ހއ. ކެލާ ކަނޑޫފަލުގައި މަރުވެފައިވާ ކަނޑޫގަސްތައް ވިއްކަން ނިންމައި، ވަކި މުއްދަތަކަށް ކަނޑޫ ހޮވުން މަނާކޮށްފިއެވެ.
ކެލާ ކައުންސިލުން ބުނީ، ކަނޑޫފަލުގައި މަރުވެފައިވާ ކަނޑޫ ގަސްތައް އެސަރަހައްދުން ނަގައި އަލުން ކަނޑޫ އިންދާ ހެއްދުމުގެ މަސައްކަތް ކުރުމަށް ނިންމާފައިވާ ކަމަށެވެ.
ކަނޑޫފަލުގައި ހިކިފައިވާ ކަނޑޫގަސްތައް ވިއްކުމަށް ބޭނުންވާކަން ފާހަގަކޮށް ކައުންސިލުން ބުނީ މި ކަނޑޫ ގަސްތައް ވިއްކުމަށް ހަމަޖެހިފައިވަނީ ކައުންސިލުން ހިކި ކަނޑޫ ގަސް ވިއްކުމަށް ކަނޑައަޅާފައިވާ އަގުތަކަށް، އެންވަޔަރަންމަންޓަލް ޕްރޮޓެކްޝަން އޭޖެންސީ (އީޕީއޭ)އިން ކަނޑައަޅާފައިވާ ކަނޑޫފާތައް ބެލެހެއްޓުމުގައި ކައުންސިލުން ސަމާލުކަންދީ އަދި މަރުވެފައިވާ ކަނޑޫ ގަސްތަކާއިމެދު އަމަލުކުރަންޖެހޭ އުސޫލުގައިވާ ގޮތުގެ މަތިން ކަމަށެވެ. އަދި އެ އުސޫލުގެ ދަށުން ކަނޑޫހޮވުން 6 މަސް ދުވަހަށް މަނާކުރެވިފައިވާ ކަމަށް ކައުންސިލުން ބުނެއެވެ.
ހިކި ކަނޑޫގަސް ވިއްކުމަށް ކައުންސިލުން ފާސްކޮށްފައިވާ އަގުތައް
- ހިކި ކަނޑޫ ގަހުގެ ވަށަމިނުގައި 10cm ސެންޓިމީޓަރ ހަމަ ނުވާނަމަ ހިލޭ
- ކަނޑޫ ގަހުގެ ވަށަމިނުގައި 10cm ސެންޓިމީޓަރ އާ 20cm ދެމެދު ގަހުގެ އަގަކީ -/5 ރުފިޔާއެވެ.
- ހިކި ކަނޑޫ ގަހުގެ ވަށަމިނުގައި 20cm ސެންޓިމީޓަރ އާ 30cm ދެމެދު ގަހުގެ އަގަކީ -/10 ރުފިޔާއެވެ.
- ހިކި ކަނޑޫ ގަހުގެ ވަށަމިނުގައި 30cm އަށްވުރެން ބޮޑުނަމަ ކޮންމެ ގަހެއްގެ އިތުރުވާ ކޮންމެ 1cm އަކަށް 50 ލާރީގެ ރޭޓުން އަގު އިތުރުވާނެ
ކައުންސިލުން ބުނީ ހިކި ކަނޑޫ ގަސް ބޭނުންވާ މީހުން ކައުންސިލް އިދާރާއިން ދޫކުރާފޯމް ފުރިހަމަ ކުރުމަށްފަހު ފޯމް ހުށަހަޅަން ޖެހޭ ކަމަށެވެ.
ކެލާ ކަނޑޫފަލުގައި މަރުވެފައިވާ ކަނޑޫގަސްތައް ވިއްކަން ނިންމައި، ވަކި މުއްދަތަކަށް ކަނޑޫ ހޮވުން މަނާކޮށްފައިވާއިރު، ރާއްޖޭގެ އެކި ހިސާބުތަކުގައިވާ ކަނޑޫފާތައް މަރުވާ މައްސަލަ 2020 ވަނަ އަހަރުގެ ތެރޭގައި ފެންމަތިވެގެންދިޔައެވެ. އެގޮތުން ކެލާގެ އިތުރުން ހދ. ނޭކުރެންދޫ ކަނޑޫފާގެ ބޮޑު ބައެއް މަރުވެފައިވެއެވެ. އަދި ކަނޑޫފާތައް މަރުވާން ފެށުމާއެކު ރާއްޖޭގައި ހުރި ކަނޑޫފާތައް ހިމާޔަތްކުރުމަށް ހިއުމަން ރައިޓްސް ވޮޗް (އެޗްއާރްޑަބްލިޔު)އިން ދިވެހި ސަރުކާރަށް ވެސް ގޮވާލާފައިވެއެވެ.
ކަނޑޫފާތަކަކީ ރަށް ގިރުމާއި ފެން ބޮޑުވުމުގެ ހާދިސާތަކުން ރައްކާތެރިކޮށްދޭ ގުދުރަތީ ވަސީލަތެކެވެ. އެތަންތަން ނައްތާލުމުގެ ސަބަބުން ރަށްތަކަށް އެކަމުގެ ނޭދެވޭ އަސަރު ކުރެއެވެ.
