އެއީ މީގެ ހަތަރު އަހަރު ކުރިންނެވެ. އޭރުގެ ސަރުކާރުން އޮތީ ނޫސްވެރިކަމުގެ މިނިވަންކަމާއި ޚިޔާލު ފާޅުކުރުމުގެ މިނިވަންކަން އިންތިހާއަށް ހަނިކޮށްފައެވެ. ނޫސްވެރިންނަށް އޭރު އެތައް ދުއްތުރާތަކާއި, ސްޓޭޝަންތަކަށް ވެސް އެތައް އުނދަގޫތަކެއް ކުރިމަތި ކުރުވިއެވެ. ރައްޔިތުންނަށް ޚަބަރާއި މައުލޫމާތު ގެނެސްދިނުމަށް އޭރު ނޫސްވެރިން ހަރަކާތްތެރިވީ ބިރުވެރިކަމެއްގެ ތެރޭގައި, ފުރާނަ އަތްމައްޗަށް ލައިގެންނެވެ. 2018 ވަނަ އަހަރުގެ ފެބްރުއަރީ މަހުގެ 8 ވަނަ ދުވަހަކީ ނޫސްވެރިކަމުގެ ހަޔާތުގައި ރާއްޖެޓީވީއަށް ކުރިމަތިލާން ޖެހުނު ކަޅު ދުވަހެކެވެ. އެއީ ހަނދާނުން ފޮހެލަން ދަތި ދުވަހަކެވެ.

ރާއްޖެޓީވީއަށް ލިބެމުންދިޔަ އިންޒާރުތަކާ ގުޅިގެން، ބިރުވެރިކަމެއް ނެތި ނޫސްވެރިންނަށް މަސައްކަތް ކުރެވޭނެ މާހައުލެއް ރާއްޖޭގައި އޭރު އޮތް ކަމަށް ގަބޫލު ނުކުރެވޭތީ, ރާއްޖެޓީވީގެ އާންމު ކޮންޓެންޓް ބްރޯޑްކާސްޓް ކުރުން އެ ދުވަހު ވަނީ މެދުކަނޑާލާފައެވެ. ކޮންޓެންޓް ބްރޯޑްކާސްޓް ކުރުން މެދުކަނޑާލީ ބޭނުންވެގެނެއް ނޫނެވެ. އޭރު އެހެން ގޮތެއް ނެތުމުން މަޖުބޫރުވެގެންނެވެ. އޭރު އާންމު ކޮންޓެންޓް މެދުކަނޑާލަން މަޖުބޫރުވީ، މިނިވަން ނޫސްވެރިކަމުގެ މާހައުލެއް ނެތުމާއި، ރާއްޖެޓީވީއާއި ސްޓޭޝަންގެ މުވައްޒަފުންގެ ސަލާމަތާއި ރައްކާތެރިކަން ކަށަވަރު ކޮށްދިނުމަށް ދައުލަތުގެ ކަމާބެހޭ މުއައްސަސާތަކުން އެއްބާރުލުން ނުދިނުމުންނެވެ.

2018 ވަނަ އަހަރުގެ ފެބްރުއަރީ މަހުގެ އެއްވަނަ ދުވަހުގެރޭ ސުޕްރީމް ކޯޓުން ނެރުނު އަމުރަށްފަހު ރާއްޖޭގައި ހިނގަމުންދާ ކަންތައްތަކުގެ ތަފްސީލް ހިމަނައިގެން ކުރިއަށް ގެންދިޔަ 24 ގަޑިއިރުގެ ކަވަރޭޖާ ގުޅިގެން އެ ސްޓޭޝަނަށް ތަފާތު އިންޒާރުތައް އޭރު ލިބުނެވެ. އެގޮތުން އޭރުގެ ސަރުކާރަށް ތާއީދު ކުރާ ބަޔަކު ރާއްޖެޓީވީ ހުންނަ އިމާރާތުގެ ކައިރިއަށް އައިސް ސްޓޭޝަން ރޯކޮށްލުމަށް ގޮވުމާއި، ސޯޝަލް މީޑިއާގައި ތަފާތު އިންޒާރުތައް ދީފައިވެއެވެ. އެހެންނަމަވެސް އެއިން އެއްވެސް ކަމަކަށް ދައުލަތުގެ ފަރާތުން އެއްވެސް ފިޔަވަޅެއް އަޅާފައެއްނުވެއެވެ. އަދި ކުއްލި ނުރައްކަލުގެ ހާލަތު އިއުލާން ކުރުމާ ގުޅިގެން ރާއްޖެޓީވީ އަށާއި ރާއްޖެޓީވީގެ މުވައްޒަފުންނަށް ދެމުންދިޔަ އިންޒާރުތައް އިތުރުވެގެން ދިޔައެވެ.

