ޅ. ކުރެންދޫގައި ދިމާވެފައިވާ އެންމެ ބޮޑު މައްސަލައަކީ ބޯހިޔާވަހިކަމުގެ މައްސަލަ ކަަމަށާއި, ރަށުގައި ބިމުގެ ދަތިކަން އޮތުމާއެކު, އަޅަން ޖެހޭނީ ފްލެޓްކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހް ވިދާޅުވެއްޖެއެވެ.
އާދިއްތަ ދުވަހު ކުރެންދޫ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވިދާޅުވީ, މިއަހަރުގެ ތެރޭގައި ބޯހިޔާވަހިކަމުގެ މަޝްރޫއު އިއުލާން ކުރައްވާނެ ކަމަށެވެ.
މި ސަރުކާރުން ކުރަމުން ގެންދާ މަސައްކަތަކީ ރިޔާސީ އިންތިޚާބުގައި ވީ ވައުދުތަކާއި އެޖެންޑާ 19ގެ ވައުދުތައް ފުއްދުމުގެ މަސައްކަތް ކަމަށާއި, ކޮވިޑުގެ ހާލަތުގައި ސަރުކާރަށް ވެސް ދަތި އުނދަގޫތައް ދިމާވުމުން ބައެއް މަޝްރޫއުތައް ފަސްކޮށް ތަރުތީބުކޮށްފައިވާ ކަމަށް ރައީސް ވިދާޅުވިއެވެ.
ކޮންމެ ރަށަކަށް ވެސް ވަޑައިގެން އެ ރަށެއްގައި ކުރިއަށްދާ މަޝްރޫއުތައް ކައިރިން ބައްލަވާލެއްވުމުން, އެންމެ ބާރު ސްޕީޑުގައި ކުރިއަށް ގެންދަންވީ މަޝްރޫއުތައް އެނގިވަޑައިގަންނަވާ ކަމަށް ރައީސް ވިދާޅުވިއެވެ. ރަށުގައި ނުފެށި ހުރި މަޝްރޫއުތައް ފެށުމަށް މަސައްކަތް ކުރައްވާނެ ކަމަށާއި, މަޝްރޫއުތައް ބާރު ސްޕީޑުގައި ކުރިއަށް ގެންދިޔުމަށް މަސައްކަތް ކުރައްވާނެކަން ރައީސް ވަނީ ފާހަގަކުރައްވާފައެވެ.
މި ރަށުގައި ބަނދަރުގެ ދަތިކަން ހައްލުކުރުމަކީ އުނދަގޫކަމެއްކަން ފާހަގަކުރައްވައި, ޓެކްނިކަލް ސަރވޭއެއް ހަދައި އެ މައްސަލަ ވެސް ހައްލު ކޮށްދެއްވާނެ ކަމަށް ރައީސް ވިދާޅުވިއެވެ. މީގެއިތުރުން ސިއްހީ މަރުކަޒުގެ ޖާގަ ބޮޑުކުރުމަށް ނިންމާފައިވާ ކަމަށް ވެސް ވިދާޅުވިއެވެ. އަދި ސިއްހީ މަރުކަޒަށް ހޯދަން ޖެހޭ ވަސީލަތްތައް ހޯއްދަވާނެ ކަމަށް އެމަނިކުފާނު ވިދާޅުވިއެވެ.
ރައީސުލްޖުމްހޫރިއްޔާގެ މިދަތުރުފުޅުގައި 6 ރަށަކަށް ވަނީ ވަޑައިގަންނަވާފައެވެ. ފެބްރުއަރީ މަހުގެ 18 ވަނަ ދުވަހުން 20 ވަނަ ދުވަހަށް އެމަނިކުފާނު ޅ އަތޮޅަށް ކުރެއްވި މިދަތުރުފުޅުގެ އެންމެ ފަހު މަންޒިލަކީ ކުރެންދޫއެވެ.
