ބޯޑީ ވޯން ކެމެރާ ނުވަތަ ގައިގައި ހަރުކުރާ ކެމެރާ ބޭނުން ކުރަން ދިވެހި ފުލުހުން ފެށުމަކީ، ފުލުހުން ހިންގާ ބޮޑެތި އޮޕަރޭޝަންތަކަށް ލިބިގެންދާނެ ހެޔޮ ބަދަލެކެވެ. ބޮޑެތި ކުށްތަކުގެ ތަހުގީގުގައި ސީންގައި ކަން ހިނގާ ދިޔަގޮތް ވަގުތުން ރެކޯޑް ކުރެވި އެ ފުޓޭޖްތައް ބޭނުން ކުރެވޭނެއެވެ. އޭގެ ސަބަބުން ޝަރީއަތުގެ މަރު ހަލާގައި ތަހުގީގުގައި ކަން ހިނގާ ދިޔަ ގޮތް ދެނެގަތުމަށް ފަސޭހަވެގެންދާނެއެވެ. ޖިނާއީ ބޮޑެތި ކުށްތައް ސާބިތު ކުރުމުގައި ފުލުހުންގެ ތަހުގީގު މަރުހަލާގައި ކަން ހިނގައިދާ ގޮތުން ބޮޑެތި އޮޅުންތަކެއް އަރައި މިހާރުވެސް ބައެއް މައްސަލަތައް ކުށްވެރިންގެ މައްޗަށް ސާބިތު ނުވެއެވެ. އެހެންކަމުން މިއީ ދިވެހި ފުލުހުންގެ ޚިދުމަތަށް ލިބުނު މުހިންމު ކުރިއެރުމެކެވެ.

ބޮޑީ ވޯން ކެމެރާ ބޭނުން ކުރމަން ފަށާނެކަން މިދިޔަ އަހަރު ފުލުހުން އިއުލާންކޮށް ބައެއް ޓްރައިލްތައްވެސް ހިންގިއެވެ. އެއަށްފަހު 1400 ކެމެރާ ގެންނަން ނިންމި ނަމަވެސް ފެބްރުއަރީ މަހުގެ 13ވަނަ ދުވަހު ބޮޑީ ވޯން ކެމެރާ ބޭނުން ކުރަން ފެށީ 200 ކެމެރާއާއެކުގައެވެ. ދިވެހި ފުލުހުން ބޭނުންކުރަން ފެށީ "އެކްސްއޮން" ބްރޭންޑްގެ ކެމެރާއެވެ. މިއީ ފަސޭހަކަމާއެކު ޔުނިފޯމްގައި ހަރުކޮށްލެވޭ ގޮތަށް ފަރުމާ ކޮށްފައިވާ ކެމެރާއެކެވެ. ވީޑިއޯ ކޮލިޓީ ރަނގަޅު މި ކެމެރާގައި ރެކޯޑްކުރާ ވީޑިއޯގައި، އެ ވީޑިއޯ ރެކޯޑްކުރި ދުވަހާއި ގަޑި އެނގެން ހުންނާނެއެވެ. އަދި އެއީ ކޮންތަކެއްގައި ރެކޯޑްކޮށްފައިވާ ވީޑިއޯއެއްކަންވެސް އެނގެން ހުންނާނެއެވެ. އަދި ފުލުހުންގެ އޮޕަރޭޝަންތައް ވަގުތުން ކޮންޓްރޯލް ސެންޓަރުން ބަލާލެވޭނެއެވެ. މިއީ އޯޑިއޯ އާއި ވީޑިއޯ ވަކިވަކިންވެސް ރެކޯޑް ކުރެވި، ފަސޭހައިން ކޮންްޓްރޯލް ކުރެވޭ ގޮތަށް ފަރުމާ ކޮށްފައިވާ ކެމެރާއެކެވެ.

ބޮޑީ ވޯން ކެމެރާއަކީ ފުލުހުންގެ މުހިންމު އޮޕަރޭޝަންތަކަށް މުހިންމު ޑިވައިސްއެއް ކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވަނީ، ވިދާޅުވެފައެވެ. ކެމެރާގެ ވަސީލަތާއެކު ފުލުހުންގެ ހިދުމަތަށް ރައްޔިތުންކުރާ ކުރާ އިތުބާރު ބޮޑުވެގެންދާނެ ކަމަށްވެސް ސީޕީ ވިދާޅުވިއެވެ. މިކަމަށް އެކަށީގެންވާވަރަށް ފުލުހުން ތަމްރީނުކޮށްފައިވާ ކަމަށާއި، މިއީ ފުލުހުންގެ މައްޗަށް ކުރާ ދޮގު ތުހުމަތުތަކާއި އަސްލެއް ނެތް އިލްޒާމް ތަކަށް ޖަވާބުދާރީވެ، ހަގީގަތް ހާމަކޮށްދިނުމުގައި އެހީތެރިވެދޭނެ ޑިވައިސްއެއް ކަމަށް ސީޕީ ވިދާޅުވިއެވެ.

މިއީ ފުލުހުން ރިފޯމްކޮށް ފުލުހުންނަކީ މިހާރަށްވުރެ ބޮޑަށް ރައްޔިތުންގެ އިރުބާރު ލިބިފައިވާ ބަޔަކަށް ހެދުމަށް ކުރަމުން އަންނަ މަސައްކަތަށް ލިބޭ ބާރަކަށް ވެގެންދާނެއެވެ. ޓެރަރިޒަމްގެ އަމަލުތަކާއި، ޑްރަގް ޓްރެފިކިންގެ މައްސަލަތަށް މިހާރު މުޖުތަމައުގައި އާންމުވަމުންދާއިރު މިފަދަ ބޮޑެތި އޮޕަރޭޝަންތަކުގައި މި ކެމެރާ ބޭނުން ކުރެވޭނެއެވެ.