ކެނެޑާގެ ބޮޑުވަޒީރަށް މުސްލިމުން ތާއީދުކުރާ ހަ ސަބަބެއް

ކެނެޑާގެ ބޮޑުވަޒީރު ޖަސްޓިން ޓްރޫޑޯއަކީ ތަފާތުކުރުންތައް ނައްތާލައްވައި، އަމިއްލަފުޅުގެ ގައުމުގެ އިތުރުން ދުނިޔޭގެ ގިނަ ބައެއްގެ ލޯބި ލިބިވަޑައިގެން ވެރިކަން ކުރައްވަމުންގެންދަވާ ލީޑަރެކެވެ.

އީދު މުބާރިކް ލިޔެފައިވާ އިސްޓާކީނެއް ތުރުކުރެއްވުން

ހުޅަނގުގެ ގައުމުތަކުން ހައްގުތަކުގެ ގޮތުގައި ވަކާލާތު ކުރާ އެއްކަމަކީ އެއްޖިންސުން ކައިވެނި ކުރުމެވެ. މި އަހަރުގެ ޖޫން މަހުގެ 25 ވަނަ ދުވަސް ދިމާވެފައިވަނީ މުސްލިމުންގެ ފިތުރު އިދާއެވެ. އިއްތިފާގުން އެ ދުވަހު ކެނެޑާގައި އެއްޖިންސުން ކައިވެނި ކުރުމުގެ ހައްގަށް ގޮވާލާ ބޭއްވުނު އެއްވުމެއް އޮތެވެ. ކެނެޑާގެ ބޮޑުވަޒީރު އެ އެއްވުމުގައި ބައިވެރިވެ ވަޑައިގެންނެވިއެވެ. މުސްލިމުންގެ އަގީދާގައި އެއްޖިންސުގެ ގުޅުން ހަރާމްވި ނަމަވެސް އަދި ޓްރޫޑޯ އެއްވުމުގައި ބައިވެރިވެ ވަޑައިގަތުމަށް މުސްލިމުން ތާއީދު ނުކުރި ނަމަވެސް އިސްލާމުންގެ ޚާއްސަ ދުވަސްތައް ހަނދުމަފުޅު ބަހައްޓަވައި ފާހަގަ ކުރެއްވުމުގައި ބައިވެރިވެ ވަޑައިގަތުމަކީ ޓްރޫޑޯއަށް މުސްލިމުންގެ ލޯބި ލިބިގެންދާކަމެކެވެ.

މުސްލިމުންނާމެދު ރައީސް ޓްރަމްޕް ރުޅިވެރިކަން ފަތުރާއިރު ޓްރޫޑޯ ހުންނެވީ މުސްލިމުންނާއެކު

މި އަހަރުގެ ކުރީކޮޅު ރައީސް ޓްރަމްޕް ވެރިކަމަށް ވަޑައިގެންނެވުމަށްފަހު މުސްލިމު އާބާދީ ބޮޑު ބައެއް ގައުމުތަކުގެ ރައްޔިތުން އެމެރިކާއަށް އެރުން މަނާކުރުމަށް ގަރާރެއްގައި ސޮއިކުރެއްވުމާއެކު ޓްރޫޑޯވަނީ އެމެރިކާއަށް ނާރުވާ ރެފިއުޖީންނަށް ކެނެޑާއިން މަރުހަބާ ކިޔާނެކަމަށް ވިދާޅުވެ ޓްރަމްޕްއަށް ރައްދު ދެއްވާފައެވެ.

އަދި އެމެރިކާއިން އެގޮތަށް ފޮނުވާލުމުގެ ސަބަބުން އުނދަގޫތައް ތަހައްމަލް ކުރަންޖެހޭ ފަރާތްތަކަށް ވަގުތީގޮތުން ކެނެޑާގައި ތިބެވޭނެ އިންތިޒާމް ޓްރޫޑޯގެ ސަރުކާރުން ވަނީ ހަމަޖައްސަވާފައެވެ.

