ދިއްދޫ މިޑްލް ސްޕޯރޓްސް ކުލަބުން އިންތިޒާމް ކޮށްގެން "ސްޕީޗް ތެރަޕީ ކޭމްޕް 2022" ހއ.ދިއްދޫގައި ފަށައިފިއެވެ.

މިއީ މިޑްލް ސްޕޯޓްސް ކުލަބުން އެރަށުގައި ހިލޭ ކުރިއަށް ގެންދާ ކޭމްޕެކެވެ. މި ކޭމްޕު ކުރިއަށް ދަނީ ދިއްދޫ މިޑްލް ސްޕޯރޓްސް ކުލަބާއި ހއ.އަތޮޅު ކައުންސިލާއި ދިއްދޫ އަންހެނުންގެ ތަރައްޤީއަށް މަސައްކަތްކުރާ ކޮމެޓީއާއި ގުޅިގެންނެވެ. ފެބްރުއަރީމަހުގެ 19ވަނަ ދުވަހުން 24ވަނަ ދުވަހުގެ ނިޔަލަށް ކުރިއަށް ގެންދާ މި ކޭމްޕްގެ ސްޕީޗް ތެރަޕިސްޓަކީ އައިޖީއެމްއެޗްގެ ސްޕީޗް ތެރަޕިސްޓް އައިމިނަތު ސަމާހަތު ޝަރީފެވެ. މިޑްލް ސްޕޯރޓްސް ކުލަބުން މި ކޭމްޕް ދިއްދޫގައި ހިންގުމަށް ރާވައި، 2021 ވަނަ އަހަރުގެ ޑިސެމްބަރު މަހު ސްޕީޗް ތެރަޕީގެ ޚިދުމަތް ބޭނުންވާ ފަރާތްތަށް ނަން ނޯޓް ކުރުމަށް ފުރުޞަތު ހުޅުވާލިއިރު ގިނަ އަދަދެއްގެ ބަޔަކު ވަނީ މި ކޭމްޕްގައި ބައިވެރިވުމަށް ނަންނޯޓް ކޮށްފައެވެ.

މި ކޭމްޕުގެ އިތުުރުން ދިއްދޫގައި ތިން ސެޝަނެއް ކުރިއަށް ގެންދިއުމަށްވަނީ ހަމަޖެހިފައިއެވެ. އެގޮތުން ސްޕީޗް ތެރަޕިސްޓް އައިމިނަތު ސަމާހަތު ޝަރީފް މެދުވެރިކޮށް ހއ.އަތޮޅު ތަޢުލީމީ މަރުކަޒުގެ ގުރޭޑް 9 އިން ފެށިގެން 12 ގެ ދަރިވަރުންނަށް ކެރިއަރ ގައިޑެންސްއާއި ގުޅޭ ސެޝަނެއް 20ފެބްރުއަރީ ވީ އާދިއްތަ ދުވަހު ވަނީ ކުރިއަށް ގެންގޮސްފައިއެވެ. އަދި ހއ.އަތޮޅު ތަޢުލީމީ މަރުކަޒު ޓީޗަރުންނަށާއި ބެލެނިވެރިންގެ އިތުރުން އާންމު ފަރާތްތަކަށް ހުޅުވާލާއިގެން މައުލޫމާތު ދިނުމުގެ ދެސެޝަން ފެބްރުއަރީމަހުގެ 21 އަދި 22 ވަނަ ދުވަހުގެ ރޭ ބޭއްވުމަށް ވަނީ ހަމަޖެހިފައެވެ. މިގޮތުން މި ދެ ސެޝަންގައި އަލިއަޅުވާ ލާނީ އުފަންވުމުން ފެށިގެން 5 އަހަރާއި ހަމައަށް ތުއްތު ކުއްޖާގެ ވާހަކަ ދެއްކުމުގެ މަރުޙަލާތަކުގެ ތަފްސީލަށާ ، ކުއްޖާ ވާހަކަ ނުދައްކާނަމަ ކުރެވިދާނެ ކަންތައްތަކުގެ މަޢުލޫމާތު ގެ މައްޗަށެވެ. އަދި މީގެ އިތުރުން ސްޕީޗް ތެރަޕިސްޓެއްގެ ލަފައާއި އިރުޝާދު ބޭނުންވެދާނެ ހާލަތްތަކާއި ގުޅޭ މަޢުލޫމާތު މިސެޝަންތަކުގައި ދިނުމަށް ވަނީ ހަމަޖެހިފައެވެ.