ކުރިޔަށް އޮތީ ވެރިކަން ކުރާ ކޯލިޝަންގެ މައި ޕާޓީ އެމްޑީޕީއަށް މުހިންމު ދުވަސްތަކެކެވެ. ސަރުކާރަށް އާދެވި ދުވަސްތަކެއް ވީތަނާ ޕާޓީގައި ލަމުންދިޔަ ރެނދު ފުޅާވެގެން ގޮސްފައިވާއިރު, ޕާޓީގެ އެތެރޭގެ ނިންމުންތަކުން އެކަން އަންނަނީ ވަރަށް ރަނގަޅަށް ހާމަވަމުންނެވެ. އެމްޑީޕީގެ ދެ ރައީސުން ކަމުގައިވާ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހާއި ރައީސް މުހައްމަދު ނަޝީދަށް ތާއީދުކުރާ މީހުންގެ މެދުގައި ޕާޓީގެ އެތެރޭގައި ދެ ފެކްޝަނެއް އުފެދިފައިވާކަމީ ހާމައަށް ފެންނަން އޮތް ހަގީގަތެވެ. ޕާޓީގެ އެތެރޭގައި ބާއްވަމުން އަންނަ ކޮންމެ އިންތިޚާބަކާއެކުވެސް ފެންނަމުންދަނީ އެމަންޒަރެވެ. ރައީސް ނަޝީދަށް ތާއީދު އޮތް މިންވަރާއި ރައީސް ސޯލިހަށް ތާއީދު އޮތް މިންވަރެވެ.
ކުރިޔަށް އޮތް ދުވަސްތަކަކީ އަނެއްކާވެސް ދެ ރައީސުންގެ ތާއީދާއި ބާރު އެމްޑީޕީގެ އެތެރޭގައި އޮތް މިންވަރު މިނެކިރާލެވޭނެ ދުވަސްތަކެކެވެ. ކުރިޔަށް އޮތް, އެމްޑީޕީގެ ޗެއަރޕަރސަން ކަމުގެ އިންތިޚާބުގެ ކެމްޕެއިނުން ފެންނަމުންދަނީ އެމަންޒަރެވެ. ވާދަކުރައްވަނީ އިކޮނޮމިކް މިނިސްޓަރ ފައްޔާޒު އިސްމާއީލާއި މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ (އިންތި)އެވެ. ދެ މޫނަކީވެސް އެމްޑީޕީގެ ތެރޭގައި މަގުބޫލު ދެ މޫނެވެ. ވަކިން ޚާއްސަކޮށް ދެ ބޭފުޅުން ނިކުންނަވާފައި ތިއްބެވި ފަޅީގައި މަގުބޫލު ދެ ބޭފުޅުންނެވެ.
މިނިސްޓަރ ފައްޔާޒަކީ ރައީސް ސޯލިހުގެ އެންމެ އަރިސް އެއް މިނިސްޓަރެވެ. އަދި ރައީސް ސޯލިހަށް ތާއީކުރާ މެމްބަރުންގެ މެދުގައި މަގުބޫލު މިނިސްޓަރެކެވެ. ފައްޔާޒު ނުކުންނަވާކަން އިއުލާންކުރުމާއެކު ދެން އުފެދިގެން ދިޔަ ސުވާލަކީ ރައީސް ނަޝީދުގެ ފަޅިން ނުކުންނަވާނީ ކޮން ބޭފުޅެއްތޯއެވެ. ރައީސް ނަޝީދުގެ ފަޅިންވެސް މެމްބަރުންގެ މެދުގައި މަގްބޫލު ކެންޑިޑޭޓެއް ނެރުމަކީ މުހިންމު ކަމަކަށްވާއިރު ފަހުވަގުތު އިންތިޚާބަށް ނިކުންނެވީ އިންތިއެވެ. ދެންއޮތީ މިދެ ބޭފުޅުންނާއެކު ދެން ކުރެހެމުންދާ މަންޒަރެވެ.
