އެސްޓީއޯ ސުޕަރމާޓުގެ ތެރޭގައި ވިޔަފާރި ކުރުމަށް ކުދި ވިޔަފާރިތަކަށް ފުރުސަތު ދެނީ
މިކަމާއި ގުޅޭގޮތުން އެސްޓީއޯއިން މިހާރު އަންނަނީ ކުދި ވިޔަފާރިތަކާއެކު މަޝްވަރާ ކުރަމުން
އެސްޓީއޯ ސުޕަރމާޓް އަދި ހޯލްސޭލް ސެންޓަރ
އެސްޓީއޯ ސުޕަރމާޓުގެ ޖާގަ ބޮޑުކޮށް، އެތަނުގެ ތެރޭގައި ކުދި ވިޔަފާރިތަކަށް ތަކެތި ވިއްކޭނެ އިންތިޒާމު ހަމަޖެއްސުމުގެ މަސައްކަތް ފަށައިފިއެވެ.
މީގެ ބޭނުމަކީ މިއަހަރުގެ ރޯދަމަހުގައި ކުދި ވިޔަފާރިތަކުގެ މުދާ އެސްޓީއޯ ސުޕަރމާޓުގައި ބަހައްޓައިގެން އެވިޔަފާރިތަކުގެ މުދާ ފަސޭހަކަމާއެކު ވިއްކޭނެ އިންތިޒާމުތައް ހަމަޖެއްސުމެވެ. އެކަމަކަށްޓަކައި ބޭނުންވާ ޚާއްސަ ޖާގަތައް ހެދުމުގެ މަސައްކަތް މިހާރު އެސްޓީއޯއިން ވަނީ ފަށާފައެވެ.
ކުދި ވިޔަފާރިތަކަށް ތަނަވަސް ފުރުސަތުތަކެއް ފަހިކޮށްދިނުމަށް ފަށާފައިވާ މަސައްކަތާއި ގުޅޭގޮތުން އެސްޓީއޯއިން މިހާރު އަންނަނީ ކުދި ވިޔަފާރިތަކާއެކު މަޝްވަރާ ކުރަމުންނެވެ. އަދި މިއަންނަ މާޗު މަހަށް މިތަން ހުޅުވުމަށް އެސްޓީއޯއިން އަންނަނީ މަސައްކަތް ކުރަމުންނެވެ.
ރޯދަމަސް ފެށެން ދެމަހަށްވުރެ މަދު ވެފައިވާއިރު، އެސްޓީއޯއަކީ ރޯދަމަހު ގިނަ ރައްޔިތުންނަށް އެންމެ ބޮޑަށް ބޭނުންޖެހިފައި އޮންނަ ވިޔަފާރިއެވެ. އެހެންކަމުން އެސްޓީއޯއިން އަންނަނީ ދުރާލާ މިކަމަށް ތައްޔާރުވަމުންނެވެ. އެގޮތުން ރޯދަމަހާއި ދިމާކޮށް އެންމެ ޑިމާންޑު ބޮޑުވާ ބާވަތްތައް ކަމަށްވާ، ފިޔާ، ބިސް އަދި އެލުވީގެ އަގުތައް އެއް ހަމައެއްގައި ހިފެހެއްޓުމަށްޓަކައި އެސްޓީއޯއިން ގިނަ މަސައްކަތްތަކެއް ކުރެއެވެ.
ކޮވިޑް-19 ގެ ސަބަބުން އެންމެ ހާލަތު ގޯސްވި 2020 ވަނަ އަހަރު ރާއްޖެއަށް މުދާ ލިބުމުގައި ދަތިތަކެއް ދިމާވި ނަމަވެސް އެސްޓީއޯއިން ވަނީ އެއަހަރުގެ ރޯދަ މަހުގައިވެސް މުދާ ހުސްވިޔަ ނުދީ އެއް އަގެއްގައި ރައްޔިތުންނަށް މުދާ ލިބޭނެ އިންތިޒާމުތައް ހަމަޖައްސާފައެވެ.
