ކޮވިޑް-19އާ ގުޅިގެން ކެލާގައި އަޅާފައިވާ ފިޔަވަޅުތަކަށް ލުއިދީފި
ގިނަ އަދަދެއްގެ ބަޔަކު ދަނީ ކޮވިޑް-19 ވެކްސިންގެ ބޫސްޓަރ ޑޯޒް ޖަހަމުން
ހއ. ކެލާ
ކޮވިޑް-19އާ ގުޅިގެން ކެލާގައި އަޅާފައިވާ ފިޔަވަޅުތަކަށް ފެބްރުއަރީ 6ވީ އާދިއްތަ ދުވަހުން ފަށައިގެން ލުއިދީފިއެވެ.
ކެލާ ކައުންސިލުން މައުލޫމާތުދޭ ގޮތުގައި ފިޔަވަޅުތަކަށް ލުއިދީފައިވަނީ އެރަށުގައި ބަލި ފެތުރުން ކޮންޓްރޯލް ވެފައިވާތީއާއި ރަށުގެ ގިނަ އަދަދެއްގެ ބަޔަކު ކޮވިޑް-19 ވެކްސިންގެ ބޫސްޓަރ ޑޯޒް ޖަހަމުންދާތީއެވެ. އެގޮތުން ކެލާގައިވަނީ ޤުރުއާން ކުލާސްތަކާއި ޓިއުޝަން ކުލާސްތަކުގައި ކިޔަވައިދިނުމަށް ހުއްދަ ދީފައިއެވެ. އަދި ކުޅިވަރު ކުޅުމަށް ދަނޑުތަކާއި ކޯޓުތައް ހުޅުވައި ކުޅިވަރު މުބަރާތްތައް ކުރިއަށް ގެންދިއުމަށް ހުއްދަ ދީފައިއެވެ.
ކޮވިޑް19އާ ގުޅިގެން ލުއިތަކެއް ދީފައިވި ނަމަވެސް ބޭރުތެރޭގައި އުޅޭ ހުރިހާ ވަގުތެއްގައި މާސްކު އެޅުމަށާއި އެޗް.ޕީ.އޭ ގެ އުސޫލުތަކާ އެއްގޮތަށް އަމަލުކުރުމަށް ކެލާ ކައުންސިލުން ވަނީ އިލްތިމާސްކޮށްފައެވެ.
