ފުލުހުން އެމްޑީޕީ ހަރުގެ ތެރެއަށް ވަދެ އެތައް ބަޔަކު ހައްޔަރުކޮށްފި
26 ޖުލައި 2017 | ބުދަ 16:46އެއްވެ ތިބިމީހުންގެ ލޮލަށް ފުލުހުންވަނީ ޕެޕަރ ސްޕްރޭ ޖަހާފަ
އިހަވަންދޫ ދާއިރާގެ ކުރީގެ މެމްބަރު އަހުމަދު އަބްދުﷲ ހައްޔަރުކޮށްފައި
ފުލުހުން އެމްޑީޕީ ހަރުގެ ތެރެއަށް ވަދެ ބަޔަކު ހައްުޔަރުކޮށްފިއެވެ.
ފުލުހުންވަނީ އެމްޑީޕީ ހަރުގެ ތެރެއަށް ވަދެ އެމްޑީޕީގެ އިންތީޙާބާއި ބެހޭ ކޮމެޓީގެ މުޤައްރިރު އަދި ވިލިމާލެ ދާއިރާގެ ރައީސް މުހައްމަދު އިބްރާހީމް މަނިކު އާއި އިހަވަންދޫ ދާއިރާގެ ކުރީގެ މެމްބަރު އަހުމަދު އަބްދުﷲ ހައްޔަރުކޮށްފައެވެ.
އިދިކޮޅު ކޯލިޝަނުން އެމްޑީޕީ ހަރުގޭގައި މި އެއްވުން ބާއްވާފައި ވަނީ މިނިވަންކަމަށް ގޮވާލަން ކަމަށް ބުނެއެވެ.
ރައްޔިތުންގެ ބަދަލުގެ ނަމުގެ އިދިކޮޅު ފަރާތްތަކުން ގިނަ ހަރަކާތްތައް ހިންގަމުންދާއިރު ހަފްތާ ބަންދާ ދިމާކޮށް ޖުލައި މަހުގެ ކުރީ ކޮޅު ވެސް ވަނީ ރާއްޖޭގެ އެކި ސަރަހައްދުތަކުގައި ޖަލްސާތަކާއި ރައްޔިތުންނާއި ބައްދަލުކުރުންތައް ކުރިއަށް ގެންގޮސްފައެވެ.
އެއްވެ އުޅުމާއި ހިޔާލު ފާޅު ކުރުމުގެ މިނިވަންކަމުގެ ދަށުން ކުރިން އެންގުމަކާއި ނުލައި އެއްވެވޭނެ ކަމަށް އޮތް ނަމަވެސް ޤާނޫނުގެ ދަށުން ހެދި ގަވާއިދަކުން ވަނީ އެއްވެ އުޅެވޭނީ ވަކި ތަނެއްގައި ކަމަށާއި އެއްވުމެއް ބޭއްވުމުގެ ކުރިން ފުލުހުންނަށް އެކަން އަންގަން ވާނެ ކަމަށް ކަނޑައަޅާފައެވެ.
ފުލުހުންވަނީ އެއްވެ ތިބިމީހުންގެ ލޮލަށް ޕެޕަރ ސްޕްރޭ ޖަހާފަ ވަރަށް އަނިޔާވެރިކޮށް ރޫޅާލާފައެވެ. ޕެޕާ ސްޕްރޭ ޖެހި އިރު އާޓިފިޝަލް ބީޗުގެ ތެރޭގައި ގިނަ އަދަދެއްގެ ކުޑަކުދިން ވެސް ހަރަކާތްތެރިވަމުން ދިޔައެވެ. ނަމަވެސް ފުލުހުން ބާރުގެ ބޭނުންކޮށްފައި ވަނީ ކުޑަކުދިންނަށް ވެސް ބެލުމެއް ނެތިއެވެ.
