ރާއްޖޭގައި ކޮވިޑް-19 ބޫސްޓަރ ޑޯޒް ފުރިހަމަކުރި މީހުންގެ އަދަދު 91،387ށް އަރައިފިއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)ން އެންމެފަހުން އާންމުކޮށްފައިވާ ތަފާސްހިސާބުތަކަށް ބަލާއިރު, ފެބްރުއަރީ މަހުގެ 6 ވަނަ ދުވަހު 3711 މީހުން ވަނީ ބޫސްޓަރ ޑޯޒް ޖަހާފައެވެ. އެއީ މާލެ ސަރަހައްދުން 711 މީހުންނާއި އަތޮޅުތަކުން 3000 މީހުންނެވެ.

ވެކްސިންގެ ފުރަތަމަ ޑޯޒް 6 ވަނަ ދުވަހު 43 މީހުން ވަނީ ޖަހާފައެވެ. އެއީ މާލެ ސަރަހައްދުން 14 މީހުންނާއި އަތޮޅުތަކުން 29 މީހުންނެވެ. މިއާއެކު ވެކްސިންގެ ފުރަތަމަ ޑޯޒް ޖެހި މީހުންގެ އަދަދު ވަނީ 397،804ށް އަރާފައެވެ.

74 މީހުން ވެކްސިންގެ ދެ ވަނަ ޑޯޒް ޖަހާފައިވެއެވެ. އެއީ މާލެ ސަރަހައްދުން 57 މީހުންނާއި އަތޮޅުތަކުން 17 މީހުންނެވެ. މިއާއެކު ދެ ޑޯޒް ފުރިހަމަކުރި މީހުންގެ އަދަދު ވަނީ 370،161ށް އަރާފައެވެ.

ރާއްޖޭގައި ވެކްސިން ޖަހަން ފަށާފައިވަނީ 2021 ވަނަ އަހަރުގެ ފެބްރުއަރީ މަހުގެ 1 ވަނަ ދުވަހުއެވެ. އަދި އާންމުންނަށް ހުޅުވާލައިގެން ޖެނުއަރީ މަހުގެ 15 ވަނަ ދުވަހުން ފެށިގެން އަންނަނީ ބޫސްޓަރ ޑޯޒް ޖަހަމުންނެވެ.