ހއ. ދިއްދޫގައި ކުރިއަށް ގެންދިޔަ ފަނުން ތަކެތި ވިޔަން ދަސްކޮށްދޭ ޕްރޮގްރާމް ކާމިޔާބުކަމާއެކު ނިންމާލައިފިއެވެ.
މިއީ ދިއްދޫ އަންހެނުންގެ ތަރައްގީއަށް މަސައްކަތްކުރާ ކޮމެޓީން އިންތިޒާމުކޮށްގެން އެރަށުގެ ކަނބަލުންނަށް ޚާއްސަކޮށް ކުރިއަށް ގެންދިޔަ ޕްރޮގްރާމެކެވެ. މި ޕްރޮގްރާމް ނިންމުމުގެ ރަސްމިއްޔާތު ފެބްރުއަރީ 20ވީ އާދިއްތަދުވަހުގެ ރޭ ބާއްވާފައިވާއިރު, މި ރަސްމިއްޔާތުގައި ޕްރޮގްރާމްގައި ބައިވެރިވި ފަރާތްތަކަށް ވަނީ ހަނދާނީ ލިޔުން ހަވާލުކޮށްފައެވެ.
ދިއްދޫ އަންހެނުންގެ ތަރައްގީއަށް މަސައްކަތް ކުރާ ކޮމިޓީން ބުނެފައިވާ ގޮތުގައި, މިފަދަ ޕްރޮގްރާމެއް ކުރިއަށް ގެންދިއުމުގެ އެންމެ ބޮޑު މަގުސަދަކީ ގޭގައި ތިބެގެން ރަށުގެ އަންހެން ބޭފުޅުންނަށް އާމްދާނީ ހޯދިދާނެ ފުރުސަތެއް ފަހިކޮށްދިނުމެވެ. މި ޕްރޮގްރާމްގައި ފަނުން ތަކެތި ވިޔަން ދަސްކޮށްދިނީ އެރަށު އަލިވާގޭ އަބްދުލްހަކީމެވެ.
ފަނުން ތަކެތި ވިޔަން ދަސްކޮށްދޭ ޕްރޮގްރާމް އެރަށުގައި ކުރިއަށް ގެންގޮސްފައިވަނީ ފެބްރުއަރީ 14ވަނަ ދުވަހުން ފެށިގެން 17ވަނަ ދުވަހުގެ ނިޔަލަށެވެ.
ދިއްދޫ އަންހެނުންގެ ތަރައްގީއަށް މަސައްކަތް ކުރާ ކޮމިޓީން ދަނީ އަންހެނުންނަށް އަމާޒުކޮށްގެން ގިނަ ހަރަކާތްތަކެއް ރާވައި ހިންގަމުންނެވެ.
