ކޮވިޑްގައި 75 އަހަރުގެ އަންހެނަކު ނިޔާވެއްޖެ
6 ފެބުރުއަރީ 2022 | އާދީއްތަ 12:22އޭނާ ނިޔާވީ އާދިއްތަ ދުވަހުގެ މެންދުރުފަހު 1:42ހާއިރު
ކޮވިޑްގައި ނިޔާވި މީހަކު ވަޅުލުމަށް ގެންދަނީ
ކޮވިޑް-19ށް ފަރުވާ ހޯދަމުން ދިޔަ އިތުރު މީހަކު ނިޔާވެއްޖެއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނީ ކޮވިޑް-19ށް ފަރުވާ ހޯދަމުންދިޔަ 75 އަހަރުގެ އަންހެނަކު ނިޔާވެފައިވާ ކަމަށެވެ. އޭނާ ނިޔާވީ އާދިއްތަ ދުވަހުގެ މެންދުރުފަހު 1:42ހާއިރު ކަމަށް އެޗްޕީއޭއިން ބުނެއެވެ.
އެ އަންހެން މީހާ ނިޔާވިއިރު ފަރުވާ ހޯދަމުން ގެންދިޔައީ ހުޅުމާލެ މެޑިކަލް ފެސިލިޓީންނެވެ. މިއާއެކު މިހާތަނަށް ރާއްޖެއިން ކޮވިޑް ބަލީގައި ނިޔާވި މީހުންގެ އަދަދު ވަނީ 282އަށް އަރާފައެވެ.
ރާއްޖެއަށް ކުރިމަތިވި ކޮވިޑް-19ގެ ފަސްވަނަ ރާޅާއެކު، މިބަލީގައި ނިޔާވާ މީހުންގެ ނިސްބަތް ވެސް ވަނީ އިތުރުވެފައެވެ.
މިހާރު މާލެ ސިޓީގެ ޕޮޒިޓިވިޓީ ރޭޓް 22 އިންސައްތާގައި ހުރިއިރު, މިހާތަނަށް ރާއްޖެއިން ކޮވިޑަށް ޕޮޒިޓިވްވީ މީހުންގެ ޖުމްލަ އަދަދު ވަނީ 148،580ށް އަރާފައެވެ. މީގެތެރެއިން 130،649 މީހުން ބަލިން ރަނގަޅުވެފައި ވާއިރު އެކްޓިވް ކޭހުގެ އަދަދަކީ 17،637 އެވެ. 52 މީހަކަށް އަންނަނީ ހޮސްޕިޓަލްތަކުގައި އެޑްމިޓްކޮށްގެން ފަރުވާދެމުންނެވެ.
