ތިނަދޫ ކައުންސިލް މެމްބަރު ޒަލީފުގެ ގޮނޑިގެއްލިދާނެ ކަމަށް ބެލެވޭ ކަމަށް ބަންޑާރަނައިބު ލަފާދެއްވައިފި
12 އޯގަސްޓު 2025 | އަންގާރަ 13:29ތިނަދޫ ކައުންސިލްގެ މެމްބަރު އަހުމަދު ޒަލީފުގެ ގޮނޑި ގެއްލިދާނެ ކަމަށް ބަންޑާރަ ނައިބުގެ އޮފީހުން ލަފާދީފައި ވަނީ އެލްޖީއޭގެ ސިޓީގެ ޖަވާބުގަ
ތިނަދޫ ސިޓީ ކައުންސިލުން ބޭއްވި ބައްދަލުވުމެއްގެ ތެރެއިން: ކައުންސިލް މެމްބަރު ޒަލީފުގެ ގޮނޑި ގެއްލިދާނޭކަމަށް ބަންޑާރަނައިބު ވަނީ ލަފާދެއްވާފަ
ގދ. ތިނަދޫ ކައުންސިލްގެ މެމްބަރު އަހުމަދު ޒަލީފުގެ ގޮނޑި ގެއްލިދާނޭ ކަމަށް ބަންޑާރަ ނައިބުގެ އޮފީހުން ލަފާދެއްވައިފި އެވެ.
ބަންޑާރަ ނައިބުގެ އޮފީހުން މި ލަފާދީފައިވަނީ ލޯކަލް ގަވަރމެންޓް އޮތޯރިޓީ (އެލްޖީ) އިން ޒަލީފުގެ ސާބިތު ދަރަންޏެއް އޮތް ކަމަށް ބުނާ މައްސަލައިގެ އެންކުއަރީއެއް ހެދުމަށް ފަހު އެކަމަށް ލަފަޔަށް އެހުމަށް ބަންޑާރަނައިބުގެ އޮފީހަށް ފޮނުވި ސިޓީގެ ޖަވާބުގަ އެވެ.
އެލްޖީއޭއިން ބަންޑާރަނައިބުގެ އޮފީހަށް ފޮނުވި ސިޓީގައި ވަނީ ތިނަދޫ ސިޓީ ކައުންސިލްގެ އިންކުއަރީގައި ފާހަގަކުރެވިފައިވާ ތިނަދޫ ސިޓީ ކައުންސިލުގެ މެމްބަރު މުހައްމަދު ޒަލީފު އަބްދުﷲ ގެ ސާބިތު ދަރަނީގެ މައްސަލައާއި ގުޅިގެން ބަންޑާރަނައިބުގެ ލަފާފުޅަކަށް ފޮނުވުމުން މެމްބަރު ޒަލީފުގެ ގޮނޑި ގެއްލޭނެ ހާލަތަށް ގާނޫނު ނަމްބަރު 7/2010 (ދިވެހިރާއްޖޭގެ އިދާރީ ދާއިރާތަށް ލާމަރުކަޒީ އުސޫލުން ހިންގުމުގެ ގާނޫން) ގެ 116 ވަނަ މާއްދާގެ (ނ) ގައި މެމްބަރެއްގެ ކިބައިގާ ހުރުން ލާޒިމް ކުރާ ސިފައެއް އުނިވުން ކަމަށް ބަޔާންކޮށްފައިވާ ކަމަށެވެ.
އަދި ލޯކަލް ކައުންސިލްތަކުގެ ގާނޫނުގެ، އިންތިޚާބުގެ ގާނޫނުގެ 12 ވަނަ މާއްދާގައި އަދާކުރަން ޖެހޭ ސާބިތު ދަރަންނެއް އޮތް މީހަކު ނަމަ، ހުކުމާއި އެއްގޮތަށް އެ ދަރަނި އަދާކުރަމުންދާ މީހަކުކަމުގައި ވުން ކަމަށް ބަޔާން ކުރައްވާފައިވާ ކަން ފާހަގަކުރައްވާފައި ވެއެވެ. އެހެން ކަމުން މެމްބަރު ޒަލީފުގެ ގޮނޑި ގެއްލިއްޖެ ކަމަށް ކަނޑައެޅިދާނެ ކަމަށް ލަފާދީފައި ވާކަމަށް ވެސް އެލްޖީއޭގެ ސިޓީގައި ވަނީ ފާހަގަކޮށްފަ އެވެ.
