ކޮވިޑްގެ ކޭސްތަކުގެ އަދަދު މައްޗަށް ދާން ފެށުމާއެކު އިންޑޮނޭޝިޔާގައި ފިޔަވަޅުތައް ވަރުގަދަކޮށްފި

އިންޑޮނޭޝިޔާގައި ކޮވިޑްގެ ކޭސްތައް މައްޗަށްދާން ފެށުމާއެކު އެޤައުމުގެ ބައެއް ސިޓީތަކުގައި ފިޔަވަޅުތައް ވަރުގަދަކޮށްފިއެވެ.

އިންޑޮނޭޝިޔާގެ ސީނިއަރ ކެބިނެޓް މިނިސްޓަރެއް ވިދާޅުވީ ފިޔަވަޅުތައް ވަރުގަދަކުރަން ނިންމާފައިވަނީ ޖަކާޓާ، ބާލީ އަދި ޖާވާ އައިލެންޑްގެ ދެ ސިޓީއެއްގައެވެ. އެޤައުމުގެ ޓްރާންސްޕޯޓް މިނިސްޓްރީން ނެރެފައިވާ ބަޔާނެއްގައި ބުނެފައިވަނީ ޖަކާޓާ މަގުން އެޤައުމަށް ފަތުރުވެރިން އައުމުގެ ފުރުސަތު ފަހިވެފައިވާކަމަށެވެ.

އޮމިކްރޯން ވޭރިއަންޓާއެކު އިންޑޮނޭޝިޔާގެ ކޮވިޑްގެ ހާލަތު ވަނީ ގޯސްވެފައެވެ. އެގޮތުން އާދިއްތަ ދުވަހު ވަނީ 36،000 މީހުންނަށް ކޮވިޑް ޖެހިގެން ރިޕޯޓްކޮށްފައެވެ. އަދި ހޮސްޕިޓަލްތަކުގައި އެޑްމިޓްކުރާ މީހުންގެ އަދަދު ވަނީ 63 އިންސައްތަ މައްޗަށް ޖެހިލާފައެވެ. ޖެނުއަރީ މަހު ހޮސްޕިޓަލްތަކުގައި އެޑްމިޓްކުރާ މީހުންގެ އިންސައްތަ ހުރީ 45 ގައެވެ.

އަލަށްއެޅި ފިޔަވަޅުތަކާއެކު ސުޕަރމާކެޓްތަކާއި، މޯލްތައް އަދި ރެސްޓޯރެންޓްތައް އޮޕަރޭޓްކުރުމުގެ ހުއްދަ ދީފައިވަނީ އެތަންތަނުގެ 60 އިންސައްތަ ކެޕޭސިޓީގައެވެ. އަދި އަޅުކަންކުރާ ތަންތަނަށްވެސް ވަދެވޭނީ އެތަނެއްގެ 50 އިންސައްތަ އަށް ވާވަރަށެވެ.

ތިން ޕްރޮވިންސެއްގައި މިހާރު ފެންނަމުންދާ ކޭސްތަކުގެ އަދަދު ވަނީ ޑެލްޓާ ވޭރިއަންޓާއެކު މިދިޔަ އަހަރުގެ ޖުލައި މަހު ކުރިމަތިވެ ރާޅުގައި ފެނުނު ކޭސްތަކަށްވުރެ އިތުރުވެފައެވެ.

އިންޑޮނޭޝިޔާގެ އޮފިޝަލުން ބުނާގޮތުގައި ފެބްރުއަރީ މަހުގެ މެދެއްހާ ހިސާބުގައިވެސް ޕީކަށް އަރާނެކަމަށް ނުބެލެވެއެވެ.