މާލޭ ސިޓީ ކައުންސިލްގެ މެމްބަރުން ހުވާ ކުރައްވައިފި
3 ޖޫން 2017 | ހޮނިހިރު 21:32ކައުންސިލްގެ ފުރަތަމަ ބައްދަލުވުން ވެސް ބޭއްވި
މާލޭ ސިޓީ އަށް އަލަށް އިންތިހާބުވެވަޑައިގެންނެވި މެމްބަރުން ހުވާކުރެއްވުމުގެ ދަރުބާރުގައި
މާލޭ ސިޓީ ކައުންސިލްގެ މެމްބަރުން ހުވާ ކުރައްވައިފި އެވެ.
ޣިޔާސުއްދީން އިންޓަނޭޝަނަލް ސްކޫލްގައި ބޭއްވި ހުވާ ކުރެއްވުމުގެ ދަރުބާރުގައި 13 ކައުންސިލަރުންނަށް ހުވާ ލައިދެއްވީ ސުޕްރީމް ކޯޓްގެ ފަނޑިޔާރު އާދަމް މުހައްމަދެވެ. ހުވާ ކުރެއްވުމަށް ފަހު އިގުރާރުގައި މެމްބަރުން ސޮއިކުރެއްވެވި އެވެ.
ލާމަރުކަޒީ ގާނޫނުގެ ދަށުން އުފެއްދި ތިން ވަނަ ސިޓީ ކައުންސިލްގެ މެމްބަރުން ހުވާ ކުރެއްވުމުގެ މި ރަސްމިއްޔާތުގައި ކައުންސިލްގެ ކުރީގެ މެމްބަރުންނާއި ސިޔާސީ ދާއިރާގެ ބައެއް ބޭފުޅުންނާއި މިނިވަން މުއައްސަސާތަކުގެ ބައެއް މެމްބަރުންގެ އިތުރުން ބޭރުގެ ސަފީރުން އަދި އާންމުން ވެސް ބައިވެރިވެވަޑައިގެންނެވި އެވެ.
މާލޭ ސިޓީ ކައުންސިލަށް އަލަށް އިންތިހާބުވެވަޑައިގެންފައިވާ ބޭފުޅުންނަކީ، ހުޅުހެންވޭރު ދާއިރާއަށް އާދަމް ޝަރީފް، މެދުހެންވޭރު ދާއިރާއަށް އަހްމަދު ނިޔާޒު، ހެންވޭރު ދެކުނު ދާއިރާއަށް އިބްރާހިމް މަނިކު، ހެންވޭރު އުތުރު ދާއިރާއަށް މުހައްމަދު ފިޝާވިން ސަލީމް، ގަލޮޅު އުތުރު ދާއިރާއަށް ސިފާ މުހައްމަދު، ގަލޮޅު ދެކުނު ދާއިރާއަށް ޝާހީން މަހްމޫދު، މައްޗަންގޮޅީ އުތުރު ދާއިރާ އަށް މުހައްމަދު ރަޝީދު، މައްޗަންގޮޅީ ދެކުނު ދާއިރާއަށް އަހްމަދު ޒަމީރު، މާފަންނު އުތުރު ދާއިރާއަށް މުހައްމަދު ފަޒީން، މާފަންނު ހުޅަނގު ދާއިރާއަށް ޝަމާއު ޝަރީފް މާފަންނު މެދު ދާއިރާ އަށް އަޒުރާ މޫސާ، މާފަންނު ދެކުނު ދާއިރާއަށް ހުސައިން ޝަރީފް އަދި ވިލިމާލޭ ދާއިރާ އަށް ހަމްނާ ވަހީދު އެވެ.
މާލޭ ސިޓީ ކައުންސިލްގެ 13 މެމްބަރުންގެ ތެރެއިން ހެންވޭރު އުތުރު ދާއިރާއަށް އިންތިހާބުވެވަޑައިގެންނެވި ފިޝާވިން ފިޔަވައި އެހެން ބޭފުޅުންނަކީ އެމްޑީޕީގެ މެމްބަރުންނެވެ. ފިޝާވިން އަކީ ޑީއާރުޕީއަށް ނިސްބަތްވާ މެމްބަރެކެވެ. ކައުންސިލަރުން ހުވާ ކުރެއްވުމުގެ ދަރުބާރުގައި ޑީއާރުޕީގެ ލީޑަރު މުހައްމަދު ނަޝީދު (ކާނަލް) ވެސް ބައިވެރިވެވަޑައިގެންނެވި އެވެ.
އުވިދިޔަ މާލޭ ސިޓީ ކައުންސިލްގައި، މިހާރުގެ ސަރުކާރު ހިންގާ ޕީޕީއެމް ތަމްސީލްކުރައްވާ ދެ މެމްބަރުން ތިއްބެވިއިރު، އާ ސިޓީ ކައުންސިލަށް ޕީޕީއެމްގެ އެއްވެސް މެމްބަރަކު އިންތިހާބުވެވަޑައެއް ނުގަންނަވެ އެވެ.
ޣިޔާސިންދީން އިންޓަނޭޝަނަލް ސްކޫލްގައި ބޭއްވި ހުވާކުރެއްވުމުގެ ދަރުބާރަށް ފަހު އާ ކައުންސިލްގެ ފުރަތަމަ ބައްދަލުވުން ވަނީ ބާއްވައިފަ އެވެ.
އައްޑޫ ސިޓީގެ ކައުންސިލްގެ މެމްބަރުން ވެސް ހޮނިހިރު ދުވަހުގެ ރޭ ވަނީ ހުވާ ކުރައްވައިފަ އެވެ.
