އެކުވެރިކަމުގެ ދެވަނަ މެޗު ބަންގްލަދޭޝްއިން ކާމިޔާބުކޮށްފި

ރާއްޖެއިން ބަންގްލަދޭޝް އާއި ދެކޮޅަށް ކުޅޭ އެކުވެރިކަމުގެ ސިލްސިލާ މެޗުތަކުގެ ތެރެއިން ދެވަނަ މެޗު ވާދަވެރި ކުޅުމަކަށްފަހު ބަންގްލަދޭޝްއިން ކާމިޔާބުކޮށްފިއެވެ.

ބުދަ ދުވަހުގެރޭ ޒުވާނުންގެ މަރުކަޒު އެތެރޭ ކޯޓުގައި ކުޅުނު މި މެޗު ބަންގްލަދޭޝްއިން ކާމިޔާބުކުރީ 3-1 ސެޓުންނެވެ.

މި މެޗުގެ ފުރަތަމަ ސެޓުގައި ރާއްޖޭގެ ޓީމުގެ ފަރާތުން ދަށް ކުޅުމެއް ފެނިގެންދިޔައިރު، މި ސެޓު ބަންގްލަދޭޝްއިން ވަނީ ފަސޭހަކަމާއެކު 19-25 އިން ކާމިޔާބުކޮށްފައެވެ. މި ސެޓުގައި ކޯޗު މުޙައްމަދު ސާޖިދު (ބޮޑުކާއްޓޭ) ވަނީ ޒުވާން ކުޅުންތެރިންނަށް ފުރުސަތު ދީފައެވެ. އެގޮތުން މާއިދު މުޙައްމަދަށް ފުރުސަތު ދިންއިރު މިއީ މާއިދު ގައުމީ ޖާޒީގައި ކުޅުުނު ދެވަނަ މެޗެވެ.

މެޗުގެ ދެވަނަ ސެޓުގައި ރާއްޖޭގެ ޓީމުގެ ފަރާތުން ތަފާތު މޮޅު ކުޅުމެއް ފެނިގެންދިޔައިރު، ސެޓު ފަށައިގެން ރާއްޖެއިން ވަނީ ހަތް ޕޮއިންޓްގެ ލީޑެއް ނަގައިފައެވެ. އެކަމަކު ބަންގްލަދޭޝްއިން ކުޅުން ރަނގަޅުކޮށް 7-7 އިން އެއްވަރުކުރިއެވެ. އޭގެ ފަހުން ރާއްޖޭގެ އާދަމް ފައިރޫޒް އާއި އިސްމާއިލް ސާޖިދު (ކުޑަކާއްޓޭ)ގެ ބާރު ހަމަލާތަކާއެކު މި ސެޓު ރާއްޖެއިން ގެންދިޔައީ 25-16 އިންނެވެ.

ތިންވަނަ ސެޓުގައި ބަންގްލަދޭޝްއިން ކުޅުން ރަނގަޅުކުރިއިރު، ބަންގްލަދޭޝް ޓީމުން ކުރި އެޓޭކްތައް ރިސީވް ކުރުމުގައި ރާއްޖޭގެ ކުޅުންތެރިންގެ ފަރާތުން ގިނަ ގޯސްތަކެއް ފެނިގެންދިޔައެވެ. އަދި މި ސެޓުގައި ރާއްޖޭގެ ކުޅުންތެރިން ކުރި އެޓޭކްތައް ހުއްޓުވުމުގައި ބަންގްލަދޭޝް ކުޅުންތެރިންގެ ފަރާތުން މޮޅު ބްލޮކްތަކެއް ފެނިގެންދިޔައެވެ. މި ސެޓު ބަންގްލަދޭޝްއިން ގެންދިޔައީ 15-25 އިންނެވެ.

މެޗުގެ ހަތަރުވަނަ ސެޓުގައި ދެ ޓީމުގެ ފަރާތުން ފޯރިގަދަ ކުޅުމެއް ފެނިގެންދިޔައިރު، މި ސެޓުގައި ދެ ޓީމުގެ ފަރާތުންވެސް ފެނިގެންދިޔައީ ހަމަހަމަ ކުޅުމެކެވެ. މި ސެޓުގައި ރާއްޖޭގެ ކުޑަކާއްޓޭ އާއި އާދަމް ނަސީމް (އެޑަމާ)ގެ މޮޅު އެޓޭކްތަކެއް ފެނިގެންދިޔަ ނަމަވެސް ސެޓުގެ ފަހުކޮޅު ހެދުނު ގޯސްތަކުގެ ފައިދާ ނަގާ ބަންގްލަދޭޝްއިން މި ސެޓު ކާމިޔާބުކުރީ 21-25 އިންނެވެ.

ބުދަ ދުވަހުގެރޭ ކުޅުނު މެޗު ބައްލަވާލައްވަން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ އިތުރުން ނައިބު ރައީސް ފައިސަލް ނަސީމް އަދި ކުޅިވަރާ ބެހޭ ވަޒީރު އަޙްމަދު މަޙްލޫފް ވަޑައިގެންނެވިއެވެ.