މޫސުމީ ބަދަލުތައް ދެނެގަނެ، ހައްލު ހޯދުމަށް އައު އީޖާދީ ޓެކްނޮލޮޖީ ބޭނުންކުރަންޖެހޭ: މިނިސްޓަރު ޝައުނާ
މޫސުމަށް އަންނަ ބަދަލުތަކުގެ ސަބަބުން އެންމެ ބޮޑު ގެއްލުމެއް ލިބެމުންދަނީ ފަރުތަކަށް
މިނިސްޓަރ އޮފް އެންވަޔަރަމެންޓް، ކްލައިމެޓް ޗޭންޖް ޓެކްނޮލޮޖީ އާމިނަތު ޝައުނާ
މޫސުމީ ބަދަލުތައް ދެނެގަނެ، އެކަންކަމަށް ހައްލު ހޯދުމަށް އައު އީޖާދީ ޓެކްނޮލޮޖީ ބޭނުންކުރަންޖެހޭ ކަމަށް މިނިސްޓަރ އޮފް އެންވަޔަރަމެންޓް، ކްލައިމެޓް ޗޭންޖް ޓެކްނޮލޮޖީ އާމިނަތު ޝައުނާ ވިދާޅުވެއްޖެއެވެ.
ބުދަ ދުވަހު "ދަ މޯލްޑިވްސް އޯޝަން ހެކަތޮން"ގެ ނަމުގައި ކުރިއަށްގެންދާ ހަރަކާތް އިފްތިތާހްކޮށްދެއްވައި މިނިސްޓަރު ވިދާޅުވީ، މޫސުމާ ގުޅިގެން އެންމެ ގިނައިން ފާހަގަވާ މައްސަލަތަކަކީ ރަށްގިރުމާއި، ކުނި މެނޭޖްނުކުރެވުމާ ގުޅިގެން ސިއްހީ ގޮތުން ދިމާވާ މައްސަލަތަކާއި، ތަރައްގީއާ ގުޅިފައިހުރި މައްސަލަތައް ކަމަށެވެ. އަދި ވިދާޅުވީ މި މައްސަލަތައް ހައްލު ކުރުމަށް ހަމައެކަނި ވަށާފާރެއް ރާނައިގެން ނުނިމޭނެ ކަމަށެވެ.
ރާއްޖެއަކީ ކުޑަގައުމެއް ނޫންކަން ފާހަގަކުރައްވައި ޝައުނާ ވިދާޅުވީ، ރާއްޖޭގެ ފަރުތަކަކީ މުޅި ދުނިޔޭގައިވެސް 7 ވަނައަށް އެންމެ ބޮޑު ފަރު ކަމަށާއި، ގާތްގަނޑަކަށް ދުނިޔޭގެ 3 އިންސައްތަ ފަރު ހިމެނެނީ ރާއްޖޭގައި ކަމަށެވެ. މޫސުމަށް އަންނަ ބަދަލުތަކުގެ ސަބަބުން އެންމެ ބޮޑު ގެއްލުމެއް ލިބެމުންދަނީ ފަރުތަކަށް ކަމަށް މިނިސްޓަރު ވިދާޅުވިއެވެ.
މިނިސްޓަރު ޝައުނާ ވިދާޅުވީ މޫސުމީ ބަދަލުތަކާ ގުޅިގެން ލިބޭ ގެއްލުންތައް ދެނެގަތުމަކީ ވަރަށް މުހިންމު ކަމެއް ކަމަށާއި، ވާގޮތް އެނގުން ވަރަށް މުހިންމު ކަމަށެވެ. އެގޮތުން އެންމެ ފަހުގެ ޓެކްނޮލޮޖީ ބޭނުން ކޮށްގެން ޑޭޓާ ނެގުމަކީ ވަރަށް މުހިންމު ކަމެއް ކަމަށް މިނިސްޓަރު ޝައުނާ ވިދާޅުވިއެވެ. މިނިސްޓަރު ޝައުނާ ވިދާޅުވީ މޫސުމީ އަދި އެހެނިހެންވެސް ބަދަލުތަކާ ގުޅިގެން ފަރުތަކަށް އަންނަ ބަދަލުތަކާއި ލިބޭ ގެއްލުން އެންމެ ފުރިހަމަގޮތުގައި ދެނެގަނެވޭނީ ފަހުގެ ޓެކްނޮލޮޖީގެ ބޭނުންކޮށްގެން އެކަންކަން ބަލައި ދިރާސާކޮށްގެން ކަމަށެވެ.
ޕްލާސްޓިކަށް އިޝާރާތް ކުރައްވައި މިނިސްޓަރު ވިދާޅުވީ ރާއްޖޭގެ ކަނޑުތަކަށް ހަމައެކަނި ވާސިލްވަނީ ރާއްޖޭގެ ކުނި އެކަނި ނޫންކަމަށާއި، ޕްލާސްޓިކުގެ ސަބަބުން މަސްވެރިކަމަށް އަންނަ ބަދަލުތައް ދެނެގަންނަންޖެހޭ ކަމަށެވެ. މޫސުމަށް އަންނަ ބަދަލުތަކުގެ ސަބަބުން ރާއްޖޭގެ ރަށްތަކަށް އަސަރުކުރާ މިންވަރާއި ވައި ނުސާފުވާ މިންވަރު ހޯދައި ބަލަންޖެހޭ ކަމަށް މިނިސްޓަރު ވިދާޅުވިއެވެ. އަދި ވިދާޅުވީ މިކަންކަން ދެނެގަނެ މިކަންކަމާއި ގުޅޭގޮތުން މުސްތަގުބަލުގައި އަޅަން ހުރި ފިޔަވަޅުތައް ރާވައި ހިންގައި ނިންމޭނީ މިފަދަ ވަސީލަތްތަކުގެ އެހީގައި ލިބޭ ޑޭޓާތަކުގެ އެހީގައި ކަމަށެވެ.
މީގެ އިތުރުން މިނިސްޓަރު ވިދާޅުވީ ތިމާވެއްޓަށް ދިމާވާ މިފަދަ ބޮޑެތި މައްސަލަތައް ހައްލުކުރުމަށް މި ދާއިރާގެ ކަމާބެހޭ ފަރާތްތަކާ މަޝްވަރާކުރައްވަމުން ދާކަމަށެވެ.
