ސަވާދީއްތަ ދަތުރާއެކު ރާއްޖޭގައި ޔޮޓް ފަތުރުވެރިކަމަށް ބޮޑު އިންގިލާބެއް އަންނާނެ: އެމްޓީޑީސީ
5 ފެބުރުއަރީ 2022 | ހޮނިހިރު 09:45ދުނިޔޭގެ ގައުމުތަކުގައި ރާއްޖެ އިތުރަށް މަގުބޫލުވާނެ
"ސަވާދީއްތަ ދަތުރު" ފެށުމުގެ ރަސްމިއްޔާތުގެ ތެރެއިން
ސަވާދީއްތަ ދަތުރާއެކު ރާއްޖޭގައި ޔޮޓް ފަތުރުވެރިކަމަށް ބޮޑު އިންގިލާބެއް އަންނާނެ ކަމަށް މޯލްޑިވްސް ޓޫރިޒަމް ޑިވެލޮޕްމެންޓް ކޯޕަރޭޝަން (އެމްޓީޑީސީ)ން ބުނެފިއެވެ.
ހޮނިހިރު ދުވަހު ހއ. ހޯރަފުށީގައި ސަވާދީއްތަ ދަތުރު ފެށުމަށް ބޭއްވި ޚާއްސަ ރަސްމިއްޔާތުގައި އެމްޓީޑީސީގެ މެނޭޖިން ޑިރެކްޓަރު ތަޒްމީލް އަބްދުއްސަމަދު ވިދާޅުވީ, މިއީ ތާރީޚީ ދަތުރުތަކެއް ކަމަށާއި، ފަތުރުވެރިކަމުގެ ދާއިރާއަށް ލިބިގެންދިޔަ އިތުރު ކުރިއެރުމެއް ކަމަށެވެ. އެގޮތުން ކުރިއަށް އޮތްތަނުގައި ރާއްޖޭގައި ޔޮޓް ވިޔަފާރި ކުރިއަރައިގެންދާނެ ކަމަށާއި، މި ސިނާއަތަށް ބޮޑެތި ރަނގަޅު ބަދަލުތަކެެއް އަންނާނެ ކަމަށް އޭނާ ވިދާޅުވިއެވެ. އަދި ވިދާޅުވީ ދުނިޔޭގެ ގައުމުތަކުގައި ރާއްޖެ އިތުރަށް މަގުބޫލުވާނެ ކަމަށްވެސް އޭނާ ވިދާޅުވިއެވެ.
ތަޒްމީލް ވިދާޅުވީ ސަވާދީއްތަ ދަތުރު އެކިއެކި ރަށްރަށަށް ޒިޔާރަތް ކުރެވި، ދިވެހިންގެ އެކި ދިރިއުޅުންތައް ތަޖުރިބާ ކުރުމުގެ ފުރުސަތު ލިބޭނެ ކަމަށާއި، މިއީ ދިވެހި ސަގާފަތް ކުރިއެރުވުމަށް ވެސް ލިބުނު ފަހިފުރުސަތެއް ކަމަށެވެ.
ސަވާދީއްތަ ދަތުރުގައި ރާއްޖޭގެ އެކި ކަންކޮޅުތަކުން, ޔޮޓް ދުއްވާ ގިނަ ބަޔަކު ބައިވެރިވުމަކީ ލިބުނު އިތުރު އުފަލެއްގެ ގޮތުގައި ތަޒްމީލް ސިފަކުރެއްވިއެވެ.
ރާއްޖޭގައި ހެރިޓޭޖް ޓޫރިޒަމް ތަރައްގީކޮށް ކުރިއެރުވުމަށް ކުރަމުންދާ މަސައްކަތްތަކުގެ ދަށުން ސަވާދީއްތަ ދަތުރުގައި 12 ޔޮޓަކުން ބައިވެރިވެފައިވެއެވެ. ސަވާދީއްތަ ދަތުރަކީ އެމްއައިޓީޑީސީގެ ފަރާތުން މުޅި ދުނިޔެއަށް ހުޅުވާލައިގެން ކުރިއަށް ގެންދާ ރެލީއެކެވެ.
