ސަވާދީއްތަ ދަތުރު: ދިވެހި ކެއުންތަކުގެ ރަހަ ބަލާލަން ފުރުސަތު ލިބުމުން ފަތުރުވެރިން ތިބީ ވަރަށް ހިތްހަމަޖެހިފައި

ސަވާދީއްތަ ދަތުރުގައި ހުރިހާ ފަތުރުވެރިން ވެސް ދިވެހި ކެއުންތަކުގެ ރަހަ ބަލާލުމަށް ފުރުސަތު ލިބުމުން ވަރަށް ހިތްހަމަޖެހިގެން ތިބި ކަމަށް މޯލްޑިވްސް އިންޓަގްރޭޓަޑް ޓޫރިޒަމް ޑިވޮލޮޕްމަންޓް ކޯޕަރޭޝަން (އެމްއައިޓީޑީސީ) އިން ބުނެފިއެވެ.

އެމްއައިޓީޑީސީ އިން ބުނީ ދިވެހި ކެއުންތަކުގެ ރަހަ ބަލާލުމަށް ފުރުސަތު ލިބުމުން ފަތުރުވެރިން ވަރަށް ހިތްހަމަޖެހިގެން ތިބިއިރު އެމީހުން މީގެ ކުރިން ރާއްޖެއަށް އެތައް ފަހަރަކު ދަތުރުކޮށްފައިވީ ނަމަވެސް ދިވެހި ކައުންތަކުގެ ރަހަ ބަލާލުމުގެ ފުރުސަތު ނުލިބޭ ކަމަށެވެ. އަދި މި ދަތުރުގެ ތެރެއިން ދިވެހި ކެއުންތަކުގެ ރަހަ ބަލާލުމަށް ފުރުސަތު ލިބުމުން، އެމީހުންނަށް ކެއުންތައް ވަރަށް ކަމުގޮސްފައިވާ ކަަމަށެވެ.

އެމްއައިޓީޑީސީ އިން ބުނީ ބުދަ ދުވަހުގެ ހެނދުނު 09:15 ގައި އުތީމަށް ފަތުރުވެރިން ގޮސް، ސްކޫލު ބެލުމަށްފަހު، ބޮޑުތަކުރުފާނުގެ ހަނދާނީ މަރުކަޒާއި އުތީމު ގަނޑުވަރަށާއި މިސްކިތް ޒިޔާރަތްކޮށްފައިވާ ކަމަށެވެ. ފަތުރުވެރިން އުތީމަށް ކުރަމުން އައި ދަތުރު މިހާރު ނިމިފައިވާ ކަމަށް ވެސް އެމްއައިޓީޑީސީ އިން ބުންޏެވެ. ބުރާސްފަތި ދުވަހު މި ޓީމު ދަތުރުކުރުމަށް ހަމަޖެހިފައިވަނީ ހދ. ނޮޅިވަރަންފަރަށެވެ.

ސޯޝަލް މީޑިއާގައި ސެލެބްރިޓީ ފެންވަރުގެ ދެޔޮޓެއް ސަވާދީއްތަ ދަތުރުގައި ބައިވެރިވަމުން އަންނަކަމަށް ވެސް އެމްއައިޓީޑީސީ އިން ވަނީ ބުނެފައެވެ. ސަވާދީއްތަ ދަތުރު އިންތިޒާމްކުރާ އެމްއައިޓީޑީސީގެ މެނޭޖިންގ ޑިރެކްޓަރ މުހައްމަދު ރާއިދު ރާއްޖެއެމްވީއަށް މައުލޫމާތުދެއްވަމުން ވިދާޅުވީ, ސޯޝަލް މީޑިއާގައި ސެލެބްރިޓީ ފެންވަރުގެ ދެޔޮޓެއް ސަވާދީއްތަ ދަތުރުގައި ބައިވެރިވަމުން އަންނަކަމީ މިހަރަކާތަށް ލިބުނު ވަރަށް ބޮޑު ކުރިއެރުމެއް ކަމަށެވެ. މި ދަތުރުގައި ބައިވެރިވެފައިވާ ޔޮޓުތަކުގެ ތެރެއިން ސެއިލިން ޒަޓާރާގައި ޔޫޓިއުބުގައި ހަތަރު ލައްކައަށްވުރެ ގިނަ ފޮލޯވަރުން އެބަތިއްބެވެ. އަދި މި ދަތުރުގައި ބައިވެރިވާ ސެއިލިން އެކުއޭރިިއަސްގެވެސް ގިނަ އަދަދެއްގެ ފޮލޯވަރުން ހުރިކަމަށް ރާއިދު ވިދާޅުވިއެވެ.

ސަވާދީއްތަ ދަތުރަކީ އެމްއައިޓީޑީސީގެ ފަރާތުން މުޅި ދުނިޔެއަށް ހުޅުވާލައިގެން ކުރިއަށްގެންދާ ރެލީއެކެވެ. އެމްއައިޓީޑީސީގެ ފަރާތުން މިހަރަކާތް ކުރިއަށް ގެންދިޔުމަށް ގަސްދުކޮށްފައިވަނީ ލޯކަލް ޓޫރިޒަމް، ހެރިޓޭޖް ޓޫރިޒަމް އަދި ރޫރަލް ޓޫރިޒަމް ހިމެނޭ ގޮތަށެވެ.

މިދަތުރަށް "ސަވާދީއްތަ ދަތުރު" ގެ ނަން ދެވިފައިވަނީ، ދިވެހިރާއްޖޭގެ ޤައުމީ ބަތަލު، އައްސުލްތާނު ޣާޒީ މުހައްމަދު ތަކުރުފާނު އަލްއައުޒަމް ސިރީ ސަވާދީއްތަ މަހާރަދުންނާއި ގުޅުވައިގެންނެވެ.