ހުވާކުރާ މަޖިލީހުގައި ބައިވެރިވެ، ހުވާކުރުމަށް އެމަޖިލީހުގައި އިންކާރުކޮށްފައި ނުވާނަމަ ބަލަން ޖެހޭނީ ހުވާކުރި މީހެއްގެ ގޮތުގައި: ކުރީގެ އުއްތަމަ ފަނޑިޔާރު
14 އޯގަސްޓު 2025 | ބުރާސްފަތި 07:47ފުލުހަކު އޭނާގެ ވަޒީފާގެ ހުވާ ނުކުރާ ކަމަށް ބުނާ މައްސަލައެއް ވަނީ ފެންމަތިވެފައި
ފުލުހުންގެ ޚިދުމަތާއި އަލަށް ގުޅުނު ފުލުހުން ހުވާކުރަނީ- ފައިލް ފޮޓޯ
ޖަމާއަތުގައި ހުވާކުރާ މީހުން ހުވާކުރާ މަޖިލީހުގައި ބައިވެރިވެ، ހުވާކުރުމަށް އެމަޖިލީހުގައި އިންކާރުކޮށްފައި ނުވާނަމަ ބަލަން ޖެހޭނީ ހުވާކުރި މީހެއްގެ ގޮތުގައި ކަމަށް ކުރީގެ އުއްތަމަ ފަނޑިޔާރު އަޙްމަދު ފާއިޒު ވިދާޅުވެއްޖެއެވެ.
ކުރީގެ އުއްތަމަ ފަނޑިޔާރު މިހެން ވިދާޅުވީ ފުލުހަކު އޭނާގެ ވަޒީފާގެ ހުވާ ނުކުރާ ކަމަށް ބުނާ މައްސަލަ ފެންމަތިވެފައިވާ ދަނޑިވަޅެއްގައެވެ. މިމައްސަލާގައި ވަރަށް ބޮޑަށް ފާޑުކިޔުންތައް އަމާޒުވެފައިވާއިރު، ދައުލަތުގެ ހުވާކުރަންޖެހޭ މަގާމުތަކާއި ވަޒީފާތަކުގެ އުސޫލުތައް ހަރުދަނާކުރަން ފިޔަވަޅުތަކެއް އަޅަން ޖެހޭ ހައި ކޯޓުން ބުނެފައިވެއެވެ.
މި މައްސަލައާ ގުޅިގެން ކުރީގެ އުއްތަމަ ފަނޑިޔާރު ފާއިޒު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ ޖަމާއަތުގައި ހުވާކުރާ މީހުން ހުވާކުރާ މަޖިލީހުގައި ބައިވެރިވެފައި ވާނަމަ އަދި ހުވާކުރުމަށް އެ މަޖިލީހުގައި އިންކާރުކޮށްފައި ނުވާނަމަ، ޟިމްނީ ގޮތެއްގައި ބަލަން ޖެހޭނީ ކޮންމެ މީހަކީވެސް ހުވާކުރި މީހެއް ގޮތުގައި ކަމަށެވެ. އަދި ރައްޔިތުންގެ މަޖިލީހަކީ ވެސް ޖަމާޢީ ގޮތެއްގައި ހުވާކުރާ މީހުން ތިބޭ މަޖިލީހެއް ކަމަށެވެ.
ހުވާއަކީ ލައިދޭ ކަމެއްކަން ފާހަގަކުރައްވައި ކުރީގެ އުއްތަމަ ފަނޑިޔާރު ފާއިޒު ވިދާޅުވީ އިތުރަށް ފުރިހަމަ ކޮށްލަން ބޭނުންވާނަމަ، ހުވާ ލައިދިނުމުގެ ކުރިން، އިންކާރު ކުރާ މީހެއް ހުރިތޯ ސުވާލުކޮށްލުން ރަނގަޅު ކަމަށެވެ.
ގދ. ތިނަދޫގައި ހިނގި ވޭޕު މައްސަލައެއްގައި ހައްޔަރުކުރި ފުލުހުންގެ ސްޕެޝަލް ކޮންސްޓަބަލްއެއް އެ މަގާމަށް ހުވާކޮށްފައި ނުވާކަމަށް ޝަރިއަތުގެ އަޑު އެހުމުގައި އޭނާ ވަނީ ބުނެފައެވެ. ޝަރީއަތުގެ މަޖިލީހުގައި އިތުރަށް ބުނެފައިވަނީ ވަޒީފާގެ ހުވާ ލައިދޭ މަޖިލީހުގައި ބައިވެރިވިކަމަށާއި، ހުވާ ލައިދިން ވަގުތުގައި ހުވާ ނުކިޔާކަމަށެވެ.
ކޯޓު އަމުރެއްގެ ދަށުން ޖުލައި މަހުގެ 11 ވަނަ ދުވަހު ހައްޔަރުކުރީ ތިނަދުއަށް ނިސްބަތްވާ މުހައްމަދު ސާޖިދެވެ.