މެމްބަރު ޒަލީފުގެ ކިބައިގާ ކައުންސިލް މެމްބަރެއްގައި ހުންނަން ޖެހޭ ޝަރުތުން ޝަރުތެއް އުނިވެފައިވާކަމަށް ބަންޑާރަނައިބުގެ އޮފީހުން ލަފާދީފައިވާތީ އެ ލަޔާއި އެއްގޮތަށް ޒަލީފުގެ ގޮނޑިއާއި މެދު ގޮތެއް ނިންމުމަށް އެލްޖީއޭއިން ތިނަދޫ ސިޓީ ކައުންސިލުގައި ވަނީ އެދިފަ އެވެ. އަދި ހަތް ދުވަހުގެ ތެރޭގައި އެ ކައުންސލުން މިކަމަށް ވަކި ގޮތެއް ނިންމަން ޖެހޭކަމަށް ވެސް އެލްޖީއޭގެ ސިތީގައި ބުނެފައިވެ އެވެ.
އެލްޖީއޭގެ މި ސީޓީއަށް ޖަވާބުދާރީވުމަށް ތިނަދޫ ސިޓީ ކައުންސިލުން ނިންމި ނިމުމުގައި ބުނެފައިވަނީ ކައުންސިލް މެމްބަރު ޒަލީފުގެ މައްޗަށް ސާބިތު ދަރަންޏެއް އޮތުމުން ތިނަދޫ މެޖިސްޓްރޭޓް ކޯޓުން ހުކުމެއް ކޮށްފައިވާ ކަމަށާއި އެ ހުކުމަކީ ތިނަދޫ ސިޓީ ކައުންސިލްގެ މައްޗަށް ޒަލީފުގެ މުސާރައިން މަހަކު 23735.29 ދެއްކުމަށް ކުރި ހުކުމް ކަމަށެވެ.
އަދި މި ހުކުމާއި ގުޅިގެން ޒަލީފުގެ މުސާރައިން އުނިކުރެވޭ ފައިސާ ހުކުމާއި އެއްގޮތަށް ކައުންސިލުން ދަކަމުން ގެންދާތީ އޭނާގެ ގޮނޑި ގެއްލިފައިވާ ކަމަށް ކަނޑައެޅުމަކީ އެ ކައުންސިލްގެ މެންޑޭޓުގައި ހިމެނޭ ކަމެއް ކަމަށް ގަބޫލު ނުކުރައްވާ ކަމަށް ވަނީ ބުނެފަ އެވެ. އަދި މީގެ އިތުރުން އެކަން އެގޮތަށް ކުރުމަކީ ރަށުގެ ރައްޔިތުންނާއި ކައުންސިލާއި ދެމެދުގައި އޮތް ގުޅުން، ނުވަތަ މަސަލަހަތު ގެއްލިގެންދާނޭ ކަމެއް ކަމުގައި ދެކޭކަމަށް ތިނަދޫ ސިޓީ ކައުންސިލުން ނިންމި ނިންމުމުގައި ބުނެފައި ވެެއެވެ.
މީގެ އިތުރުން އެ ކައުންސިލުން ބުނެފައިވަނީ މެމްބަރެއްގެ ގޮނޑި ހުސްވާ ހާލަތުގައި ކައުންސިލުގެ ނިންމުމެއް އޮންނަ ޖެހޭ ކަމަށް ހައިކޯޓުގެ ގަޒިއްޔާގައި ބަޔާންކުރާ އިޖުރާއަތުގެ ދަށުން ބަންޑާރަނައިބުގެ އޮފީހުން އެލްޖީއަށް ދީފައިވާ ލަފަޔާއި ހަވާލާދީ، ދައުލަތުގެ ބަންދާރަނައިބާއި އެލްޖީއޭގެ ފަރާތުން ގޮނޑި ގެއްލުމާއި މެދު ނިންމަވާ ގޮތެއްގެ މަތީން އަމަލުކުރުމަށް ފެންނަކަމަށް އެ ކައުންސިލުން މިމަހުގެ 6 ވަނަ ދުވަހު ބޭއްވުނު ތިނަދޫ ސިޓީ ކައުންސިލުގެ ހަތަރުވަނަ ދައުރުގެ 191 ވަނަ ރަސްމީ ބައްދަލުވުމުން ނިންމާފައިވާ ކަމަށެވެ.
މި ބައްދަލުވުމުގައި ޑެޕިއުޓީ މޭޔަރުގެ އިތުރުން ހަތަރު ކައުންސިލް މެމްބަރުން ވަނީ ބައިވެރިވެފަ އެވެ. އަދި މި ނިންމުން ނިންމުމަށް ޑެޕިއުޓީ މޭޔަރު ނަސްރުﷲ އަލީ ވަކިގޮތަށް ވޯޓުދީފައި ނުވި ނަމަވެސް ދެން ތިބި ހަތަރު މެމްބަރުން ވޯޓުދީފައި ވަނީ އެކަން އެގޮތަށް ނިންމުމަށް ފެންނަ ކަމަށެވެ.
