އަހަރުގެ މިހާތަނަށް އައި ފަތުރުވެރިންގެ އަދަދު މިދިޔަ އަހަރަށް ވުރެ 4.4 އިންސައްތަ ދަށް!
8 އޯގަސްޓު 2026 | ހޮނިހިރު 17:17މި އަހަރުގެ އޮގަސްޓް 5 އާ ހަމައަށް 1.2 މިލިއަނަށްވުރެ ގިނަ ފަތުރުވެރިން ރާއްޖެ އައިސްފައިވާއިރު، އެންމެ ގިނަ މީހުން ޒިޔާރަތްކުރީ ޗައިނާއިން. ފަތުރުވެރިން އަންނަ މިންވަރު ދަށްވަމުންދާތީ، އެ ސިނާއަތުގެ ޖަމިއްޔާތަކުން ވަނީ ކަންބޮޑުވުން ފާޅުކޮށް ސަރުކާރުގެ އެހީތެރިކަމަށް އެދިފައި. މިހާރު ރާއްޖޭގައި 68,322 އެނދު އޮޕަރޭޝަނުގައި ހުރިއިރު، ގިނަ ފަތުރުވެރިން މަޑުކުރަނީ ރިސޯޓުތަކުގައި
ސީޕްލޭން ޗެކިން އޭރިއާ ގައި ފަތުރުވެރިން ކިޔޫ ހަދައިގެން | އެމްއޭސީއެލް
މި އަހަރުގެ އޮގަސްޓް މަހުގެ 5 ވަނަ ދުވަހުގެ ނިޔަލަށް ރާއްޖެއަށް ޒިޔާރަތް ކޮށްފައިވާ ފަތުރުވެރިންގެ އަދަދު، މިދިޔަ 2025 ވަނަ އަހަރުގެ އެ މުއްދަތާ އަޅާބަލާއިރު 4.4 އިންސައްތަ ދަށަށް ގޮސްފައިވާ ކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފި އެވެ.
އެ މިނިސްޓްރީ އިން ބުނީ މި އަހަރުގެ އޮގަސްޓް 5 ވަނަ ދުވަހުގެ ނިޔަލަށް 1.2 މިލިއަނަށްވުރެ ގިނަ ފަތުރުވެރިން ރާއްޖެ އަށް ޒިޔާރަތްކޮށްފައިވާ ކަމަށެވެ. އެ މިނިސްޓްރީން އާންމުކޮށްފައިވާ ތަފާސްހިސާބުތަކަށް ބަލާއިރު، މި މުއްދަތުގެ ތެރޭގައި ޖުމްލަ 1,288,648 (އެއް މިލިއަން ދެ ލައްކަ އަށްޑިހަ އަށް ހާސް، ހަ ސަތޭކަ ސާޅީސް އަށް) ފަތުރުވެރިން ރާއްޖެއަށް އައިސްފައިވެ އެވެ. މިއީ މިދިޔަ 2025 ވަނަ އަހަރުގެ މި މުއްދަތާ އަޅާބަލާއިރު 4.4 އިންސައްތައިގެ ދަށްވުމެކެވެ. ނަމަވެސް އޮގަސްޓް މަހުގެ ފުރަތަމަ 5 ދުވަހަށް ބަލާއިރު، މިދިޔަ އަހަރަށްވުރެ 1.3 އިންސައްތަ އިތުރުވެ، 34,031 ފަތުރުވެރިން ވަނީ ރާއްޖެއަށް ޒިޔާރަތްކޮށްފަ އެވެ.
ރާއްޖޭގެ ފަތުރުވެރިކަމުގެ މާކެޓަށް ބަލާއިރު އެންމެ ގިނަ ފަތުރުވެރިން އަންނަ ގައުމަކީ ޗައިނާ އެވެ. އެގޮތުން ޖުމްލަ އައި ފަތުރުވެރިންގެ 17.9 އިންސައްތަ ނުވަތަ 226,122 ފަތުރުވެރިންނާއެކު ޗައިނާ އެއް ވަނައި ގައި އޮތްއިރު، 14.7 އިންސައްތައާއެކު ދެވަނައި ގައި އޮތީ ރަޝިޔާ އެވެ. ތިން ވަނައި ގައި އިނގިރޭސިވިލާތް 7.9 އިންސައްތައާއެކު އޮތްއިރު، އިޓަލީ، ޖަރުމަނުވިލާތް އަދި އިންޑިއާ ހިމެނެނީ ގަދަ ހަ ގައުމުގެ ތެރޭގަ އެވެ. މީގެ އިތުރުން ފްރާންސް، އެމެރިކާ، އޮސްޓްރޭލިއާ އަދި ސްވިޒަލޭންޑަކީ ވެސް ރާއްޖެއަށް އެންމެ ގިނައިން ފަތުރުވެރިން އަންނަ 10 ގައުމުގެ ތެރޭގައި ހިމެނޭ ގައުމުތަކެވެ.
ފަތުރުވެރިން ރާއްޖޭގައި މަޑުކުރާ ތަންތަނަށް ބަލާއިރު، އެންމެ ގިނަ ފަތުރުވެރިން އިޚްތިޔާރު ކުރަނީ ރިސޯޓުތަކެވެ. އެގޮތުން 73.1 އިންސައްތަ ފަތުރުވެރިން ރިސޯޓުތަކުގައި މަޑުކުރާއިރު، 22.4 އިންސައްތަ ފަތުރުވެރިން މަޑުކުރަނީ ގެސްޓްހައުސްތަކުގަ އެވެ. މިވަގުތު ރާއްޖޭގައި ފަތުރުވެރިކަމަށް ޖުމްލަ 69,072 އެނދު ހުރިއިރު، އޭގެ ތެރެއިން 98.9 އިންސައްތަ ނުވަތަ 68,322 އެނދު ހުރީ އޮޕަރޭޝަނުގަ އެވެ. މީގެ ތެރޭގައި 179 ރިސޯޓަކާއި، 945 ގެސްޓްހައުސްގެ އިތުރުން 16 ހޮޓަލާއި 173 ސަފާރީ އުޅަނދު ހިމެނެ އެވެ. އަތޮޅުތަކަށް ބަލާއިރު އެންމެ ގިނަ ފަތުރުވެރިން ޒިޔާރަތްކޮށްފައިވަނީ ކ. އަތޮޅަށެވެ.
ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ދަށްވަމުން ދިއުމުގެ ސަބަބުން ރާއްޖޭގެ އިގްތިސާދަށާއި ފަތުރުވެރިކަމުގެ ސިނާއަތަށް ބޮޑެތި ގެއްލުންތަކެއްވަމުންދާތީ، އެކަމުގެ ކަންބޮޑުވުން ފާޅުކޮށް ސަރުކާރުގެ ކުއްލި އެހީތެރިކަމަށް މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ) އާއި ނޭޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން އޮފް މޯލްޑިވްސް (އެންއެޗްޖީއޭއެމް) އިން ވަނީ އެދިފަ އެވެ.
