ޕީޖީ ލީޑަރު ކަމަށް އަލީ އާޒިމްއާއި އަސްލަމް ވާދަކުރައްވަނީ

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޕާލިމަންޓްރީ ގްރޫޕްގެ ލީޑަރު ކަމަށް ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް އާއި މެދު ހެންވޭރު ދާއިރާގެ މެންބަރު އަލީ އާޒިމް ކުރިމަތިލައްވަން ނިންމަވައިފިއެވެ.

ރާއްޖެއެމްވީއަށް މެމްބަރު އަސްލަމް ވިދާޅުވީ ޕީޖީ ލީޑަރު ކަމަށް ކުރިމަތިލެއްވުމަށް ނިންމަވާފައިވާ ކަމަށާއި، އެ މަސައްކަތްތައް ކުރިއަށްދާ ކަމަށެވެ. މިކަމާއި ގުޅޭ ގޮތުން މެމްބަރު އަލީ އާޒިމް ވިދާޅުވީ މަގާމަށް ކުރިމަތިލުމުގެ މަޝްވަރާތައް ކުރިއަށްދާ ކަމަށާއި، ވަކި ގޮތެއް އަދި ނުނިންމަވާ ކަމަށެވެ. ނަމަވެސް ޕީޖީ ލީޑަރު ކަމަށް ކުރިމަތިނުލައްވާނެ ކަމަށް ވިދާޅެއް ނުވެއެވެ.

Advertisement

އިތުބާރުހުރި ފަރާތަކުން ރާއްޖެމްވީއަށް މައުލޫމާތުލިބިފައިވާ ގޮތުގައި ޕީޖީ ލީޑަރު ކަމަށް ކުރިމަތިލެއްވުމަށް ދެބޭފުޅުން ވެސް ނިންމަވާފައިވެއެވެ.

އެމްޑީޕީ ޕާލިމަންޓްރީ ގްރޫޕްގެ އިންތިޚާބު 18 ފެބްރުއަރީ 2022ގައި ބޭއްވުމަށް ވަނީ ނިންމާފައެވެ. މި މަގާމަށް ކުރިމަތިލުމުގެ މުއްދަތު 17 ފެބްރުއަރީ 2022 ވާ ބުރާސްފަތި ދުވަހުގެ 12:00 އަށް ހަމަވާއިރު، އެވަގުތުގެ ކުރިން ފޯމް ހުށަހަޅަންޖެހެއެވެ. ޕާލިމެންޓަރީ ގްރޫޕްގެ ލީޑަރު ކަމަށް އެއްބޭފުޅަކު އިންތިޚާބު ކުރާއިރު، ޕާލިމެންޓަރީ ގްރޫޕްގެ ޑެޕިއުޓީ ލީޑަރ ކަމަށް ދެބޭފުޅަކު އިންތިޚާބު ކުރާނެއެވެ. އަދި އަމީން އާއްމުގެ މަގާމަށް އެއްބޭފުޅަކު، އަމީން އާއްމުގެ ނާއިބުގެ މަގާމަށް އެއްބޭފުޅަކު ޗީފް ވިޕްއަށް 6 ބޭފުޅުން އިންތިޚާބު ކުރާނެއެވެ.

މީގެ އިތުރުން އެމްޑީޕީގެ އަންހެނުންގެ ރޫހުގެ ރައީސްގެ މަގާމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު ރޮޒައިނާ އާދަމް ކުރިމަތިލެއްވަން ވަނީ ނިންމަވާފައެވެ. މެމްބަރު ރޮޒެއިނާގެ އިތުރުން ޝަފާތު އަހުމަދު ވެސް މިމަގާމަށް ކުރިމަތިލެއްވުމަށް ނިންމާފައިވެއެވެ.

އެމްޑީޕީގެ އެތެރޭގެ ތިން އިންތިޚާބަކަށް ކުރިމަތިލުމުގެ ފުރުސަތު 12 ފެބްރުއަރީވީ ހޮނިހިރު ދުވަހު ހުޅުވާލާފައިވާއިރު، ޗެއާޕާސަންގެ އިންތިޚާބު ވަރަށް ވާދަވެރިވާނެ ކަމަށް ބެލެވެއެވެ. އެއީ އެމަގާމަށް މާފަންނު އުތުރު ދާއިރާގެ މެންބަރު އިމްތިޔާޒް ފަހުމީ، އިކޮނޮމިކް މިނިސްޓަރު ފައްޔާޒު އިސްމާއީލް އާއި އެސްޓީއޯގެ މެނޭޖިން ޑިރެކްޓަރު ހުސައިން އަމުރު ވަނީ ޝައުގުވެރިކަން ފާޅުކުރައްވާފައެވެ. އެމްޑީޕީގެ އަސާސީ ގަވާއިދު ބުނާ ގޮތުން ޗެއާޕާސަންގެ މަގާމު ހުސްވާތާ 60 ދުވަހުގެ ތެރޭގައި އިންތިހާބު ބާއްވާ މަގާމަށް މީހަކު އައްޔަނު ކުރަންޖެހެއެވެ. އެ މަގާމުގައި ވޭތުވެދިޔަ ފަސް އަހަރު ހުންނެވީ ހެންވޭރު ހުޅަނގު ދާއިރާގެ މެމްބަރު ހަސަން ލަތީފެވެ. މިއީ މި މަގާމުގައި ދައުރު ހަމަކުރެއްވި ފުރަތަމަ މެމްބަރެވެ.

އެމްޑީޕީން ބުނީ އެޕާޓީގެ ޗެއަރޕާސަން މަގާމާއި އަންހެނުންގެ ރޫހު، ޒުވާނުންގެ ހިއްވަރުގެ ރައީސް އަދި ނައިބް ރައީސް ކަމުގެ މަގާމުގެ އިންތިޚާބު 16 އޭޕްރީލް 2022 ވާ (ހޮނިހިރު) ދުވަހު ބޭއްވުމަށް ހަމަޖެހިފައިވާ ކަމަށެވެ. މި މަގާމުތަކަށް ކުރިމަތިލުމުގެ ފުރުސަތު މި މަހުގެ 19 ވަނަ ދުވަހުގެ ނިޔަލަށް ވަނީ ހުޅުވާލާފައެވެ. ކެންޑިޑޭޓުންގެ ނަންތައް 22 ފެބްރުއަރީގެ ހަވީރު 4:00 ގައި އިއުލާން ކުރާނެއެވެ.