ގިނަ ބަޔަކު ހާޒިރުކޮށްގެން ހިންގޭ ޝަރީއަތެއް ބޭއްވޭ ވަރަށް ކްރިމިނަލް ކޯޓުގައި މައްސަލަ ބަލާ ސެކްޝަންގައި ކޮވިޑުގެ ޙާލަތު ރަނގަޅުވެފައިވާތީ، ޔޫތު މިނިސްޓަރު އަހުމަދު މަޙުލޫފުގެ މައްސަލަ ތާވަލުކޮށްފިއެވެ.
އެކަމާއި ގުޅޭގޮތުން ކްރިމިނަލް ކޯޓުގެ މީޑިއާ އޮފިޝަލު އަމާން މުޙައްމަދު ނަޖީބް ވިދާޅުވީ، މަހުލޫފުގެ މައްސަލައަކީ ގިނަ ބަޔަކު އަޑުއެހުމަށް ނަން ނޯޓު ކުރާ މައްސަލައެއް ކަމަށެވެ. އެފަދަ މައްސަލަަތަކަށް ކޯޓު ރޫމް މެނޭޖް ކުރުމަށް ބޭނުންވާ ސެކްޝަންގެ އޮފިސަރު ކޮވިޑް-19 އަށް ޕޮޒިޓިވްވުމަށްފަހު، މިހާރު ބަލިން ރަނގަޅުވެފައިވާކަމަށެވެ.
އަމާން ވިދާޅުވީ، ކޯޓުގެ ގިނަ މުވައްޒަފުން މިހާރު ބޫސްޓަރ ޑޯޒްވެސް ޖަހާފައިވާ ކަމަށެވެ. ވުމާއެކު އެ ކަންކަމަށް ރިއާޔަތްކޮށް، ގިނަ ބަޔަކު ހާޒިރުކޮށްގެން ހިންގޭ ޝަރީއަތެއް ބޭއްވޭ ވަރަށް މައްސަލަ ބަލާ ސެކްޝަންގެ ކޮވިޑުގެ ޙާލަތު ރަނގަޅުވެފައިވާތީ، މަޙުލޫފުގެ މައްސަލަ ތާވަލު ކޮށްފައިވާ ކަމަށެވެ. އެގޮތުން މި މައްސަލައިގެ އިބްތިދާއީ އަޑުއެހުމެއް 10 ފެބްރުއަރީ 2022 ގެ 13:30 އަށް ވަނީ ތާވަލުކޮށްފައެވެ.
މަހުލޫފްގެ މައްސަލައިގެ ޝަރީޢަތާއި ގުޅޭގޮތުން ކޯޓުން މީގެ ކުރިން ބުނެފައިވަނީ އެމައްސަލައިގެ ޝަރީޢަތް ކުރިޔަށްގެންދާނީ ކޮވިޑްގެ ހާލަތު ރަނގަޅުވުމުންކަމަށެވެ.
މިކަމާއި ގުޅޭގޮތުން ކްރިމިނަލް ކޯޓުގެ އިސްގާޒީ އަހުމަދު ޝަކީލްވެސް ވަނީ ވާހަކަފުޅު ދައްކަވާފައެވެ. އެގޮތުން ޝަކީލް ވިދާޅުވެފައިވާ ގޮތުގައި މަހުލޫފުގެ މައްސަލަ ކުރިއަށް ގެންދާނީ ކޮވިޑުގެ ޙާލަތު ރަނގަޅުވުމުން ކަމަށް ކްރިމިނަލް ކޯޓުގެ ގާޒީންގެ މަޖިލީހުން ނިންމާފައެއް ނުވާނެއެވެ. ނަމަވެސް ކޯޓުގެ ސެކްޝަންތަކުގެ ވަކި ވަކި ގާޒީން މައްސަލަތައް ތާވަލު ކުރައްވާ ގޮތަކީ އެގާޒީންގެ ނިންމެވުމެއްކަމަށް ޝަކީލް އޭރު ފާހަގަކުރެއްވިއެވެ.
މަހުލޫފްގެ މައްޗަށް ދައުވާ އުފުލާފައިވަނީ އޭނާ ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެމްބަރުކަމުގައި ހުންނެވިއިރު 2014 ވަނަ އަހަރުގެ އޮގަސްޓް މަހުގެ 27 ވަނަ ދުވަހު ސްޕެޝަލް އިކޮނޮމިކް ޒޯން ބިލަށް ތާއީދުކޮށް ވޯޓުދިނުމުގެ މުގާބިލުގައި އޭރުގެ ޓޫރިޒަމް މިނިސްޓަރު އަހުމަދު އަދީބު އަބްދުލްޣަފޫރު، އެސްއޯއެފް ޕްރައިވެޓް ލިމިޓެޑްގެ ނަމުގައި ބޭންކު އޮފް މޯލްޑިވްސްގައި ހުޅުވާފައިވާ އެކައުންޓުގެ ޗެކަކުން މަހުލޫފަށް ދިން 33،000 އެމެރިކާ ޑޮލަރު އޭނާގެ ނަމުގައި ބީއެމްއެލް ގައި ހުޅުވާފައިވާ އެކައުންޓަށް 2014 ވަނަ އަހަރުގެ ސެޕްޓެމްބަރު މަހުގެ 1 ވަނަ ދުވަހު ޖަމާކޮށް ރިޝްވަތު ހިފާފައިވާކަމަށް ތުހުމަތުކުރެވޭ މައްސަލައިގައެވެ.
މަހުލޫފްގެ މައްޗަށް ދައުވާ އުފުލާފައިވަނީ ކޮރަޕްޝަން ހުއްޓުވުމާއި މަނާކުރުމުގެ ގާނޫނުގެ 3 ވަނަ މާއްދާގެ ހ އާ ހަވާލާދީ އެމާއްދާގެ ށ ގެ ދަށުން ރިޝްވަތު ހިފުމުގެ ކުށުގެ ދައުވާއެވެ.