މުސްލިމުންނަށް ތާއީދުކޮށް ހުޅަނގުގެ ވެރިޔަކު މަދުން ނޫނީ ނުދެއްވާފަދަ ތަގުރީރެއް ދެއްވުން

މުސްލިމުން އެމެރިކާއަށް އެރުން މަނާކުރުމަށް ރައީސް ޓްރަމްޕް ދެއްވި ތަގުރީރާއެކު ހަތުރުވެރިކަމުގެ ހަރަކާތްތައް ބައެއް ހިސާބުތކުގައި ފެށުނެވެ. ކެނެޑާގެ ކެބެކްގައި މުސްލިމުންގެ މިސްކިތަކަށް ވަނީ ހަމަލާދީފައެވެ. އެއާއެކު ޓްރޫޑޯވަނީ މުސްލިމުންނާއެކު ހުންނެވިކަން ކަށަވަރުކޮށްދެއްވައި ތަގުރީރެއް ދެއްވާފައެވެ.

ބޮޑުވަޒީރު ވިދާޅުވެފައިވަނީ މުސްލިމުންނާ ދެކޮޅަށް ދެވުނު ހަމަލާއަކީ ޓެރެރިސްޓް ހަމަލާއެއްކަމަށެވެ. އަދި އެކަމުގެ ހިތާމައިގައި މުސްލިމުންނާއެކު ވާކަމަށާއި މުސްލިމުން ދިފާއު ކުރައްވާނެ ކަމަށާއި، މުސްލިމުންދެކެ ލޯބިވާނެ ކަމަށް ޓްރޫޑޯވަނީ ވިދާޅުވެފައެވެ.

މުސްލިމުންނާއެކު އަޅުކަމުގައި ބައިވެރިވެ ވަޑައިގެތުން

ބޮޑުވަޒީރުކަމުގެ މަގާމަށް 2015 ވަނަ އަހަރު ވަޑައިގެންނެވުމުގެ ކުރިން 2013 ވަނަ އަހަރުގެ ތެރޭ ރަމްޟާން މަހެއްގައި މުސްލިމުންނާއެކު ނަމާދުގައި ބައިވެރިވެ ވަޑައިގަންނަވާ ވީޑިއޯއެއް ޢާއްމުވެގެން ގޮސްފައިވަނީ 2015 ވަނަ އަހަރުއެވެ .މުސްލިމުންގެ ސަލާމުން ސަލާމް ކުރެއްވުމަށްފަހު ޓްރޫޑޯވަނީ ކެނެޑާގެ އުސޫލަކީ އެއްމެންނަކީ "ހަމަހަމަ އެއް ބައެއް"ކަމަށް ވިދާޅުވެފައެވެ.

މުސްލިމުން ފާހަކުރާ ދުވަސްތައް ފާހަގަ ކުރައްވައި ހެޔޮ އެދުންތައް ފޮނުއްވުން

ރަމަޟާން މަހާއި އީދާއި މިފަދަ ދުވަސްތަކުގައި ޓްރޫޑޯ ދެއްވާ މެސެޖްތައް އެންމެ ބޮޑަށް ފާހަގަވެގެންދާނީ ރައީސް ޓްރަމްޕްގެ މެސެޖްތަކާ އަޅާކިޔާލުމުންނެވެ. މިދިޔަ ރަމަޟާން މަހުގެ ފެށުމާ ދިމާކޮށް ޓްރޫޑޯ ދެއްވި މެސެޖްގައި ކެނެޑާ ބިނާކުރުމުގައި މުސްލިމުންގެ ދައުރާ ރަމަޟާންމަހުގެ މުހިއްމުކަންފަދަ ކަންކަމުގެ މައްޗަށް އަލިއަޅުއްވާލެއްވި އިރު ޓްރަމްޕް ދެއްވި މެސެޖުގެ ކޮންމެ ފޮޅުވަތެއްގައިހެންމެ އޮތީ "ޓެރެރިޒަމް" މި ލަފްޒެވެ.

ސްކޫލްތަކުގައި ނަމާދު ކުރެވުމަކީ ހައްގެއްކަމަށް ވަކާލާތުކުރެއްވުން

މުސްލިމް ދަރިވަރުން ސްކޫލްތަކުގައި ހުކުރު ދުވަހު ހުކުރުނަމާދު ކުރުމާ ދެކޮޅަޅު ކެމްޕެއިނެއް ފެށިގެން ދިއުމުން ޓްރޫޑޯވަނީ އެކަން ކުށްވެރިކުރައްވައި އެއީ މުސްލިމުންގެ ހައްގެއްކަމަށް ވިދާޅުވެ މުސްލިމުންނަށް ތާއީދުކުރައްވާފައެވެ.