ކުރެންދޫގައި އިތުރު ހައުސިންގ ޔުނިޓްތަކާއި މަގުތައް ޒަމާނީ ފެންވަރަށް ހައްދަވައިދެއްވާނެ ކަމަށް ރައީސް ވިދާޅުވެއްޖެ
ދަތުރުދާނެ ރަށެއް ކައުންސިލާ ވާހަކަ ދައްކައިގެން ހަމަޖެއްސުން
ރައީސް ސާލިހް ކުރެންދޫގައި ވާހަކަފުޅުދައްކަވަނީ
ކުރެންދޫގައި އިތުރު ހައުސިންގ ޔުނިޓްތަކާއި މަގުތައް ޒަމާނީ ފެންވަރަށް ހައްދަވައިދެއްވާނެ ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވިދާޅުވެއްޖެއެވެ.
"އުފާވެރި އަމާން ރާއްޖެ" ކެމްޕޭނަށް ޅ. ކުރެންދުއަށް ވަޑައިގެން ވާހަކަފުޅުދައްކަވަމުން ރައީސް ވިދާޅުވީ، މިއަހަރު ބޭއްވޭ އިންތިޚާބު ކާމިޔާބުކުރައްވައި ދެވަނަ ދައުރަކަށް ކުރިމަތިލައްވާނީ ބޮޑު ތަފާތަކުން ކަމަށެވެ. ރައީސް ވިދާޅުވީ 130 ވަރަކަށް ރަށަށް ވަޑައިގެންނެވިއްޖެ ކަމަށާއި، އަނިޔާވެރިކަމާއި ބިރުވެރިކަމުގެ ތެރެއަށް ދާން ރައްޔިތުން ބޭނުން ނުވާ ކަމަށެވެ. އެފަދަ ފޮތެއް ކުރެންދޫ ރައްޔިތުން ވެސް ބޭނުން ނުވާނެ ކަމަށާއި، ބޭނުންވާނީ ހިތްހަމަޖެހުމާއި އުފަލާއި ހަމަޖެހުމާއެކު އުޅެން ކަމަށެވެ.
ރައީސް ވިދާޅުވީ ކުރެންދުއަކީ ވަރަށް އާދަޔާ ޚިލާފު ރަށެއް ކަމަށެވެ. މުޅިން ފުއްޓަރު އޮތް، ލަފައިފުރުމުގެ ދަތިކަން އޮތް، ބިން ތޮއްޖެހިފައި އޮތް ރަށެއް ކަމަށެވެ. އަދި އަސާސީ ޚިދުމަތްތައް ބޭނުންވާނެ ކަމަށާއި، އެ މަސައްކަތް ކުރަމުން ގެންދާކަމަށެވެ. މީގެ އިތުރުން ވަށައިގެން ރިވެޓްމަންޓު ޖަހައި، ކުރީގެ ނަރުދަމާ ނިޒާމު ނިންމައި، ފެނުގެ ނިޒާމް ގާއިމްކުރަމުން ދާކަމަށެވެ. އަދި އިންޖީނުގެ އަޅައި ނިމިއްޖެ ކަމަށާއި، ރައްޔިތުން ބޭނުންވެފައިވާ ބޯހިޔާވަހިކަމަށް ހައްލު ހޯދުމަށް 50 ހައުސިންގ ޔުނިޓުގެ މަސައްކަތް ކުރިއަށްދާއިރު، އިތުރު 50 ހައުސިންގ ޔުނިޓް އަޅުއްވައިދެއްވާނެ ކަމަށެވެ.
ރައީސް ވިދާޅުވީ، ފެނާއި ނަރުދަމާގެ މަސައްކަތް ނިމުމުން މަގުތައް ރަނގަޅަށް ހަދައި، ތާރުއަޅައި ފެން ހިންދާ ނިޒާމެއް ގާއިމްކުރާނެ ކަމަށެވެ. އަދި ގިރާ ސަރަހައްދު ހިމާޔަތްކުރުމުގައި ގެންނަންޖެހޭ ބަދަލަކާއެކު، އެ މަސައްކަތް ނިންމާނެ ކަމަށާއި، އަދި ސްކޫލަށް ބޭނުންވާ 12 ކްލާސްރޫމް ވަނީ ބަޖެޓް ކުރެވިފައި ކަމަށެވެ. ރައީސް ވިދާޅުވީ އެ މަސައްކަތްތައް ކުރިއަށް ގެންގޮސްދެއްވާނެ ކަމަށެވެ.
މީގެ އިތުރުން ޒުވާނުން ބޭނުންވާ ކުޅިވަރުތަކަށް އިންޑޯ ޔޫތު ކޮމްޕްލެކްސްއެއް، ފެސިލިޓީތަކާއެކު ގާއިމްކޮށްދެއްވާނެ ކަމަށާއި، ވޭސްޓް މެނޭޖްމަންޓް އަޕްގްރޭޑްކޮށް، ކުނީގެ މައްސަލައަށް ހައްލު ހޯއްދަވައިދެއްވާނެ ކަމަށެވެ. އަދި ރަށުގެ ރައްޔިތުން ދަތުރު ދާނެ ރަށެއް، ކައުންސިލާ ވާހަކަ ދައްކަވައިގެން ހަމަޖައްސަވައިދެއްވާނެ ކަމަށެވެ.
