މޫދުގައި ސޯލަރ ޕެނަލް ޤާއިމްކޮށްގެން ހަކަތަ އުފެއްދުމުގެ މަޝްރޫއު މިއަހަރު ނޫނީ އަންނަ އަހަރު ފެށޭނެ: ޝައުނާ
މި މަސައްކަތް މިހާރު އޮތީ ޓެންޑަރ މަރުހަލާގައި
މިނިސްޓަރ އޮފް އެންވަޔަރަންމެންޓް ކްލައިމެޓް ޗޭންޖް އެންޑް ޓެކްނޮލޮޖީ އައިމިނަތު ޝައުނާ
އައްޑޫގެ މޫދު ސަރަހައްދުގައި ސޯލަރ ޕެނަލް ހަރުކޮށްގެން ހަކަތަ އުފެއްދުމުގެ ނިޒާމުގެ މަސައްކަތް މިއަހަރު ނުވަތަ އަންނަ އަހަރުގެ ކުރީކޮޅު ފަށައިގަނެވޭނެ ކަމަށް މިނިސްޓަރ އޮފް އެންވަޔަރަންމެންޓް ކްލައިމެޓް ޗޭންޖް އެންޑް ޓެކްނޮލޮޖީ އައިމިނަތު ޝައުނާ ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން މިނިސްޓަރ ޝައުނާ ވިދާޅުވީ މިމަސައްކަތް މިހާރު އޮތީ ޓެންޑަރ މަރުހަލާގައި ކަމަށެވެ. މި ނިޒާމު ޤާއިމްކުރުމުގެ އަމަލީ މަސައްކަތް މިއަހަރު ތެރޭގައި ނުވަތަ އަންނަ އަހަރުގެ ކުރީކޮޅު ފަށަން މަސައްކަތްކުރައްވަމުންދާކަމަށެވެ. އަދި މިމަސައްކަތް ނިމިގެންދާއިރު މިނިޒާމު ވާނީ މުޅި ދުނިޔޭގައި، ކަނޑުގެ ސަރަހައްދުގައި ޤާއިމްކުރެވޭ މިފަދަ އެންމެ ބޮޑު ނިޒާމަށް ކަމަށް މިމަސައްކަތުގައި ހަރަކާތްތެރިވާ މާހިރުން ފާހަގަކުރައްވާކަމަށް މިނިސްޓަރު ވިދާޅުވިއެވެ.
މިނިސްޓަރު އިތުރަށް ވިދާޅުވީ 2021 ވަނަ އަހަރުގެ ތެރޭގައި އައްޑޫގައި އެއް މެގަވޮޓުގެ ބެޓެރީ އެނަރޖީ ސްޓޯރޭޖް ސިސްޓަމެއް ޤާއިމްކޮށް ނިމިފައިވާކަމަށެވެ. މިއީ ރާއްޖޭގެ ރަށެއްގައި މިނިޒާމު ޤާއިމްކުރެވުނު ފުރަތަމަ ފަހަރު ކަމަށާއި، އިއާދަކުރަނިވި ހަކަތައިން ކަރަންޓު އުފެއްދުމުގެ ސިޔާސަތު ތަންފީޒުކުރުމަށް އެޅިގެންދިޔަ ވަރަށް މުހިންމު ފިޔަވަޅެއް ކަމަށް މިނިސްޓަރު ވިދާޅުވިއެވެ.
މިނިސްޓަރު ޝައުނާ އިތުރަށް ވިދާޅުވީ ތިމާވެއްޓަށް ކުރާ އަސަރަށް ބެލިކަމުގައިވިޔަސް އަދި އިގްތިސާދީ ގޮތުން ބެލިޔަސް ހަކަތަ އުފައްދާ ގޮތް ބަދަލުކުރުމަކީ މުހިންމު ކަމެއް ކަމަށެވެ.
އެ މަގަށް ވާސިލްވުމަށް ގިނަ މަސައްކަތްތަކެއް ކުރަމުން ދާކަމަށާއި، މިއަހަރުގެ ތެރޭގައި ރާއްޖޭގެ 80 އަށްވުރެ ގިނަ ރަށުގައި އިރުގެ އަލިން ހަކަތަ އުފައްދާ ނިޒާމު ޤާއިމުކުރެވިގެންދާނެ ކަމަށް މިނިސްޓަރު ވިދާޅުވިއެެވެ. 2021 ވަނަ އަހަރު 63 ރަށެއްގައި މި ނިޒާމު ވަނީ ޤާއިމްކުރެވިފައިވާ ކަމަށާއި، ޖުމްލަ 128 ރަށެއްގައި މިހާރު ވަނީ މިނިޒާމު ގާއިމްކުރެވިފައި ކަމަށްވެސް ވިދާޅުވިއެވެ.
މި ސަރުކާރުގެ ރިޔާސީ ދައުރު ނިމޭއިރު، ރާއްޖޭގައި އުފައްދާ ހަކަތައިގެ އެންމެ މަދުވެގެން 26 އިންސައްތަ އިރުގެ އަލިން އުފެއްދޭނެ ކަމަށް މިނިސްޓަރު ޝައުނާ ވިދާޅުވިއެވެ.