މިކަންތައްތަކާ ގުޅިގެން ރާއްޖެޓީވީގެ އާންމު ކޮންޓެންޓް ބްރޯޑްކާސްޓް ކުރުން މެދުކަނޑާލިއެވެ. 56 ގަޑިއިރަށްފަހު 11 ފެބްރުއަރީ 2018ގައި އާންމު ކޮންޓެންޓް ބްރޯޑްކާސްޓް ކުރަން ރާއްޖެޓީވީން ފެށީ އެތައް ބަޔަކު އަލުން ޚިދުމަތް ފެށުމަށް އެދެމުން ދިއުމާއި، ރާއްޖެ ޓީވީއާމެދު ފާޅުކުރި އިޚްލާސްތެރި، ލޮބުވެތި ޝުއޫރުތަކުން ހިތްވަރު ލިބިގެންނެވެ.

މީގެ ކުރިންވެސް ރާއްޖެޓީވީއަށް ތަފާތު އެކި އިންޒާރުދީ، ސްޓޭޝަން ހުއްޓުވުވާލުމަށް ގިނަ މަސައްކަތްތަކެއް ކޮށްފައިވެއެވެ. އެގޮތުން ރާއްޖެޓީވީގެ ތަކެއްޗަށް ގެއްލުން ދިނުމާއި، މުވައްޒަފުންގެ ފުރާނައަށް ނުރައްކާވާފަދަ ހަމަލާތައް ދިނުމާއި، ސްޓޭޝަންގައި ހުޅުޖަހައި ރޯކޮށްލުމުގެ އިތުރުން ނޫސްވެރިން ހައްޔަރުކޮށް ނުހައްގު ދައުވާ އުފުލުމާއި، ބޮޑެތި އަދަދުތަކުން ޖޫރިމަނާތައް ކޮށްފައިވެއެވެ.

އެހެންނަމަވެސް މިހުރިހާ ކަމެއް މިއަދު ފަހަނައަޅައި ގޮސް ރާއްޖެޓީވީއަށް މިވަނީ އަމާން މާހައުލެއްގައި ރައްޔިތުންނަށް ޚަބަރާއި މައުލޫމާތު ފޯރުކޮށްދިނުމުގެ ފުރުސަތު ލިބިގެން ގޮސްފައެވެ. މި ސަރުކާރު އައި ފަހުން ނޫސްވެރިކަމުގެ މިނިވަންކަން އިންތިހާއަށް ވަނީ ފޯރުކޮށްދީފައެވެ. ސަރުކާރާއި އިދިކޮޅު މީޑިއާއަކަށް ވިޔަސް އެމީހުންނަށް ވެސް މި މިނިވަންކަން ވަނީ ފޯރުކޮށްދީފައެވެ. ސަރުކާރަށް ފާޑުކިޔައި، ރައީސުލްޖުމްހޫރިއްޔާ އިބްރާހީމް މުހައްމަދު ސާލިހަށް ފާޑުކިޔުމަށްފަހު އެކި ރިޕޯޓުތައް ހަދައި ދައްކަމުން ދާއިރު ވެސް އެ މީޑީއާތަކާމެދު މި ސަރުކާރުން ފިޔަވަޅެއް ނާޅައެވެ. ޖޫރިމަނާއެއް ނުކުރެއެވެ. އެ ނޫސްވެރިންނަށް ވެސް އެހެން ނޫސްވެރިންނެކޭ އެއްފަދައިން މަސައްކަތް ކުރުމުގެ މާހައުލު މިވަނީ ފަހިކޮށްދީފައެވެ. މިކަމުން ވެސް ދައްކުވައިދެނީ މިހާރު ރާއްޖޭގައި ނޫސްވެރިންނަށް މިނިވަންކަން އޮތް މިންވަރެވެ. މިއީ މިއަދު ދެބަސްވެވޭނެ ކަމެއް ނޫނެވެ.