އަށް މަސް ފަހުން ފުރަތަމަ ފަހަރަށް އެރިކްސަން މެޗެއް ކުޅެފި

މިދިޔަ އަހަރު ބޭއްވި ޔޫރޯ ފުޓުބޯޅަ މުބާރާތުގެ ތެރެއިން ހިތުގެ މައްސަލައެއް ދިމާވެގެން ދަނޑުން ބޭލި ޑެންމާކުގެ މިޑްފިލްޑަރު ކްރިސްޓަން އެރިކްސަން އަށް މަސް ދުވަސް ފަހުން ފުރަތަމަ ފަހަރަށް މެޗެއް ކުޅެފިއެވެ.

މިދިޔަ ޓްރާންސްފާ މާކެޓުގައި ހަ މަސް ދުވަހުގެ އެއްބަސްވުމެއްގެ ދަށުން އެރިކްސަން ވަނީ ޕްރިމިއާ ލީގުގެ ބްރެންޓްފޯޑަށް ބަދަލުވެފައެވެ. އަނިޔާއަށްފަހު އެރިކްސަން ފެނުނު ފުރަތަމަ މެޗަކީ ސައުތުއެންޑް ޔުނައިޓެޑާއި ދެކޮޅަށް ބްރެންޓްފޯޑުން ކުޅުނު އެކުވެރިކަމުގެ މެޗެވެ.

މި މެޗުގައި އޭނާ ވަނީ 60 އެއްހާ މިނެޓު ފުރިހަމަކޮށްފައެވެ. ސަޕޯޓަރުން ދަނޑަށް ނުވައްދާ ކުޅުނު މި މެޗު ބްރެންޓްފޯޑުން ކާމިޔާބުކުރީ 3-2 ގެ ނަތީޖާއަކުންނެވެ. މި މެޗުގައި އެރިކްސަން ވަނީ ބްރެންޓްފޯޑަށް ލަނޑެއް ޖަހަން ފުރުސަތު ތަނަވަސްކޮށްދީފައެވެ.

މިދިޔަ އަހަރުގެ ޔޫރޯ ފުޓްބޯޅަ މުބާރާތުގައި ޑެންމާކުން ކުޅުނު ފުރަތަމަ މެޗުގައި އުމުރުން 29 އަހަރުގެ އެރިކްސަން ހިތް ހުއްޓިގެން ދަނޑު މައްޗަށް ވެއްޓުނެވެ. އެއާއެކު ދަނޑު މަތީގައި އެތައް އިރެއް ވަންދެން އެރިކްސަނަށް ފަރުވާދިންއިރު، އޭނާ ވަނީ ފަހުން ހޮސްޕިޓަލަށް ގެންގޮސް އޮޕަރޭޝަނެއް ކޮށްފައެވެ.

އެ އޮޕަރޭޝަނަކީ އެރިކްސަނުގެ ހިތަށް އިމްޕްލާންޓަބަލް ކާޑިއޮވަރޓަރ ޑެފިބްރިލޭޓަރ (އައިސީޑީ) އެއް ލެއްވުމަށް ކުރި އޮޕަރޭޝަނެކެވެ. އެކަމަކު އައިސީޑީ ލައްވައިގެން ހުރެ އިޓަލީގައި ޕްރޮފެޝަނަލް ފުޓްބޯޅަ ކުޅުމަކީ މަނާ ކަމެކެވެ. އެހެންކަމުން އައިސީޑީ ނުލައްވައި އެރިކްސަނަށް އިޓާލިއަން ލީގުގައި ކުޅެވޭތޯ ބަލަން ޓެސްޓުތަކެއް ހެދި ނަމަވެސް، މި ވަގުތުގެ ސިއްހީ ހާލަތު ހުރި ގޮތުން އޭނާއަށް މި ސީޒަނުގެ އިޓާލިއަން ލީގުގައި ނުކުޅެވޭނެ ކަމަށް އިންޓަ މިލާނުން ވަނީ ބުނެފައެވެ. އެހެންކަމުން ހުރިހާ ބައެއްގެ މަޝްވަރާގެ މަތިން އެރިކްސަންގެ އެއްބަސްވުން އިންޓައިން މީގެ ކުރިން ވަނީ އުވާލާފައެވެ.

މި ފަހަރުގެ ޓްރާންސްފާ ބާޒާރު ބަންދުވުމުގެ ކުރިން ބްރެންޓްފޯޑުން އެރިކްސަނުގެ ސޮއި ހޯދިއިރު، އޭނާ އެ ޓީމާ ގުޅިފައިވަނީ ހަ މަސް ދުވަހުގެ އެއްބަސްވުމެއްގެ ދަށުންނެވެ. އަދި މި މުއްދަތުގެ ތެރޭގައި އެރިކްސަންގެ ފަރާތުން ރަނގަޅު ކުޅުމެއް ފެނިއްޖެނަމަ، އިތުރު އެއް އަހަރަށް އެއްބަސްވުން އާކުރާ ގޮތަށް ހަމަޖެހިފައިވާ ކަމަށްވެސް ރިޕޯޓުތައް ބުނެއެވެ. ހަ މަސް ދުވަހުގެ މުއްދަތަކަށް އެރިކްސަން ބްރެންޓްފޯޑާ ގުޅުނުއިރު، އެ ޑީލް ނިމުނީ އެރިކްސަނަށް އިނގިރޭސި ޕްރިމިއާ ލީގުން އެންގި ޚާއްސަ މެޑިކަލް ޓެސްޓުތަކެއް ފުރިހަމަކުރުމަށްފަހުއެވެ.

މި ސީޒަނުގެ ނިޔަލަށް އެރިކްސަން ބްރެންޓްފޯޑާ ގުޅުނުއިރު، އޭނާ އެންމެ ފުރަތަމަ ވިދާލާފައިވަނީ އިނގިރޭސި ކުލަބު ޓޮޓެންހަމް ހޮޓްސްޕާއިންނެވެ. ޓޮޓެންހަމް ދޫކޮށް 2020 ވަނަ އަހަރުގެ ޖެނުއަރީ މަހު 16.9 މިލިޔަން ޕައުންޑަށް އެރިކްސަން އިންޓައަށް ބަދަލުވި ނަމަވެސް، އެ ޓީމުގައި އެރިކްސަންއަށް އެންމެ އެދެވޭ ކުޅުމެއް ދެއްކިފައެއް ނުވެއެވެ.