މި މުޖުތަމައުގައި ޤާބިލް އެތައް ކުދިންނެއް އެބަތިބި، އެކުދިން އިލްމީ ރިސާޗްގެ މައިދާނަށް ނެރެން ޖެހޭ: ޚުތުބާ
18 ފެބުރުއަރީ 2022 | ހުކުރު 08:31ވިސްނައި ފިކުރު ކުރުމުގެ އިންޖީނަކީ އިލްމު
އިސްލާމީ މަރުކަޒުގައި ހުކުރު ނަމާދު ކުރުމަށް ޖަމާއަތް ހަދައިގެން
މި މުޖުތަމައުގައި ޤާބިލް އެތައް ކުދިންނެއް އެބަތިބި ކަމަށާއި، އެކުދިންގެ ޤާބިލުކަން ތަރައްޤީކޮށް، އިލްމީ ރިސާޗްގެ މައިދާނަށް ނެރެން ޖެހޭ ކަމަށް ހުކުރު ޚުތުބާގައި ބުނެފިއެވެ.
‘ކުރިއެރުމާއި ތަރައްޤީގެ ތަޅުދަނޑިއަކީ ވިސްނުން’ މިމައުޟޫއަށް ރާއްޖޭގެ އެކި ކަންކޮޅުތަކަށް އިއްވި ހުކުރު ޚުތުބާގައި ބުނީ ވިސްނައި ފިކުރު ކުރުމުގެ އިންޖީނަކީ އިލްމު ކަމަށާއި، ފައިދާކުރަނިވި އިލްމުން މެނުވީ ކުރިމަގު އުޖާލާއެއް ނުވާނެ ކަމަށެވެ. އިސްލާމް ދީން ގޮވައިލަނީ އިމްލު އުނގެނުމަށް ކަމަށްވާއިރު، މުސްތަޤުބަލް ވެސް އިލްމާއި ނުލައި އުޖާލާ ނުވާނެ ކަމަށް ޚުތުބާގައި ބުނެފައިވެއެވެ. އަދި ތަރައްޤީވެ ކުރިއަރައި ދިއުމަށް ފައިދާކުރަނިވި އިލްމު އުނގެނި ވިސްނުމަށް ޚުތުބާގައި ގޮވާލާފައިވެއެވެ.
ޚުތުބާގައި ބުނީ އިސްލާމް ދީން ގޮވައިލަނީ ހަމައެކަނި އިލްމު އުނގެނި އިލްމުވެރީންގެ ދަރަޖަ މަތިވެރި ކުރުމަށް ނޫން ކަމަށެވެ. އޭގެ އިތުރުން ތަފާތު ފަންނުތަކުގައި މުސްލިމުން ކުރިއަރައިގެން ދިޔުމަށް ވެސް ޤުރުއާންގައި ގޮވާލައްވާފައިވާކަން ފާހަގަކޮށްފައިވެއެވެ. މީގެ އިތުރުން އިސްލާމީ އުންމަތުގެ އިލްމުވެރިންގެ ތެރެއިން ގިނަ ބޭކަލުންނަކީ އިލްމަށްޓަކައި ދިރިއުޅުމުގެ ޒަރޫރީ ކަންކަން ވެސް ދޫކުރައްވައި ނަފްސުގެ ބޭނުންތައް އެއްފަރާތްކޮށް އިލްމަށްޓަކައި ވަގުތު ހުސްކުރެއްވި ބޭކަލުން ކަމަށް ޚުތުބާގައި ބުނެފައިވެއެވެ.
އުފެއްދުންތެރިކަމުގެ މަގަކީ، ފުންކޮށް ވިސްނައި ފިކުރުކުރުންކަން ފާހަގަކޮށް ޚުތުބާގައި ބުނީ އައު އީޖާދުތަކުގެ ދޮރަކީ، މި ކައުނުގައި، މާތް ﷲ ލައްވާފައިވާ ނިއުމަތްތަކުގެ ބޭނުން، ހެޔޮ ގޮތުގައި ހިފޭނެ ގޮތްތަކާމެދު ވިސްނުން ކަމަށެވެ. އަދި އައު ހޯދޭނީ ވިސްނުމުގެ މައިދާނުގެ ތެރެއިން ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ މިއަދު ދުނިޔެ ދެކެމުންދާ އައު އީޖާދުތަކާއި، ފަންނިއްޔާތުގެ މައިދާނުގައި ހާސިލު ކުރަމުންދާ ކާމިޔާބުތަކަކީ، މި ކައުނާއި ކައުނުގައިވާ ކާއިނާތުތަކާމެދު އިންސާނުން ވިސްނައި، ފިކުރު ކުރުމުގެ ފޮނި މޭވާތަކެއް ކަމަށެވެ. ކުރިއަރާފައިވާ މުވާޞަލާތުގެ ވަސީލަތްތަކުގެ ސަބަބުން، މިއަދު މިވަނީ ގުޅުންތައް ވާސިލުކުރުމަށް މަގު ތަނަވަސްވެފައި ކަމަށެވެ. އަދި ސައިންސްގެ މައިދާނުގައި އައިސްފައިވާ ކުރިއެރުންތަކުގެ ސަބަބުން، އިންސާނާ މިވަނީ ބޭސްފަރުވާ ކުރުމުގައްޔާއި، ހަވާއަށް ދަތުރުތައް ކުރުމުގައްޔާއި، ވިރާސީ މޭސްތިރިކަމުގެ މައިދާނުގައި، އެތައްއެތައް ކާމިޔާބުތަކެއް ހޯދައިފައިވާ ކަމަށެވެ.
އެގޮތުން މިއަދު ދަރީންގެ ތެރޭގައި، އެކިއެކި މުއައްސަސާތަކަށާއި، އޮފީސްތަކަށާއި، ކުންފުނިތަކަށް ބޭނުންވާ އެތައް އެޕްލިކޭޝަނެއް ހަދާފައިވާ ޤާބިލު ދަރީން އެބަތިބި ކަމަށާއި، މައިންބަފައިންނާއި މުދައްރިސުންނާއި ކޮލެޖްތަކުންނާއި ޔުނިވަރސިޓީތަކުން މަސައްކަތް ކުރަންވީ، މިކުދީންގެ ގައިގައި ހުރި، މި ޤާބިލުކަން ތަރައްޤީކޮށް، އިލްމީ ރިސާޗްގެ މައިދާނަށް އެ ކުދިން ނެރުމަށް ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ ޤައުމެއްގެ ދެމެހެއްޓެނިވި ތަރައްޤީގެ އަސާސަކީ، މިފަދަ އީޖާދުވެރި ކުދީން ކަމަށާއި، ޙަޟާރަތްތައް ތަފާތު ވަނީ، އެ ޙަޟާރަތެއްގެ ދަރީންގެ އުފެއްދުންތެރި، އީޖާދުވެރި ބުއްދިއާއި ވިސްނުމުގެ ފުރިހަމަކަމުން ކަމަށެވެ.
