ރާބިތަތުލް އާލަމިލް އިސްލާމީގެ އޮފީހެއް ރާއްޖޭގައި ގާއިމުކުރުމަށް މަޝްވަރާކޮށްފައިވާ ކަމަށް ފޮރިން މިނިސްޓްރީން ބުނެފިއެވެ.
ރާބިތަތުލް އާލަމިލް އިސްލާމީގެ ސެކްރެޓަރީ ޖެނެރަލް، ޝައިޚް ޑޮކްޓަރ މުހައްމަދު ބިން އަބްދުލްކަރީމް އަލް އީސާ ރާއްޖެއަށް ކުރައްވަމުން ގެންދަވާ ދަތުރުފުޅުގެ ތެރެއިން, އަންގާރަ ދުވަހު ވަނީ ފޮރިން މިނިސްޓްރީގެ ސްޓޭޓް މިނިސްޓަރު އަހުމަދު ޚަލީލްއާ ބައްދަލުކުރައްވައި ދެގައުމުން ގުޅިގެން ކުރެވޭނެ މަސައްކަތްތަކާމެދު ފުޅާދާއިރާއެއްގައި މަޝްވަރާ ކުރައްވާފައެވެ. މި މަޝްވަރާ ބައްދަލުވުމަށްފަހު ބޭއްވި ނޫސްވެރިންގެ ބައްދަލުވުމުގައި ސްޓޭޓް މިނިސްޓަރު ޚަލީލް ވިދާޅުވީ, ރާބިތަތުލް އާލަމިލް އިސްލާމީގެ އޮފީހެއް ރާއްޖޭގައި ގާއިމުކުރުމަށް މަޝްވަރާ ކޮށްފައިވާ ކަމަށެވެ.
އިސްލާމްދީނާ ގުޅޭގޮތުން ގިނަ މަޝްވަރާތަކެއް ކޮށްފައިވާކަން ފާހަަގަކުރައްވައި ޚަލީލް ވިދާޅުވީ, އިސްލާމީ އުއްމަތަށް ކުރިމަތިވެފައިވާ ބޮޑެތި މައްސަލަތަކާއި، ދިމާވަމުންދާ މައްސަލަތަކާއި، ޓެރަރިޒަމާ ދެކޮޅަށް ކުރެވޭ މަސައްކަތްތަކާއި، ހަރުކަށި ފިކުރު ހުއްޓުވުމަށް ހިންގާނެ ޕްރޮގްރާމްތަކާމެދު ފުޅާދާއިރާއެއްގައި މަޝްވަރާކޮށްފައިވާ ކަމަށެވެ. އަދި އިސްލާމް ދީނުގެ ސައްހަ އަގީދާ ފެތުރުމާއި، އިސްލާމްދީނާމެދު އުފައްދާ ނަފްރަތު ހުއްޓުވުމާ ބެހޭގޮތުންނާއި، ރާއްޖޭގެ ދީނީ އިލްމުވެރިންނާއި އިމާމުން އިތުރަށް ތަމްރީނުކުރުމަށް ޕްރޮގުރާމްތަކެއް ހިންގުމަށް މަޝްވަރާކޮށްފައިވާ ކަމަށް ޚަލީލް ވިދާޅުވިއެވެ. މީގެ އިތުރުން އަންހެންނުންގެ ހައްގުތައް ކަށަވަރު ކުރުމާއި އަންހެނުންނަށް ފުރުސަތު ދިނުމާ ގުޅޭގޮތުން ވެސް ފުޅާ ދާއިރާގައި މަޝްވަރާކޮށްފައިވާކަމަށެވެ.
ޚަލީލް ވިދާޅުވީ މަޝްވަރާ ބައްދަލުވުމުގައި, ރާބިތާއާ ގުޅިގެން ކުރެވޭނެ މަސައްކަތްތަކާއި، އެހީތެރިކަން ފޯރުކޮށްދެވޭނެ ދާއިރާތަކާ ގުޅޭގޮތުން މަޝްވަރާކޮށްފައިވާކަމަށެވެ.
ރާބިތަތުލް އާލަމިލް އިސްލާމީގެ ސެކްރެޓަރީ ޖެނެރަލް ދެއްވި ވާހަކަފުޅުގައި, ނިޝާން ކަލާފާނުގެ ޝަރަފުގެ އިއްޒަތް އަރުއްވާފައިވާތީ އެކަން ފާހަގަކުރެއްވިއެވެ. އަދި އެއީ ލިބުނު ކުރިއެރުމެއް ގޮތުގައި ފާހަގަކުރެއްވިއެވެ. ރާއްޖެއަށް ކުރެއްވި ދަތުރުފުޅުގައި މަގުސަދު ހާސިލްވެފައިވާ ކަމަށާއި، މުހިންމު މަޝްވަރާތަކެއް ކުރެވިފައިވާކަމަށް ވިދާޅުވިއެވެ.
ރާބިތާގެ ސެކްރެޓަރީ ޖެނެރަލް ރާއްޖެއަށް ކުރައްވާ ދަތުރުފުޅުގައި ވަނީ ރައީސް އިބްރާހިމް މުހައްމަދު ސޯލިހާ ވެސް ބައްދަލުކުރައްވައި މުހިންމު މަޝްވަރާތަކެއް ކުރައްވާފައެވެ.
