ށ. ކޮމަންޑޫ ދާއިރާގެ ބައި އިލެކްޝަން ކާމިޔާބު ކުރެއްވި އެމްޑީޕީގެ ކެންޑިޑޭޓް މުހައްމަދު ރާޝިދު މެމްބަރު ކަމުގެ ހުވާ ކުރެއްވުން ބުދަ ދުވަހު އޮންނާނެ ކަމަށް ރައްޔިތުންގެ މަޖިލީހުން ބުނެފިއެވެ.

މަޖިލީހުގެ އިދާރާއިން ބުނީ ރާޝިދު މެމްބަރު ކަމުގެ ހުވާ ކުރެއްވުން އޮންނާނީ ބުދަ ދުވަހުގެ ހެނދުނު 8:30ގައި ރައްޔިތުންގެ މަޖިލީހުގެ އިދާރާގައި ބާއްވާ ޚާއްސަ ރަސްމިއްޔާތެއްގައި ކަމަށެވެ.

މިމަހުގެ 5ވީ ހޮނިހިރު ދުވަހު ކުރިޔަށްދިޔަ ރައްޔިތުންގެ މަޖިލީހުގެ ކޮމަންޑޫ ދާއިރާގެ ބައި އިލެކްޝަން އެމްޑީޕީ ކެންޑިޑޭޓް މުހައްމަދު ރާޝިދު ކާމިޔާބު ކުރެއްވީ ބޮޑު ތަފާތަކުންނެވެ. އިލެކްޝަންސް ކޮމިޝަނުން މިމަހުގެ 7 ވީ ހޯމަ ދުވަހު ވަނީ އިންތިޚާބުގެ ދާއިމީ ނަތިޖާ އިއުލާން ކޮށްފައެވެ. އިންތިޚާބުގެ ނަތީޖާ ދައްކާގޮތުން ރާޝިދަށް ވަނީ 1441 ވޯޓު ލިބިވަޑައިގެންފައެވެ. މޫސާ ފަތުހީއަށް ލިބިވަޑައިގަތީ 1161 ވޯޓެވެ. ދެން މިއިންތިޚާބުގައި ވާދަކުރެއްވި އެމްއެންޕީ ކެންޑިޑޭޓް އަބްދުލް ހަންނާން އިދުރީސަށް ލިބިވަޑައިގަތީ 323 ވޯޓެވެ.

ކޮމަންޑޫ ދާއިރާގެ ބައި އިލެކްޝަން ބާއްވާފައިމިވަނީ އެދާއިރާގެ މެމްބަަރަކަށް ހުންނެވި ހުސައިން ވަހީދު އަވަހާރަވުމުންނެވެ. މީގެ ކުރީގެ އިންތިޚާބުތަކުގައި ވެސް ކޮމަންޑޫ ދާއިރާގެ ގޮނޑި ފުރުއްވާފައިވަނީ އެމްޑީޕީގެ ކެންޑިޑޭޓުންނެވެ. ހުސައިން ވަހީދުގެ ކުރިން އެ ދާއިރާގެ މެމްބަރަކަށް ހުންނެވީ އަހުމަދު ނާޝިދު (އޭޑީކޭ ނާޝިދު)އެވެ.