ލަތާ މަންގޭޝްކަރުގެ ހާލު ދެރަވެ، އަނެއްކާވެސް އައިސީޔޫގައި ފަރުވާ ދޭން ފަށައިފި
5 ފެބުރުއަރީ 2022 | ހޮނިހިރު 13:18ޖެނުއަރީ މަހުގެ ކުރީކޮޅު ލަތާ ވަނީ ކޮވިޑަށް ޕޮޒިޓިވްވެފައި
މަޝްހޫރު ލަވަކިޔުންތެރިތާ ލަތާ މަންގޭޝްކަރު
އިންޑިއާގެ މަޝްހޫރު ލަވަކިޔުންތެރިޔާ ލަތާ މަންގޭޝްކަރުގެ ހާލު ދެރަވެ، އަނެއްކާވެސް ވެންޓިލޭޓަރުގެ އެހީގައި ފަރުވާ ދޭން ފަށައިފިއެވެ.
އުމުރުން 92 އަހަރުގެ ލަތާ ކޮވިޑް-19އަށް ޕޮޒިޓިވްވެ، މުމްބާއީގެ ބްރީޗް ކޭންޑީ ހޮސްޕިޓަލުގައި އެޑްމިޓުކޮށްފައިވަނީ މިދިޔަ ޖެނުއަރީ މަހުގެ ކުރީކޮޅެވެ. ޖެނުއަރީ މަހުގެ ފަހުކޮޅު ކޮވިޑުން ފަސޭހަވެފައި ވީނަމަވެސް އޭނާ އަދިވެސް އޮތީ ވެންޓިލޭޓަރުގައި ކަމަށް ރިޕޯޓުކޮށްފައިވެއެވެ. ކޮވިޑަށް ޕޮޒިޓިވްވީއިރު، އޭނާ ވަނީ ނިއުމޯނިއާއަށްވެސް ފަރުވާކޮށްފައެވެ.
ބްރީޗް ކޭންޑީ ހޮސްޕިޓަލުގައި ލަތާ މަންގޭޝްކަރަށް ފަރުވާދެމުންދާ ޑޮކްޓަރ، ޑރ. ޕްރެޓިޓް ސަމްދާނީ ވިދާޅުވިގޮތުގައި, ލަތާގެ ހާލަތު އިތުރަށް ގޯސްވެފައިވާތީ އަނެއްކާވެސް ވެންޓިލޭޓަރުގެ އެހީގައި ފަރުވާދޭން ވަނީ ފަށާފައެވެ. އަދި އޭނާގެ ހާލަތު ގާތުން މޮނިޓަރ ކުރަމުންދާކަމަށް ޑރ. ސަމްދާނީ ވިދާޅުވިއެވެ.
ލަތާ މަންގޭޝްކަރަކީ އިންޑިއާގެ މަޝްހޫރު ލަވަކިޔުންތެރިންގެ ތެރެއިން ގުނާލެވޭ ލަވަކިޔުންތެރިއެކެވެ. އޭނާ ވަނީ ލަވަކިޔުމުގެ ދާއިރާއިން ގިނަ އެވޯޑުތަކެއްވެސް ހާސިލްކޮށްފައެވެ.
