ބަންގްލަދޭޝް އަތުން މޮޅުވުމަކީ ފާހަގަކުރަން ޖެހޭ ބޮޑު ކާމިޔާބީއެއް ކަމަށް ގައުމީ ފިރިހެން ވޮލީބޯޅަ ޓީމުގެ ކޯޗު މުޙައްމަދު ސާޖިދު (ކާއްޓޭ) ބުނެފިއެވެ.

ފާއިތުވެދިޔަ ހަ އަހަރު ތެރޭގައި ރާއްޖެއަށް ބަންގްލަދޭޝްގެ މައްޗަށް ކުރި ހޯދިފައިނުވާއިރު، އެންމެ ފަހުން ބަންގްލަދޭޝްގެ މައްޗަށް ރާއްޖެއަށް ކުރި ހޯދިފައިވަނީ 2016 ވަނަ އަހަރު އންޑިއާގެ ގުވަހާޓީގައި ކުޅުނު ސައުތު އޭޝިއަން ގޭމްސްގެ ގްރޫޕް ސްޓޭޖުގައި ކުޅުނު މެޗުގައެވެ. އެ ފަހަރު ބަންގްލަދޭޝްގެ މައްޗަށް ރާއްޖެއިން ސީދާ ތިން ސެޓުން ކުރި ހޯދި ނަމަވެސް އޭގެ ފަހުން 2016، 2018 އަދި 2021 ގައި ކުޅުނު ސެންޓްރަލް ޒޯން ވޮލީބޯޅަ މުބާރާތުގެ މެޗުތަކުން ރާއްޖެ ވަނީ ބަންގްލަދޭޝްގެ އަތުން ބަލިވެފައެވެ.

ބަންގްލަދޭޝްގެ އަތުން ހޯދި މޮޅަށްފަހު މީޑިއާތަކަށް ދިން އިންޓަރވިއުގައި ކާއްޓޭ ބުނީ މިދިޔަ ޑިސެމްބަރު މަހު އޮތް ސެންޓްރަލް ޒޯން މުބާރާތުގައި ބަންގްލަދޭޝް ފެނިގެންދިޔައީ ވަރަށް ވަރުގަދަކޮށް ކަމަށެވެ. އެހެންވެ އެވަރުގެ ޓީމެއްގެ އަތުން މޮޅުވުމަކީ ލިބުނު ބޮޑު ކާމިޔާބީއެއް ކަމަށެވެ.

ކާއްޓޭ ބުނީ ފުރަތަމަ ސެޓު ބަންގްލަދޭޝްއިން ގެންގޮސްފައި އޮއްވައި ފަހަތުން އަރާ ޖެހިގެން އައި ތިން ސެޓު ކާމިޔާބުކުރެވުނީ ޓީމެއްގެ ގޮތުގައި ވަރަށް ރަނގަޅަށް ކުޅެގެން ކަމަށެވެ. އަދި މެޗު ރާއްޖޭގެ ކޮޅަށް އަނބުރާލުމުގައި ކެޕްޓަން އިސްމާއިލް ސާޖިދު (ކުޑަކާއްޓޭ)ގެ ދައުރު ބޮޑުކަމަށް ކާއްޓޭ ފާހަގަކުރިއެވެ.

ހޯމަ ދުވަހުގެރޭ ކުޅުނު މެޗަށް ރާއްޖޭގެ ގައުމީ ޓީމުން ނުކުތީ އާއިލީ ކަމެއްގައި މި ވަގުތު ޓީމާއި ދުރުގައި ތިނި ސެޓަރު ހުސެއިން ވިޝާމް (ބުޅިކެ) އާއި ސްޕައިކަރު، ހަސަން ނިލާމް (ޕާޓޭ) ނެތިއެވެ. މި ދެކުޅުންތެރިންގެ ބަދަލުގައި ޓީމުގައި ތިބީ މުޅިން އައު ދެ ކުޅުންތެރިންނެވެ.

ކާއްޓޭ ބުނީ ފުރަތަމަ މެޗުން ބަންގްލަދޭޝްގެ މައްޗަށް ރާއްޖެއިން ކުރިހޯދި ނަމަވެސް އަދިވެސް ރަނގަޅު ކުރަންޖެހޭ ކަންކަން އެބަހުރި ކަމަށެވެ. އަދި ބަންގްލަދޭޝް އާއި ދެކޮޅަށް ކުޅޭ އެކުވެރިކަމުގެ މެޗުތަކުގައި އެކަންކަމަށް ވިސްނާނެ ކަމަށް ކާއްޓޭ ބުންޏެވެ.

ކުޅިވަރާ ބެހޭ ވަޒީރު އަޙްމަދު މަޚްލޫފްގެ އިސްނެންގެވުމާއެކު ބަންގްލަދޭޝް އާއި ދެކޮޅަށް ރާއްޖޭން ދެން ކުޅޭ ދެމެޗު އޮންނާނީ ބުދަ ދުވަހުގެރޭގެ އިތުރުން އަންނަ ހުކުރު ދުވަހުގެ ރެޔެވެ.