައިގެ ހަގީގަތް ވީހާވެސް ގިނަ ބަޔަކަށް އަންގައިދީ އެ މައްސަލައިގެ ސާފު މައުލޫމާތު މީޑިއާ މެދުވެރިކޮށް ފޯރުކޮށް ދިނުމަށް ޚުތުބާގައި ގޮވާލާފައިވެއެވެ.
ޚުތުބާގައި ބުނީ މުސްލިމުންގެ އެއްބައިވަންތަކަމާއި އެކުވެރިކަން ނެތުމުގެ ސަބަބުން، މިއަދު ފެންނަމުންދަނީ ޔަހުދީންގެ ހީލަތްތެރިކަމުން ދުނިޔޭގެ އެތަންމިތާނގައި އުޅޭ ޔަހޫދީން ފަލަސްތީނުގެ ބިމަށް ގެންގޮސް ވަޒަންވެރި ކުރުވާތަން ކަމަށާއި، ހުޅަނގުގެ ގައުމުތަކުގެ އެހީގައި ހަތިޔާރާއި ތަމްރީނު ހޯދައި ޔަހޫދީން ފަލަސްތީނުގެ ބިމަށް އެއްކުރާތަން ކަމަށެވެ. ފަލަސްތީނުގެ މީހުންނާއި ދެކޮޅަށް އިސްރާއީލުން ހިންގާ ލާއިންސާނީ އަމަލުތަކަކީ ނަސްލު ނައްތައިލުމުގެ ހަނގުރާމައެއް ކަމަށް ޚުތުބާގައި ބުނެފައިވެއެވެ. އެކި ސިފަސިފައިގައި ހަނގުރާމަ ކުރަމުންދާއިރު، ނަމާދަށް ނުދެވޭ ގޮތަށް ފަލަސްތީނުގެ މިސްކިތްތައް ހިސާރުކުރުމާއި އެމީހުން ބަނޑަށް ޖައްސައި ކަނު އަނދިރީގައި ބައިތިއްބުމާއި ސާފު ބޯފެނުން މަޚްރޫމް ކުރުމާއި، ފާހާނާކުރެވޭނެ ވަސީލަތްތައް ހާލާކުކޮށް މުވާސަލާތީ ވަސީލަތްތަކާއި އާސާސީ ޚިދުމަތްތަކުން މަހްރޫމު ކުރުމާއި، ޖަމާޢީ އަދަބު ތަންފީޒު ކުރުން ހިމެނޭ ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ އިސްރާއީލުން ވަނީ މުސްލިމުން އަލްމަސްޖިދުލް އަޤްޞާއަށް ވަނުމަށް ވަކި ވަގުތުތަކެއް ކަނޑައަޅައި، ޙައްދުފަހަނަޅާފައިވާ ޔަހޫދީ ޖަމާއަތްތަކަށް ބޭނުންއިރަކު، މި މިސްކިތަށް ވަދެ، އެތާނގައި އަޅުކަން ކުރުމުގެ ހުއްދަ ދީފައި ކަމަށެވެ. މުސްލިމުން އަލް މަސްޖިދުލް އަޤްޞާއަށް ވަންނައިރު، ބަލައި ފާސްކުރުމަށް، ކެމެރާތަކާއި އިލެކްޓްރޯނިކް ދޮރާށިތައް ބަހައްޓާފައިވާކަން ފާހަގަކޮށް ޚުތުބާގައި ބުނީ ބައިނަލްއަގްވާމީ ހުރިހާ ގަރާރުތަކެއް ބުނާ ގޮތުގައި، މުސްލިމުންނަށް އަލް މަސްޖިދުލް އަޤްޞާއަށް ބޭނުން ވަގުތަކު ވަދެވެން ޖެހޭނެ ކަމަށެވެ.
ޔަހޫދީންނަށް އަލް މަސްޖިދުލް އަޤްޞާގެ ބައެއް ސަރަޙައްދުތަކަށް ވަނުމުގެ ހުއްދަ އޮތަސް، އެ ތަންތާނގައި ޔަހޫދީންނަށް އެމީހުންގެ ދީނީ އެއްވެސް ޝިއާރެއް ފާޅެއް ނުކުރެވޭނެ ކަމަށް ޚުތުބާގައި ބުނެފައިވެއެވެ. އަދި ޤުދުސްގެ ރައްޔިތުން މިކަންކަމާއި ދެކޮޅު ހަދައި އިހްތިޖާޖު ކުރަން ފެށުމުން އިސްރާއީލު ސިފައިން އެ މީހުންނާއި ދެކޮޅަށް ހަރުކަށި ބާރު ބޭނުން ކުރަމުންދާ ކަމަށާއި، މިކަމުގެ ސަބަބުން، ފަލަސްޠީނުގެ އެތައް ބަޔަކު ޝަހީދުވެ އެތައް ސަތޭކަ ބަޔަކު ޒަޚަމުވެފައިވާކަން ޚުތުބާގައި ފާހަގަކޮށްފައެވެ.