ޗެއަރޕަރސަން ކަމުގެ މަގާމަށް ކުރިމަތިލައްވާފައި ތިއްބެވީ މެމްބަރު އިންތިއާއި މިނިސްޓަރ ފައްޔާޒު ނަމަވެސް, މިކަމަކީ މިދެބޭފުޅުންނާ ހަމައިން ނިމޭކަމެއްނޫނެވެ. ސަބަބުތައް ވަރަށް ސާފެވެ.
ޕާޓީގެ ކުރިމަގާއި ގައުމުގެ ކުރިމަގާ ގުޅޭގޮތުން ރައީސް ނަޝީދާއި ރައީސް ޞާލިހު ގެންގުޅުއްވާ ސިޔާސަތުތައް ވަރަށްވެސް ތަފާތެވެ. އުކުޅަހު ކޮންގްރެސްއިން 2018 ވަނަ އަހަރުގެ ޓިކެޓް ރައީސް ސޯލިހަށް ދިނުމަށް ނިންމުމުގެ އިތުރުން މުހިންމު އެހެން ކަމަކަށްވެސް އެއްބަސްވިއެވެ. އެއީ ބަރުލަމާނީ ނިޒާމަށް ތާއީދުކުރުމެވެ. އެނިޒާމު އެމްޑީޕީން ބަލައިގަތުމެވެ. ބަރުލަމާނީ ނިޒާމެއް ރާއްޖެއަށް ގެނައުމަކީ ރައީސް ނަޝީދުގެ ހުވަފެންފުޅަކަށްވާއިރު އެމަގަށް ކަންކަން ބައްޓަންކުރެއްވުމަށް ރައީސް ނަޝީދު ގެންދަވަނީ ތަފާތު އުކުޅުތައް ބޭނުންކުރައްވައި ތަފާތު ހިސާބުތައް ޖައްސަވަމުންނެވެ. އެކަމަށް އެޅިފައި އޮތް ހުރަހަކީ ރައީސް ސޯލިހެވެ. ރައީސް ސޯލިހު ބަރުލަމާނީ ނިޒާމެއް ގެންނަވަން ބޭނުންފުޅުނުވުމާއި މިހާތަނަށް އެއްވެސް ރައީސަކަށް ކާމިޔާބުކަމާއެކު ކުރިޔަށް ގެންދެވިފައިނުވާ "ކޯލިޝަން ސަރުކާރު" ކުރިޔަށް ގެންދެވުމަށް ބޭނުންފުޅުވުމެވެ. އެހެންކަމުން ބަރުލަމާނީއަށް ވެރިކަމުގެ ނިޒާމު ފުރޮޅާލުމަކީ ރައީސް ނަޝީދަަށް ފަސޭހަފުޅު ކަމަކަށް ނުވެއެވެ.
އެކަމަށް ބޭހެއް ހޯއްދެވުމުގެ ގޮތުން ރައީސް ނަޝީދު މިވަނީ ސިޔާސީ ގޮތުން ކަންތައްތަކެއް ހުށަހަޅުއްވާފައެވެ. އެންމެ ފަހުން ބޭއްވި އެމްޑީޕީގެ ގައުމީ މަޖިލީހުގެ ޖަލްސާއަކީ މުހިންމު ކަންތައްތަކެއް ކުރިޔަށް އޮތްތަނުގައި ބޭއްވުމަށް ނިންމި, މުހިންމު ގައުމީ މަޖިލީހެކެވެ. ކުރިޔަށް އޮތް އިންތިޚާބުތައް އޭޕްރީލް މަހު ބާއްވާއިރު, ޕާޓީގެ ކޮންގްރެސް އޮގަސްޓް މަހު ބޭއްވުމަށް ވަނީ ނިންމާފައެވެ. ކޮންގްރެސްގައި, ގާނޫނު އަސާސީއަށް މުހިންމު އިސްލާހު ތަކެއް ގެނައުމަށް ހުށަހެޅުމާމެދު ގޮތްތަކެއް ނިންމާނެއެވެ. ވަކިން ޚާއްސަކޮށް ނިޒާމީ ވޯޓަކަށް ދިޔުމާމެދު ގޮތްތަކެއް ނިންމާނެއެވެ. އެއާއެކު މިހާރު ވަނީ ރައީސް ނަޝީދު ހުށަހަޅުއްވާފައިވާ 30 އިންސައްތައަށްވުރެ މަތިން ރައްޔިތުންގެ އާނ ބަސް ލިބޭ ކެންޑިޑޭޓަށް ވެރިކަމަށް އާދެވޭ އިސްލާހުގެ ބަހުސްވެސް ފެންމަތިވެފައެވެ.
