ގދ. ތިނަދޫއަށް ފޮނުވާ ޑޮކްޓަރުން ފިލާ މައްސަލަ ބޮޑުވެ އިމިގްރޭޝަންގެ އެހީތެރިކަމަށް އެދެފި
މިނިސްޓަރ ވިދާޅުވީ އެމީހުން ފިލައިގެން ދިޔުމުގެ ކުރިން އެނގޭނަމަ ހުއްޓުވޭނެކަމަށް
ގދ. ތިނަދޫ
ގދ ތިނަދޫއަށް ފޮނުވާ ޑޮކްޓަރުން ފިލާ މައްސަލަ ބޮޑުވެފައިވާކަމަށާއި އެކަމާއި ގުޅިގެން އިމިގްރޭޝަނާއި ވާހަކަދައްކާފައިވާކަމަށް ހެލްތު މިނިސްޓަރު އަހުމަދު ނަސީމް ވިދާޅުވެއްޖެއެވެ.
ތިނަދޫ ހޮސްޕިޓަލަށް ފޮނުވާ ޑޮކްޓަރުން "ހަރުލާނެ ކަހަލަ އިންތިޒާމެއް ހަމަޖެއްސޭނެތޯ" ބެއްލެވުމަށް ތިނަދޫ އުތުރު ދާއިރާގެ އެމްޑީޕީގެ މެމްބަރު އަބްދުލް މުޣުނީ މިނިސްޓަރު އަރިހުން ބުދަ ދުވަހު އޮތް ރައްޔިތުންގެ މަޖިލީހުގެ ޖަލްސާގައި އެއްސެވުމުން މިނިސްޓަރު ވިދާޅުވީ ދާދިފަހުންވެސް ތިނަދޫ ހޮސްޕިޓަލަށް ހޭނައްތާ 5 ޑޮކްޓަރުން ފޮނުވިކަމަށެވެ. އެހުރިހާ ޑޮކްޓަރުންވެސް ފިލާފައިވާކަމަށް މިނިސްޓަރު ވިދާޅުވިއެވެ.
ފިލައިގެން ދަނީ ކިހިނެއްކަން އެނގިވަޑައިނުގަންނަވާކަމަށާއި އެތަނަށް ޑޮކްޓަރުން ވަރަށް ގިނައިން ފޮނުވާކަމަށް މިނިސްޓަރު ވިދާޅުވިއެވެ. އަދި އެތާންގައި ޑޮކްޓަރުން ހިފެހެއްޓޭނެ ގޮތެއް ބައްލަވައިދެއްވުމަށް މިނިސްޓަރު ވަނީ މެމްބަރުގެ އަރިހުން އެދިވަޑައިގަންނަވާފައެވެ. މިނިސްޓަރު ވިދާޅުވީ އެމީހުން ފިލައިގެން ދިޔުމުގެ ކުރިން އެނގޭނަމަ ހުއްޓުވޭނެކަމަށެވެ.
މިނިސްޓަރު ވިދާޅުވީ މީގެފަހުން ދެން އެގޮތަށް ފިލައިގެން ޑޮކްޓަރުންނަށް ނުދެވޭނެކަމަށެވެ. ހުއްދަ އާއި ނުލާ އެގޮތަށް ދާނަމަ އެކަން އިމިގްރޭޝަނުން އަންގާނެކަމަށް މިނިސްޓަރު ވިދާޅުވިއެވެ.
އެކަށީގެންވާ ވަރަށް ސްޕެޝަލިސްޓް ޑޮކްޓަރުން ނުލިބޭކަމުގެ ޝަކުވާ ބޮޑުވެފައިވާއިރު ޑޮކްޓަރުން ފިލާ މައްސަލަ މިހާބޮޑަށް ސަރުކާރުން ފެންމަތި ކުރީ މިއީ ފުރަތަމަ ފަހަރެވެ.
