ކަމާ ގުޅުންހުރި އިދާރާތަކުން މައުލޫމާތު ހޯދުމަށްފަހު, މާލެ ސިޓީ ޑަބްލިއުޑީސީ އިމާރާތުގެ ތެރޭގައި ބަންދުކުރި މައްސަލަ ހިއުމަންރައިޓްސް ކޮމިޓީން ބަލަން ނިންމައިފިއެވެ.
މިކަމާއި ގުޅޭ ގޮތުން ރާއްޖެއެމްވީއަށް މައުލޫމާތުދެއްވަމުން، މަޖިލީހުގެ ހިއުމަންރައިޓްސް އެންޑް ޖެންޑަރ ކޮމިޓީގެ މުގައްރިރު އަދި ހިންނަވަރު ދާއިރާގެ މެންބަރު ޖީހާން މަހުމޫދު ވިދާޅުވީ, އަންނަ ހަފުތާގެ ހޯމަ ދުވަހަށް ޑަބްލިއުޑީސީ ކޮމިޓީއަށް ގެންނަން ނިންމާފައިވާ ކަމަށެވެ. އެމީހުން ކޮމިޓީއަށް ގެންނަން ނިންމީ އެމީހުންނަށް ހުރި ދަތިތައް އޮޅުންފިލުވުމަށާއި އަދި މި މައްސަލާގައި އެމީހުންނާ ސުވާލުކުރުމަށް ކަމަށެވެ.
ޖީހާން ވިދާޅުވީ ކޮމިޓީން ނިންމީ އެމީހުން ކޮމިޓީއަށް ގެނައުމުގެ ކުރިން އެމީހުންގެ ފަރާތުންނާއި އެ މައްސަލަ ބަލަމުން އަންނަ ފަރާތްތައް ކަމުގައިވާ އެލްޖީއޭ އަދި ޕޮލިހަށް ލިޔެގެން މިކަން ހިނގާފައިވާ ގޮތް, އަދި އެ މައްސަލަ ބަލަމުންދާ ގޮތް ސާފުކުރުމަށް ކަމަށެވެ. ކޮމިޓީން މައްސަލަ ބަލާނެ ކަމަށާއި، މަޖިލީހުގެ ލާމަރުކަޒީ ކޮމިޓީގައި މި މައްސަލަ ބަލާގޮތް ބަލާފައި ހިއުމަންރައިޓްސް ކޮމިޓީން ލާމަރުކަޒީ ކޮމިޓީއާ ގުޅިގެން ނުވަތަ ވަކިން ވެސް މި މައްސަލަ ބަލަމުންދާނެ ކަމަށެވެ.
ޖީހާން ވިދާޅުވީ ޑަބްލިއުޑީސީއަށް ދަތިކުރުމުގެ މައްސަލަތައް ދިމާވާތީ އެކަން ކުށްވެރި ކުރައްވާ ކަމަށެވެ. އަދި ކޮމިޓީތަކަށް ލިބެންޖެހޭ ހައިސިއްޔަތާއި މަގާމާއި އެމީހުންނަށް މަސައްކަތް ކުރުމުގެ މާހައުލަށް ހުރަސްއަޅާ އެއްވެސް ބަޔަކު އެއްވެސްކަމެއް ކުރެވިގެން ނުވާނެކަމަށް ގަބޫލުކުރައްވާ ކަމަށާއި، މަޖިލީހުގެ ހައިސިއްޔަތުން މުއައްސަސާތައް ޒިންމާދާރުކުރުވައިގެން ޑަބްލިއުޑީސީތަކަށް މަސައްކަތް ކުރެވޭނެ މަގުފަހިކޮށްދިނުމަށް މަޖިލީހުގެ ތެރެއިން މަސައްކަތް ކުރައްވާނެ ކަމަށެވެ.
ހިއުމަން ރައިޓްސް އެންޑް ޖެންޑަރ ކޮމިޓީގެ ބައްދަލުވުމަށް މި މައްސަލަ ހުށަހެޅީ، އެ ކޮމިޓީގެ ފުރަތަމަ ބައްދަލުވުމުގައި މެންބަރުންނަށް ހުޅުވާލި ފުރުސަތުގައި އެ މައްސަލަ ހުށަހެޅުއްވީ ހޮޅުދޫ ދާއިރާގެ މެންބަރު ޔޫނުސް އަލީއެވެ. ޔޫނުސް ހުށަހެޅުއްވި މައްސަލައިގައި ވަނީ މާލެ ސިޓީގެ އަންހެނުންގެ ތަރައްގީއަށް މަސައްކަތް ކުރާ ކޮމިޓީގެ މެންބަރުން މާލެ ސިޓީ ކައުންސިލުން ބަންދު ކުރި ބަންދުކުރުން ހިނގައިދިޔަ ގޮތް ކޮމިޓީން ބެލުމަށެވެ. މި މައްސަލައަށް ތާއީދު ކުރެއްވީ މީދޫ ދާއިރާގެ މެންބަރު ރޮޒައިނާ އާދަމެވެ.
މައްސަލައަށް ތާއީދުކުރައްވައި ރޮޒައިނާ ވިދާޅުވީ, ޑަބްލިއުޑީސީ މެންބަރުން ބަންދުކުރި މައްސަލަ ބަލަން ޖެހޭ ކަމަށާއި، އެ މައްސަލަ އެލްޖީއޭއަށް ވެސް ހުށަހަޅާފައިވާ ކަމަށާއި، އެހެންކަމުން އެލްޖީއޭއިން އެ މައްސަލަ ކުރިއަށްދާ ގޮތް ބެލުން މުހިންމު ކަމަށެވެ.
