ސްޕެނިޝް ލީގުގެ ލަސް ޕަލްމަސްއަށް ކުޅުނު ސްޕެއިނުގެ ހުނަރުވެރި މިޑްފީލްޑަރު ޓަނާ ޑޮމިންގޭޒް ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނަށް ސޮއިކޮށްފިއެވެ.

އުމުރުން 31 އަހަރުގެ މިޑްފީލްޑަރު މާޒިޔާއަށް ސޮއިކުރީ ހޮނިހިރު ދުވަހު ގައުމީ ފުޓްބޯޅަ ދަނޑުގައި ބޭއްވި ޚާއްސަ ރަސްމިއްޔާތެއްގައެވެ. ޓަނާ މާޒިޔާއަށް ސޮއިކުރިއިރު، މިދިޔަ ބުރާސްފަތި ދުވަހު މާޒިޔާއިން ވަނީ ޔޫރަޕާއި އެފްރިކާ އަދި އޭޝިއާގެ މަތީ ފަންތީގައި މަސައްކަތްކޮށްފައިވާ ކޯޗެއް ކަަމަށްވާ ސާބިއާގެ މަޔޮޑްރަގް ޖެސިކް، އެ ޓީމުގެ ކޯޗުގެ މަގާމަށް ހަމަޖައްސާފައެވެ.

މާޒިޔާއަށް ސޮއިކުރި ޓަނާ ވަނީ އޭނާގެ ޔޫތު ކެރިއަރުގައި ލަސް ޕަލްމަސް އާއި ވަލޮޑޮލިޑަށް ކުޅެފައެވެ. އަދި ސީނިއާ ކެރިއަރުގައި ވިލަ ސަންޓާ ބްރިގިޑާއަށާއި، ވެސިންޑާރިއޯ ބީ ޓީމާއި ސީނިއާ ޓީމަށްވެސް ވަނީ ކުޅެފައެވެ. އެއަށްފަހު 2012 ވަނަ އަހަރު އޭނާ ވަނީ ލަސް ޕަލްމަސްގެ ސީ ޓީމާ ގުޅެފައެވެ. އަދި އޭގެ ފަހުން 2013 ވަނަ އަހަރު ލަސް ޕަލްމަސްގެ ސީނިއާ ޓީމަށް ޕްރޮމޯޓުވިއިރު، އޭނާ ވަނީ ލަސް ޕަލްމަސްއާއެކު ސްޕެނިޝް ލީގުގެ ގިނަ މެޗުތަކެއް ކުޅެފައެވެ. އެގޮތުން ލަސްޕަލްމަސްއަށް ކުޅުނު 139 މެޗުން 13 ލަނޑު އޭނާ ވަނީ ކާމިޔާބުކޮށްފައެވެ.

ސްޕެނިޝް ލީގުގައި ޓަނާ ވަނީ ކުޅުނު 83 މެޗުން 10 ލަނޑު ޖަހާފައެވެ. އެގޮތުން އޭނާ ވަނީ ސްޕެއިންގެ ގަދަ ބާރު ރެއާލް މެޑްރިޑް ކޮޅަށާއި، ގްރަނާޑާ އާއި، އެތުލެޓިކް ބިލްބާއޯ އާއި، މަލާގާ އާއި، ގެޓަފޭ އަދި ރެއާލް ސޮސިއެޑާޑް ކޮޅަށްވެސް ލަނޑު ޖަހާފައެވެ.

ޓަނާ މާޒިޔާއަށް ސޮއިކުރިއިރު، އޭނާ ވެގެން ގޮސްފައިވަނީ ޔޫރަޕުގެ އެންމެ މަތީ ފަންތީގެ ލީގެއްގައި ކުޅުމަށްފަހު ރާއްޖޭގެ ކުލަބަކަށް މިފަހުން ސޮއިކުރި ފުރަތަމަ ކުޅުންތެރިޔާއަށެވެ. ޓަނާ އާއެކު މާޒިޔާގެ ސްކޮޑުގައި މިހާރު ބިދޭސީ ހަތަރު ކުޅުންތެރިން ހިމެނެއެވެ. އެއީ މި ސީޒަނަށް މާޒިޔާއަށް ގެނައި ނޭޕާލުގެ ގައުމީ ފުޓްބޯޅަ ޓީމުގެ އެއްވަނަ ގޯލްކީޕަރު ކިރަން ކުމާރް ލިމްބޫ އާއި، މޮންޓަނީގްރޯގެ ޑިފެންޑަރު ނަމާންޏާ ކާޓާލް އަދި ސެއިންޓް ވިންސެންޓުގެ ފޯވާޑް ކޮނޭލިއަސް ސްޓެވާޓް (ކޯނޭ) އެވެ. ދެން މި ސީޒަނަށް މާޒިޔާއިން ގެނައި އަނެއް ދެ ކުޅުންތެރިންނަކީ ގައުމީ ފުޓްބޯޅަ ޓީމުގެ ކެޕްޓަން އަކުރަމް އަބްދުލް ޣަނީ (އަކޫ) އާއި ޒުވާން ޑިފެންޑަރު ހައިޝަމް ހަސަން (ބިޑި) އެވެ.

މާޒިޔާއަށް މި ސީޒަނުގެ ފުރަތަމަ މުބާރާތް ކަމަށްވާ ޕްރެޒިޑެންޓްސް ކަޕުން ނާކާމިޔާބީއާ ކުރިމަތިލާން ޖެހުނުއިރު، އެ ޓީމުން ވަނީ އެ މުބާރާތުގައި އެ ޓީމަށް އިރުޝާދުދިން ކޯޗު މުޙައްމަދު ޝިޔާޒް (މޯހަން) މަގާމުން ވަކިކޮށްފައެވެ. އެއަށްފަހު ދިވެހި ޕްރިމިއާ ލީގާ އޭއެފްސީ ކަޕަށް މާޒިޔާއިން ސްކޮޑް ވަރުގަދަ ކުރާއިރު، ދިވެހި ޕްރިމިއާ ލީގު ފަށާނީ މި މަހުގެ 16 ވަނަ ދުވަހެވެ. އަދި އޭއެފްސީ ކަޕުގައި މާޒިޔާ ކުޅޭ ދެކުނު އޭޝިއާގެ ގްރޫޕް މެޗުތައް ތާވަލުކޮށްފައި އޮތީ އަންނަ މެއި މަހަށެވެ.