ކޯލިޝަން ސަރުކާރަކުން މިންޖުވާނެ ފޯމިއުލާއެއްގެ ގޮތުގައި ރައީސް ނަޝީދު ނެރުއްވާ ފޯމިއުލާއަކީ 30 ޕަސެންޓް ތާއީދުނަމަވެސް, އެކަމަކީ އެމްޑީޕީއަށްވެސް އޭގައި ގެއްލުންތަކާ ކުރިމަތިވެދާނެ ފަދަ ފޯމިއުލާއެކެވެ. 2013ގެ ރިޔާސީ އިންތިޚާބުން ރައީސް ނަޝީދަށް ކުރިމަތިވެ ވަޑައިގެންނެވި ނާކާމިޔާބީއާއެކު, އެއިސްލާހާ އެއްގޮތަށް ކަންކޮށްފިނަމަ ވެރިކަމުގައި އެމްޑީޕީއަށް ނޯވެވިދާނެކަމަށްވެސް ބުނެދެއެވެ. އެހެންކަމުން މިހުރިހާ ކަމަކާމެދުވެސް ކޮންގްރެސްގައި ގޮތްތަކެއް ނިމިގެންދާއިރު ވިސްނަންޖެހެއެވެ.
ޗެއަރޕަރސަންކަމަށް ނުކުންނަވާފައިވާ އިންތިއާއި ފައްޔާޒުގެ ވާހަކަފުޅުތަކަށް ބަލާއިރު, ދެބޭފުޅުންގެ ވިސްނުންފުޅު މިކަމުގައި ހުރީ އެބޭފުޅަކު ނުކުންނަވާފައިވާ ފަޅީގެ ފިކުރާ އެއްގޮތަށެވެ. ކޮންގްރެސްއަކީ ރައީސް ނަޝީދު ދެކެވަޑައިގަންނަވަމުން ގެންދަވާ ބޮޑުވަޒީރު ކަމުގެ ހުވަފެންފުޅު ހަގީގަތަށް ހެދުން, ނުވަތަ ރައީސް ރައީސް ސޯލިހު ބޭނުންފުޅުވާ ދެ ވަނަ ދައުރަށް މަގުކޮށައިދޭނެ ކޮންގްރެސްއެކެވެ. އެކަމަށް ގޮތްތަކެއް ކޮންގްރެސްގައި ކަނޑައެޅޭއިރު ރިޔާސަތުގައި އިންނަވާނީ ފައްޔާޒު ނޫނީ އިންތިއެވެ.
އެހެންކަމުން ކުރިޔަށް އޮތް އިންތިޚާބަކީ މިފަހުން ނިމިގެންދިޔަ އެމްޑީޕީގެ ގައުމީ މަޖިލީހުގެ އިސްތިއުނާފު ފަނޑިޔާރުންގެ މަޖިލިސް އިންތިޚާބުކުރަން ނެގި ވޯޓުގައި ދެ ރައީސުންގެ ބާރާއި ތާއީދު އޮތް މިންވަރު ވަޒަންކޮށްލެވުނުގޮތަށް, އަނެއްކާވެސް އެކަން ޓެސްޓްކުރުމަށް ލިބޭ ފުރުސަތެކެވެ. އަދި އެމްޑީޕީގެ ކުރިމަގު ބައްޓަންވާނީ މިތަނުން ކޮން ރައީސެއްގެ ފިކުރާ އެއްގޮތަށްކަންވެސް މިއާއެކު ކަނޑައެޅިގެންދާނެއެވެ. ކޮންމެ ގޮތެއްވިޔަސް މިއިންތިޚާބުގެ ނަތީޖާއިން އެތައް ވާހަކައެއް ބުނެދޭނެއެވެ.
