އޯ.އޭ.ސީ.ޕީ.އެސް ގައި ރާއްޖެއިން ބައިވެރިވުމުގެ މައްސަލަ ދިރާސާކުރުމަށް ޚާރިޖީ ގުޅުންތަކުގެ ކޮމިޓީއަށް
ވަޒީރުންގެ މަޖިލީހުގެ ޖަލްސާގައި މަޝްވަރާކުރެއްވުމަށްފަހު އޯއޭސީޕީއެސްގައި ރާއްޖެއިން ބައިވެރިވުމަށް ފެންނަކަމަށް ވަނީ ނިންމާފައި
ރައްޔިތުންގެ މަޖިލީހުގެ ޖަލްސާގެ ތެރެއިން
އޯގަނައިޒޭޝަން އޮފް އެފްރިކަން ކެރީބިއަން އެންޑް ޕެސިފިކް ސްޓޭޓްސް (އޯ.އޭ.ސީ.ޕީ.އެސް) ގައި ދިވެހިރާއްޖެއިން ބައިވެރިވުމުގެ މައްސަލަ އިތުރަށް ދިރާސާކުރުމަށް ޚާރިޖީ ގުޅުންތަކުގެ ކޮމިޓީއަށް ފޮނުވައިފިއެވެ.
ބުދަ ދުވަހު ކުރިޔަށްދިޔަ ރައްޔިތުންގެ މަޖިލީހުގެ ޖަލްސާއަށް މަޖިލީހުގެ ރައީސްގެ މޭޒުން ހުށަހަޅާ ކަންތައްތަކުގެ ދަށުން މިމުއާހަދާގައި ބައިވެރިވުމާމެދު ރައްޔިތުންގެ މަޖިލީހުން ގޮތެއް ނިންމެވުމަށް ރައީސުލްޖުމްހޫރިއްޔާ ފޮނުއްވާފައިވާ ސިޓީފުޅު ވަނީ އިއްވާފައެވެ.
ސިޓީފުޅުގައި ވަނީ ދެމެހެއްޓެނެވި ތަރައްގީއަށް މަސައްކަތްކުރުމާއި ކާބޯތަކެތީގެ ރައްކާތެރިކަން ކަށަވަރުކުރުމާއި ދުނިޔޭގެ އިގްތިޞާދީ މައިދާނުގައި މެމްބަރު ގައުމުތަކުގެ ހަރަކާތްތެރިވުން ކުރިއެރުވުމަށްޓަކައި 1975 ވަނަ އަހަރު ސޮއިކޮށްފައިވާ ޖޯޖްޓައުން އެގްރީމެންޓްގެ ދަށުން އެފްރިކާގެ ގައުމުތަކާއި ކެރީބިއަންގެ ގައުމުތަކާއި އަދި ޕެސިފިކް ގައުމުތަކުގެ މެދުގައި އުފައްދާފައިވާ ޖަމިއްޔާ އޯގަނައިޒޭޝަން އޮފް އެފްރިކަން ކެރީބިއަން އެންޑް ޕެސިފިކް ސްޓޭޓްސް (އޯ.އޭ.ސީ.ޕީ.އެސް) ގައި ރާއްޖެއިން ބައިވެރިވުމާއި ގުޅޭގޮތުން 2022 ވަނަ އަހަރުގެ ޖެނުއަރީ 11 ވަނަ ދުވަހު ބޭއްވި ވަޒީރުންގެ މަޖިލީހުގެ ޖަލްސާގައި މަޝްވަރާކުރެއްވުމަށްފަހު އޯއޭސީޕީއެސްގައި ރާއްޖެއިން ބައިވެރިވުމަށް ފެންނަކަމަށް ނިންމާފައިވާކަމަށެވެ.
ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 93 ވަނަ މާއްދާގެ (ހ) ގައި ދިވެހި ދައުލަތުގެ ނަމުގައި، ވެރިކަން ހިންގާ ފަރާތުން ބައިވެރިވާ ބައިނަލްއަޤްވާމީ މުޢާހަދާތަކަށް ޢަމަލުކުރަންވާނީ ރައްޔިތުންގެ މަޖިލީހަށް ހުށަހަޅައި އެމަޖިލީހުން ފާސްކުރުމަށްފަހު، އެމަޖިލީހުން ނިންމާ ގޮތުގެ މަތިން ކަމަށް ބަޔާންކޮށްފައިވާތީ މިކަމާމެދު ގޮތެއް ނިންމުމަށް ވަނީ އެދިވަޑައިގަންނަވާފައެވެ.
