ދުނިޔެ ތަހުޒީބުވެ ކުރިއަރައިގެން އައިއިރު، އެކި ދުވަސްވަރު ފާހަގަ ކުރެވެނީ އެކި ކަންކަމުން ކުރިއަރައިގެންދާ ދުވަސްވަރުތަކުގެ ގޮތުގަ އެވެ. އެގޮތުން އެކި ޒަމާން ތަކުގައި ކުރިއަރައިގެންދާ ކަންތައްތައް ވެސް ވަރަށް ތަފާތެވެ. މީގެ ޒަމާންތަކެށް ފަހަތަށް ޖެހިލާއިރު 1760 ން ފެށިގެން 1840 ވަނަ އަހަރުގެ ދުވަސްތަކަކީ އިންޑަސްޓްރިއަލް ރެވޮލިއުޝަންގެ ޒަމާނެވެ. އެދުވަސްވަރުގައި، މެނުފެކްޗަރިން މަސައްކަތްތަކުން ކުރިއަރައިގެން، ތަފާތު މެޝިނަރީސްތައް ތައާރަފްވެގެންދިޔަ އެވެ. އަދި މިއަދު ދުނިޔޭގެ ކަންކަން ފާހަގަ ކުރެވިގެންދަނީ މައުލޫމާތުގެ ޒަމާނުގެ ގޮތުގަ އެވެ. އެގޮތުން ތަފާތު އެކި ޓެކްނޮލިޖީތަކާއި ސޯޝަލް ނެޓްވޯކްތަކުގެ ތެރެއިން އެކުލަވާލެވޭ މައުލޫމާތު ނުވަތަ ޑޭޓާ އަކީ އެންމެ އަގުބޮޑު ރައުސުލްމާލަށް މިއަދުވަނީ ވެފަ އެވެ. މީގެ ގަރުނެއް ކުރިން ދުނިޔޭގެ އެންމެ އަގުބޮޑު އެއްޗެއްގެ ގޮތުގައި ތެޔޮ  ބެލެވުނު ނަމަވެސް މިއަދު ދުނިޔޭގެ އެންމެ އަގުބޮޑު ވަސީލަތަކީ މައުލޫމާތެވެ.

މިއަދު ދުނިޔޭގެ ޓައިޓަންސް ނުވަތަ އެންމެ ފާހަގަކޮށްލެވޭ ކުންފުނިތަކުގެ ތެރޭގައި ހިމެނެނީ އަލްފަބެޓް ( ގޫގުލް ނިސްބަތްވާ ކުންފުނި)، އެމެޒޮން، އެޕަލް، ފޭސްބުކް އަދި މައިކްރޯސޮޕްޓް ފަދަ ކުންފުނިތަކެވެ.މި ކުންފުނިތައް ކުރިއަރައިގެން ދަނީ ނުހުއްޓުވޭހާ  ބާރު ސްޕީޑުގައެވެ. މި ހުރިހާ ކުންފުނިތަކަކީވެސް، ތަފާތު އެކި ޓެކެނޮލޮޖީތަކާއި އެޕްލިކޭޝަންތައް އީޖާދުކޮށް، އާ ކަންތައްތައް ގެންނަމުންދާ ކުންފުނިތަކެވެ.

މިއަދު މިއީ ދުނިޔޭގެ ވެސް އެންމެ ކާމިޔާބު އަދި ބޮޑެތި ކުންފުނިތަކެވެ. އެކުންފުނިތަކުގެ  އަހަރުގެ އެންމެ ކުއަޓަރެއްގައި ލިބޭ ފައިދާ 25 ބިލިއަން ޑޮލަރަށް އަރަ އެވެ. މުޅި އެމެރިކާގެ ދެބައިކުޅަ އެއްބައި މީހުން އޮންލައިނަށް ހޭދަކުރާ ފައިސާ އެމެޒޮންއަށް ދާއިރު ޑިޖިޓަލް އެޑްވައޓައިޒިންގެ ބޮޑު ހޭދައެއް މުޅި ދުނިޔެއިން ވެސް އެވްރެޖްކޮށް ކުރަނީ ގޫގުލްއާއި ފޭސްބުކް އިންނެވެ. މިކުންފުނިތަކުން ކުރިއެރުން ހޯދަމުންދަނީ ވިހި ވަނަ ގަރުނު ތެރޭގައި ތެޔޮ ކުންފުނިތަކުން ކުރިއަރައިގެން ދިޔަ މިންވަރަށް ވުރެ ވެސް މަތީ ލެވެލް އެއްގަ އެވެ. މިފަދަ އިންޓަރނެޓަށް ބަރޯސާވާ ކުންފުނިތަކުގައި ދުނިޔޭގެ އެތައް ރައްޔިތުންގެ މައުލޫމާތުތަކެއް ހިމެނޭ އިރު މިއީވެސް މިފަދަ ކުންފުނިތަކަށް ލިބޭ ވަރަށް ބޮޑު ބާރެކެވެ.

 ސްމާޓްފޯނާއި އިންޓަރނެޓްގެ ހިދުމަތް ހޯދާ މީހުން އިންތިހާއަށް ގިނަވެފައިވާ އިރު، މިއަދު ޑޭޓާ ވެގެންގޮސްފައި ވަނީ އެންމެ އަގުބޮޑު ވަސީލަތަށެވެ.މައުލޫމާތު ހޯދާ ރައްކާކޮށް، ކަންކަން ހޯދުންވެފައިވަނީ ދިރިއުޅުމުގެ އެއް އަސާސްއަށެވެ.

 މިއަދު ދުވެލަން ދިޔަޔަސް ޓީވީ ބެލިޔަސް ނުވަތަ ޓްރެފިކްގައި މަޑުކޮށްގެން އިންނަން ޖެހުނަސް ދުނިޔޭގައި ހިގާ ހުރިހާ ކަމެއްވެސް ވަރަށް ކައިރިން ބަލާލެވެއެވެ.  އަދި ވާނުވާ ބަލަން ބޭނުންވާ މީހުންނަށް އެއީ ވަރަށް ފަސޭހަކަމެކެވެ. އަތުކުރީ ގަޑި ބެނުންކޮށްގެން ދުއްވާ ކާރު ވެސް މިއަދުވަނީ އިންޓަރނެޓާއި ގުޅިފަ އެވެ. މީގެ އިތުރުން ދުނިޔޭގައި އަރޓިފިޝަލް އިންޓެލިޖެންސް ދަނީ  ބޮޑު ތަނުން އިތުރުވެ ފުޅާ ވަމުންނެވެ. މިއަދު އިންސާނުންގެ ވިސްނުމުގެ ބޭނުން ގިނަ ކަންކަމުގައި ބޭނުމެއް ވެސް ނުވެ އެވެ. ހުރިހާކަމެއްވެސް ކުރާނެ، ނުވަތަ އެކަމަށް ބޭނުންވާ މައުލޫމާތެއް ފަސޭހަކަމާ އެކު ހުންނަނީ ލިބޭށެވެ.