ބަންގްލަދޭޝް އާއި ދެކޮޅަށް ކުޅުނު ބައިނަލްއަގްވާމީ އެކުވެރިކަމުގެ ފުރަތަމަ މެޗުން ރާއްޖޭގެ ގައުމީ ވޮލީބޯޅަ ޓީމު މޮޅުވެއްޖެއެވެ.

ހޯމަ ދުވަހުގެރޭ ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު މެޗު ރާއްޖެއިން ކާމިޔާބުކުރީ ފަހަތުން އަރައި 3-1 ސެޓުންނެވެ.

މެޗުގެ ފުރަތަމަ ސެޓު ފަށައިގެން ރާއްޖޭގެ ފަރާތުން އާދައިގެ ކުޅުމެއް ފެނިގެންދިޔައިރު ބަންގްލަދޭޝްގެ ޓީމު ފެނިގެންދިޔައީ ވަރުގަދަ ކޮށެވެ. އެގޮތުން މި ސެޓުގައި ލީޑުގައި އޮވެގެން އިތުބާރާއެކު ބަންގްލަދޭޝްއިން ކުޅުނުއިރު މި ސެޓު އެޓީމުން ކާމިޔާބުކުރީ 22-25 އިންނެވެ.

އެކަމަކު މެޗުގެ ދެވަނަ ސެޓުގައި ރާއްޖޭގެ ޓީމުން ކުޅުން ރަނގަޅުކުރިއިރު މި ސެޓުގައި ރާއްޖޭގެ ކެޕްޓަން އިސްމާއީލް ސާޖިދު (ކުޑަކާއްޓޭ) އާއި އަލީ ހުޒާމް (ހުޒަންޓޭ) ގެ ފަރާތުން ރަނގަޅު އެޓޭކުތަކެއް ފެނިގެންދިޔައެވެ. އެއާއެކު މި ސެޓު ރާއްޖެއިން ގެންދިޔައީ 25-19 އިންނެވެ.

މެޗުގެ ފަހު ދެ ސެޓުގައިވެސް ރާއްޖޭގެ ފަރާތުން މޮޅު ކުޅުމެއް ފެނިގެންދިޔައިރު، ފަހު ދެ ސެޓުގައި އާދަމް ފައިރޫޒްގެ ފަރާތުން މޮޅު ބްލޮކްތަކެއް ވަނީ ފެނިގެން ގޮސްފައެވެ. މީގެ އިތުރުން ކުޑަކާއްޓޭ އަދި ހުޒަންޓޭގެ އިތުރުން އާދަމް ނަސީމް (އެޑަމާ)ގެ ފަރާތުން މޮޅު އެޓޭކްތަކެއް ފެނިގެންދިޔައެވެ. އެއާއެކު މި ދެ ސެޓު ރާއްޖެއިން ގެންދިޔައީ 25-20 އަދި 25-22 އިންނެވެ.

މިދިޔަ ޑިސެމްބަރު މަހު ބަންގްލަދޭޝްގައި ބޭއްވި ސެންޓްރަލް ޒޯން ވޮލީބޯޅަ މުބާރާތުގައި ރާއްޖެ އާއި ބަންގްލަދޭޝް ބައްދަލުކުރި މެޗު ބަންގްލަދޭޝްއިން ކާމިޔާބުކުރީ ސީދާ ތިން ސެޓުންނެވެ. އެހެންނަމަވެސް އެ މެޗަށް ރާއްޖެއިން ނުކުތީ އުނދަގޫ ހާލަތެއްގައެވެ.

ކުޅިވަރާ ބެހޭ ވަޒީރު އަޙްމަދު މަޚްލޫފްގެ އެދުމަށް ބަންގްލަދޭޝްގެ ޓީމުން ރާއްޖޭގައި އެކުވެރިކަމުގެ ތިން މެޗެއް ކުޅުމަށް ވަނީ ހަމަޖެހިފައެވެ. އެގޮތުން ދެވަނަ މެޗު ކުޅޭނީ ބުދަ ދުވަހުގެރޭގައެވެ. އަދި ފަހު މެޗު ކުޅޭނީ ހުކުރު ދުވަހުގެ ރެޔެވެ.