އާސެނަލަށްވުރެ ބޮޑު ކްލަބެއްގެ ގޮތުގައި ނިއުކާސަލް ފެނުމުގެ ފުރުސަތު އެބައޮތް

ކުރިއަށް އޮތް ތަނުގައި އާސެނަލަށްވުރެ ބޮޑު ކްލަބެއްގެ ގޮތުގައި ނިއުކާސަލް ފެނުމުގެ ފުރުސަތު އެބައޮތް ކަމަށް އެ ޓީމަށް މިދިޔަ ފިނި މޫސުމުގެ ޓްރާންސްފާ ބާޒާރުގައި ބަދަލުވި ބްރެޒިލްގެ މިޑްފިލްޑަރު ބްރޫނޯ ގިމާރޭސް ބުނެފިއެވެ.

މިދިޔަ ޓްރާންސްފާ ބާޒާރުގައި ނިއުކާސލަް އިން ވަނީ އެޓީމުގެ ސްކޮޑް ވަރުގަދަ ކުރުމަށް ގިނަ ކުޅުންތެރިންތަކެއްގެ ސޮއި ހޯދާފައެވެ. އޭގެ ތެރޭގައި ފްރާންސްގެ ލިޔޯނަށް ކުޅެމުން އައި ހުނަރުވެރި ތަރި ގިމާރޭސް ހިމެނެއެވެ. ބްރެޒިލްގެ ސީނިއާ ގައުމީ ޓީމަށްވެސް ކުޅެމުން އަންނަ އުމުރުން 24 އަހަރުގެ ގިމަރޭސްގެ ސޮއި ހޯދުމަށް ނިއުކާސަލްއިން ވަނީ 57 މިލިއަން ޑޮލަރު ޚަރަދުކޮށްފައެވެ.

ނިއުކާސަލަށް ސޮއި ކުރި ސަބަބެއްގެ ގޮތުގައި ގިމާރޭސް ބުނީ ކުރިއަށް އޮތް އަހަރުތަކުގެ ތެރޭގައި ނިއުކާސަލަކީ އާސެނަލަށްވުރެ ބޮޑު ކްލަބަކަށް ވާނެ ކަމުގެ ޔަގީންކަން އެބައޮތް ކަމަށެވެ. އަދި ނިއުކާސަލްއަށް އައުމަށް ޝައުގުވެރިވީ އެ ކްލަބުގައި ގިނަ ކަންތައްތަކެއް ހުރުމުން ކަމަށާއި، އޭގެ ތެރޭގައި ކްލަބް ކުރިޔަށްދާން ހަދާފައި އޮތް ޕްލޭން ގަބޫލުކުރާ ކަމަށް ގިމާރޭސް ބުންޏެވެ. އަދި ކުރިޔަށް އޮތް އަހަރުތަކުގެ ތެރޭގައި ނިއުކާސަލް ވެގެންދާނީ ފުޓުބޯޅައިގެ ބޮޑު ބާރަކަށް ކަމަށް ގިމާރޭސް ބުންޏެވެ.

ނިއުކާސަލްގެ މެޖޯރިޓީ ހިއްސާ މިހާރު އޮތް ޕީއައިއެފްގެ މިލްކިއްޔާތުގައި 434 ބިލިއަން ޑޮލަރު އެބަހުއްޓެވެ. މިއީ ފުޓުބޯޅަ ކްލަބެއް ހިންގާ އެންމެ ބޮޑު މިލްކިއްޔާތެވެ. ނިއުކާސަލްއާ ދެން އެންމެ ކައިރިކުރާ މެންޗެސްޓާ ސިޓީ ހިންގަމުން އަންނަ ސިޓީ ފުޓުބޯޅަ ގްރޫޕްގެ ވެރިޔާ ޔޫއޭއީގެ ޝެއިހް މަންސޫރުގެ މިލްކިއްޔާތުގައި އުޅެނީ 32 ބިލިއަން ޑޮލަރެވެ.

މީގެ ހަަތަރު މަހެއްހާ ދުވަސް ކުރިން ސައުދީ އަރަބިއްޔާގެ ޕަބްލިކް އިންވެސްޓްމަންޓް ފަންޑް (ޕީއައިއެފް) އިން އިސްވެ، ނިއުކާސަލް ގަތްއިރު، އެ ޓީމުން ވަނީ މިދިޔަ މަހުގެ ޓްރާންސްފާ މާކެޓްގައި ކުޅުންތެރިން ގަންނަން 122 މިލިއަން ޑޮލަރު ހަރަދުކޮށްފައެވެ.