ބަންގްލަދޭޝް އާއި ދެކޮޅަށް ރާއްޖެ ކުޅުނު ބައިނަލްއަޤްވާމީ އެކުވެރިކަމުގެ ވޮލީމެޗު ތަކުގެ ފަހު މެޗުން ރާއްޖެ ސީދާ ތިން ސެޓުން ބަލިވެއްޖެއެވެ.

އެކުވެރިކަމުގެ ސިލްސިލާގެ ފުރަތަމަ މެޗުން ފަހަތުން އަރައި 3-1 ސެޓުން ރާއްޖެ ކާމިޔާބުކުރިއިރު، ދެވަނަ މެޗުން ރާއްޖެ 3-1 ސެޓުން ވަނީ ބަލިވެފައެވެ.

ޒުވާނުންގެ މަރުކަޒު އެތެރޭ ކޯޓުގައި ކުޅުނު މި މެޗުގެ ފުރަތަމަ ސެޓު ފަށައިގެން ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔަ ނަމަވެސް، ސެޓުގެ ވަކި ހިސާބަކުން ބަންގްލަދޭޝްއިން ވަނީ ތަފާތު މޮޅު ކުޅުމެއް ކުޅެ، މި ސެޓު އެޓީމު ކޮޅަށް އަނބުރާލާފައެވެ. އެގޮތުން ބަންގަލަދޭޝްއިން މި ސެޓު ކާމިޔާބުކުރީ 25-18 އިންނެވެ.

މެޗުގެ ދެވަނަ ސެޓު ރާއްޖެއިން ރަނގަޅަށް ފަށައި ދެ ޕޮއިންޓްގެ ލީޑެއްގައި ކުޅުނު އިރު ސެޓުގެ ކުރީ ކޮޅު އާދަމް ނަސީމް (އެޑަމާ) އާއި، ކެޕްޓަން އިސްމާއިލް ސާޖިދު (ކުޑަ ކާއްޓޭ)ގެ ބާރު ހަމަލާތަކެއް ފެނިގެންދިޔައެވެ. އެކަމަކު މި ސެޓުގައި ވެސް ރާއްޖެއަށް ލީޑުގައި ކުޅެވުނީ ސެޓުގެ މެދަކާ ހިސާބަށެވެ. ސެޓުގެ ފަހު ކޮޅު ބަންގްލަދޭޝްއިން ވަނީ ކުޅުން ރަނގަޅުކޮށް 25-21 އިން މި ސެޓުވެސް ކާމިޔާބުކޮށްފައެވެ.

މެޗުގެ ތިންވަނަ ސެޓުގައި ބަންގްލަދޭޝްގެ ފަރާތުން ފެނިގެން ގޮސްފައިވަނީ ތަފާތު މޮޅު ކުޅުމެކެވެ. އެގޮތުން މި ސެޓު ފަށައިގެން އެ ޓީމު ކުޅެފައިވަނީ ރަނގަޅު ލީޑެއްގައި އޮވެގެންނެވެ. ރާއްޖޭގެ ފަރާތުން މި ސެޓުގައި ފެނިގެން ގޮސްފައިވަނީ އާދައިގެ ކުޅުމެކެވެ. މި ސެޓު ބަންގްލަދޭޝްއިން ކާމިޔާބުކުރީ 25-18 އިންނެވެ.

ބަންގްލަދޭޝްއާއި ދެކޮޅަށް ރާއްޖެ އިން ކުޅުނު ބައިނަލްއަގްވާމީ އެކުވެރިކަމުގެ ތިން ވޮލީ މެޗަކީ ކުޅިވަރާ ބެހޭ ވަޒީރު އަޙްމަދު މަޚްލޫފްގެ އިސްނެންގެވުމާއިއެކު ލިބުނު ފުރުސަތެކެވެ.

މީގެ ކުރިން މިދިޔަ ޑިސެމްބަރު މަހު ރާއްޖެއިން ވަނީ ސްރީލަންކާއާ ދެކޮޅަށްވެސް ބައިނަލްއަގްވާމީ އެކުވެރިކަމުގެ ތިން މެޗު ކުޅެފައެވެ. އަދި އިންޑިއާގެ ހައިދަރުއާބާދު ސްޕައިކާސް އާއި ދެކޮޅަށް ވެސް އެކުވެރިކަމުގެ ތިންމެޗެއް ވަނީ ކުޅެފައެވެ.