ހޯމް ސްޓޭއަށް ޚާއްސަކޮށްގެން ޑެސްކެއް ގާއިމުކުރަނީ
12 ފެބުރުއަރީ 2022 | ހޮނިހިރު 11:09ރާއްޖޭގައި ފުރަތަމަ ފަހަރަށް ހޯމް ސްޓޭ ޓުއަރިޒަމް ފަށާފައިވަނީ މިއަހަރުގެ ޖެނުއަރީ މަހު
ހޯމް ސްޓޭ ޓޫރިޒަމް ފެށުމަށްޓަކައި ބޭއްވި މަރުހަބާ ކިޔުމުގެ ހަރަކާތްތަކުގެ ތެރެއިން | އަލީ ޝާފީ
އަންނަ ހަފްތާގައި ހޯމް ސްޓޭއަށް ޚާއްސަކޮށްގެން ޑެސްކެއް ގާއިމުކުރަން ނިންމާފައިވާކަމަށް ޓޫރިޒަމް މިނިސްޓްރީން ބުނެފިއެވެ.
ރާއްޖެއެމްވީއަށް މައުލޫމާތު ދެއްވަމުން ޓޫރިޒަމް މިނިސްޓަރު ޑރ. އަބްދުﷲ މައުސޫމް ވިދާޅުވީ, މިހާރުވެސް ރާއްޖޭގައި 90ށް ވުރެ ގިނަ ރަށަށް ގެސްޓުހައުސް ޓޫރިޒަމް ފުޅާވެފައިވާ ކަމަށެވެ. އަދި މި ސަރުކާރުގެ އަމާޒަކީ އަންނަ އަހަރާ ހަމައަށް މުޅި ރާއްޖޭގައި މީހުން ދިރިއުޅޭ ހުރިހާ ރަށަކަށް އެ ވިޔަފާރި ފުޅާކުރުން ކަމަށެވެ.
މިނިސްޓަރު ވިދާޅުވީ ރަށު ފަތުރުވެރިކަމުގެ ތެރޭގައި ތިން ވައްތަރެއް އޮންނަ ކަމަށާއި, އެއީ ސަގާފީ، އިކޯ ނުވަތަ ތިމާވެށި, އަދި ކުޅިވަރުގެ ޓޫރިޒަމް ކަމަށެވެ. ހޯމް ސްޓޭ އަންނަނީ އެ ހުރިހާ ވިޔަފާރިއެއްގެ ތެރެއިން ކަމަށާއި، އެ ވިޔަފާރިތައްވެސް ފުޅާވާނެ ކަމަށެވެ. މިި ފަތުރުވެރިކަން ފުޅާކުރުމަށް ހުރި އެންމެ ބޮޑު އެއް ދަތިކަމަކީ ދަތުރުފަތުރު ކަމަށާއި ހައި ސްޕީޑް ފެރީގެ ނިޒާމާއެކު މިކަމަށް ހައްލު ލިބިގެންދާނެ ކަމަށް ގަބޫލުކުރައްވާ ކަމަށް ވެސް މިނިސްޓަރ ވިދާޅުވިއެވެ.
ރާއްޖޭގައި ފުރަތަމަ ފަހަރަށް ހޯމްސްޓޭ ޓުއަރިޒަމް ފަށާފައިވަނީ މިއަހަރުގެ ޖެނުއަރީ މަހުގައެވެ. ހޯމް ސްޓޭ ޓުއަރިޒަމް ފަށާފައިވަނީ މ. ދިއްގަރުންނެވެ.
ހޯމްސްޓޭގެ ގޮތުގައި ހިންގާ ޓޫރިސްޓް ގެސްޓްހައުސްއެއް ހިންގުމުގައި ރަށު ޓޫރިޒަމް ޑެސްކުގެ ދައުރުގެ ގޮތުގައި ކަނޑައަޅާފައިވަނީ ރަށެއްގައި ރަޖިސްޓަރީކޮށްގެން ހިންގާ ހޯމްސްޓޭތަކާއި، ފަތުރުވެރީންނަށް ކެއިންބުއިމާއި، ދަތުރުފަތުރާއި، އެކިއެކި ހަރަކާތްތައް ރާވައި ހިންގުމާއި، މިފަދަ އެހެނިހެން ޚިދުމަތްތައް އެ ރަށެއްގައި ފޯރުކޮށްދޭ ހަރަކާތްތަކާއި، ރަށަށް ފަތުރުވެރީންގެ ގޮތުގައި އައިސްގޮސްވާ ފަރާތްތަކުގެ އެންމެހައި ކަންކަން ރަށުފެންވަރުގައި ބަލަހައްޓާ މަސްއޫލުވެރި ފަރާތުގެ ގޮތުގައެވެ.
ރަށު ޓޫރިޒަމް ޑެސްކުން ކަނޑައަޅާ ތަނެއްގައި ޓޫރިސްޓް އިންފޮމޭޝަން ޑެސްކް ގާއިމުކުރަންވާނެއެވެ. އަދި ޓޫރިސްޓް އިންފޮމޭޝަން ޑެސްކަކީ، ފަތުރުވެރީންނަށް ފަސޭހައިން ޚިދުމަތް ލިބިގަނެވޭނެފަދަ ތަނެއްގައި ހުންނަ ތަނަކަށް ވެފައި، ރަށުގައި ފަތުރުވެރީން އުޅޭ ހުރިހާ ވަގުތެއްގައި ޚިދުމަތް ދޭންވާނެއެވެ. މިގޮތުން، ސީދާ ޑެސްކުގައި މީހަކު ހުރެގެން ޚިދުމަތްދޭނެ ވަގުތުތަކާއި، ވަރޗުއަލްކޮށް ޚިދުމަތްދޭނެ ވަގުތުތައް ކަނޑައެޅިދާނެއެވެ. އެހެންނަމަވެސް، 24 ގަޑިއިރު ގުޅޭނެ ހޮޓްލައިނެއް އޮންނަންވާނެއެވެ.
ޓޫރިޒަމް ޑެސްކުގެ މަސައްކަތުގެ ތެރެއިން, އެ ރަށެއްގައި ފަތުރުވެރިކަމުގެ ހަރަކާތްތައް ހިންގޭ މިންވަރަކުން މިކަމާ ގުޅުންހުރި ވަކިވަކި ދާއިރާތަކަށް ފޯކަލް ޕޮއިންޓުންގެ ގޮތުގައި މީހުން ހަމަޖެއްސިދާނެއެވެ.
